ەلىمىزدە العاش انا اتانىپ جاتقان قىز-كەلىنشەكتەردىڭ جاسى ۇلعايىپ، تۋۋ كورسەتكىشى كەرىسىنشە، ازايعان. ماسەلەن، بىلتىر 379 مىڭ ءسابي دۇنيەگە كەلىپتى. بۇل – كەيىنگى جىلدارداعى ەڭ تومەنگى كورسەتكىش. 

تەلەارنا بەرگەن مالىمەت بويىنشا، ەكونوميكانىڭ باستى تەتىگىنىڭ ءبىرى سانالاتىن دەموگرافيا ماسەلەسى ءبىر عانا قازاقستاندا ەمەس الەم ەلدەرى ءۇشىن ورتاق بولىپ وتىر. سونىڭ ىشىندە ەلىمىزدە دە پاندەميا كەزىندە بولعان بەبي-بۋمنان كەيىن بالا تۋۋ كورسەتكىشى ايتارلىقتاي تومەندەپ كەتكەن. بيىل ءبىرىنشى توقساندا ەلىمىزدە 91،9 مىڭ بالا دۇنيەگە كەلگەن. بۇل وتكەن جىلدىڭ سايكەس كەزەڭىمەن سالىستىرعاندا 1،8 پايىزعا از. دەي تۇرعانمەن، اتاپ ايتار بولساق، ەل ايماعىندا تۋۋدىڭ جوعارى كورسەتكىشى تۇركىستان وبلىسىندا تىركەلگەن. ەكىنشى جانە ءۇشىنشى ورىنداردا الماتى قالاسى مەن الماتى وبلىسى ورنالاسقان. ال ەڭ از كورسەتكىشتەر ۇلىتاۋ، سولتۇستىك جانە شىعىس قازاقستان وبلىستارىندا تىركەلىپتى. ساراپشىلار مۇنداي ماسەلەگە نەگىزىنەن الەۋمەتتىك-ەكونوميكالىق فاكتور اسەر ەتەتىنىن ايتادى. ولاردىڭ پىكىرىنشە، نورمالار مەن ەڭبەك نارىعىنداعى جاعداي جاستاردى وتباسىن قۇرۋ مەن بالالى بولۋدى كەيىنگە قالدىرۋعا ماجبۇرلەيدى. سوندىقتان كەلەشەكتە اتالعان كورسەتكىشتەر تومەندەي بەرەدى دەگەن بولجام بار. تەلەارنا اقپاراتىنشا، العاش رەت انا اتانعان ايەلدەردىڭ ورتاشا جاسى بىلتىر 25-تەن اسقان ەدى. ال بيىل ءسابيىن العاش قولعا العاندار كورسەتكىشى 29 جاستى قۇراعان. 

"جالپى ستاتيستيكادان بولەك، ايەلدەردىڭ 30 جاستا العاش رەت تۇڭعىش ءسابيىن قولىنا الۋى قالىپتى. ارينە، وعان قىز-كەلىنشەكتەردى كىنالاي المايمىز. الەمدە بولىپ جاتقان تۇراقسىز جاعدايلاردىڭ ءبارىنىڭ قاتىسى بار. بۇرىندارى جاس ۇلعايعان سايىن بالا تۋۋ قيىندايدى دەيتىنبىز. ءبىراق ءقازىر قارقىندى دامىعان مەديسينا ونىڭ دا شەشىمىن تاۋىپ كەلەدى. ءارى مەملەكەت تە وتباسىلارعا بالا ءسۇيۋ ءۇشىن قولدان كەلگەن كومەكتى كورسەتۋگە ءتيىس"، - دەدى ۇعا اكادەميگى ۆياچەسلاۆ لوكشين.