كەشە قاستاندىق جاسالعان كييەۆتە تۇراتىن قازاقستاندىق بەلسەندى، "باسە" YouTube-ارناسىنىڭ اۆتورى ايدوس سادىقوۆتىڭ جاعدايى اۋىر. بۇل تۋرالى ازاتتىق راديوسى حابارلادى.

سادىقوۆقا كەشە، 18 ماۋسىمدا كييەۆتەگى اۋرۋحانانىڭ بىرىندەگى نەيروحيرۋرگيا بولىمىندە جاسالعان وپەراسيا ەكى جارىم ساعاتقا سوزىلعان. بۇل تۋرالى ايدوس سادىقوۆتىڭ ايەلى، جۋرناليست ناتاليا سادىقوۆا ازاتتىققا بەرگەن سۇحباتىندا ايتقان.

– وق سامايىنا ءتيىپ، ميىن جاناپ وتكەن. كەشە جانساقتاۋ بولىمىنە كىرىپ شىقتىم، جاعدايى وتە اۋىر. دارىگەرلەر جامان بولجام جاساپ وتىر. بۇگىنگى تۇننەن امان قالسا، تاعى باقىلايمىز دەدى. ايدوس مەن جانساقتاۋ بولىمىنە كىرگەندە ەستىمەدى، ءبىراق مەن ودان ولمەۋىن سۇرادىم. مەنى ەستىگەن سياقتى، سەبەبى بۇگىن [19 ماۋسىمدا] تاڭەرتەڭ كييەۆ ۋاقىتىمەن 7-دە اۋرۋحاناعا حابارلاسقانىمدا "بۇگىنگى تۇننەن امان شىقتى" دەپ ايتتى، – دەدى سادىقوۆا.

2014 جىلى قازاقستان پارلامەنتىنىڭ ەكس-دەپۋتاتى مارات يتەعۇلوۆتىڭ شاعىمى بويىنشا ناتاليا سادىقوۆانىڭ ۇستىنەن قىلمىستىق ءىس قوزعالعان سوڭ ەرلى-زايىپتى ايدوس جانە ناتاليا سادىقوۆتار اقتوبەدەن كييەۆكە كەتكەن. يتەعۇلوۆ جۋرناليست سادىقوۆانىڭ لاقاپ اتپەن وپپوزيسيالىق گازەتكە جازعان ماقالاسىن "جالا جابۋ" دەپ، سوتقا ارىزدانعان.

بىلتىر قازاقستان ۇكىمەتى ايدوس جانە ناتاليا سادىقوۆتاردى "ارازدىق قوزدىردى" دەپ ايىپتاپ، ىزدەۋ جاريالاعان.