دەپۋتات ماقسات تولىقباي ەلىمىزدەگى تەمىر جول ماسەلەسىن كوتەردى. ول قازىرگى ۆاگونداردىڭ ساپاسىن سىنعا الىپ، مينيسترگە ساۋال جولدادى. 

"سوۆەت زامانىنداعى ۆاگوندار سۇيرەتىلىپ ءالى ءجۇر. ساپا بولسا ءنول. 60 پايىزىنىڭ توز-توزى شىققان. مينيسترلىك نە دەيدى؟ 2030 جىلعا دەيىن جارىلقايمىز دەيدى. ءبىراق ءبىزدىڭ قتج-عا ءبارىبىر. سول جەردەگى مەنەدجەرلەرگە ءبىزدىڭ تەمىر جول ساپاسىنىڭ قۇنى كوك تيىن. 26 جىلدا جارىلقاي الماعان سالانى 7 جىلدا جارىلقايدى دەگەنگە جان بالاسى سەنبەيدى. ايتاتىندارى ەرتەگى، ايتاتىندارى اڭىز. قالعان ۆاگونداردىڭ 80 پايىزى توزىپ، ەكى قولىمىزدى مۇرنىمىزعا تىعىپ وتىرماسىمىزعا كەپىلدىك بەرە الاسىز با مينيستر مىرزا؟"، دەدى ماقسات تولقىباي.

بۇدان بولەك دەپۋتات تەمىر جولداعى بيلەت باعاسىنا قاتىستى دا ءوز پىكىرىن ايتتى. 

"تەرەزەسى اشىلمايتىن، كونديسيونەرلەرى ىستەمەيتىن، قابىرعاسىندا تاراكاندار جۇرەتىن ەسكى ۆاگونداردىڭ وزىنە جازدى كۇنى بيلەت تاپپايسىڭ. بيلەت باعالارى قىمبات. الايدا ءبىز بيلەتتەردى سۋبسيديالاۋ ءۇشىن جىل سايىن ميللياردتاردى ساناپ بەرەمىز. پويىزداردىڭ كەشىگىپ جۇرەتىنىن ايتپاي-اق قويايىن. توقەتەرى مىناۋ: ەسكى قازاقستاننىڭ مۇراسى بولىپ قالعان.تەمىر جول ماسەلەسىن قاشان شەشەسىزدەر؟ 26 جىل كۇتتىك. ءالى قانشا كۇتەمىز؟ زاماناۋي ۆاگوندارعا كەزەكسىز، ءتيىمدى باعادا مىنەتىن كۇن تۋا ما بۇل قازاققا؟"، دەدى ماقسات تولىقباي.