قارجىلىق مونيتورينگ اگەنتتىگى ۇلتتىق بانكپەن بىرلەسە وتىرىپ ءبىرقاتار نەسيە پايىزدارىن تومەندەتۋ تۋرالى قاۋلى شىعارعانىن حابارلادى.

وعان ساي، تومەندەگىدەي پايىزدىق مولشەرلەمەلەر تومەندەتىلەدى:

♦ كەپىلسىز بانك قارىزدارى مەن شاعىن نەسيە ۇيىمدارىنداعى شاعىن نەسيەلەردىڭ جىلدىق ماكسيمالدىق سىياقىسىنىڭ ءتيىمدى مولشەرلەمەسى 56-دان 46%-عا دەيىن؛

♦ كەپىلدى بانك زايمدارى 40-تان 35%-عا دەيىن؛

♦ يپوتەكالىق زايمدار 25%-عا دەيىن.

45 كۇنگە دەيىنگى ميكرونەسيەلەردىڭ كۇندىك نومينالدى مولشەرلەمەسى 1-دەن 0،3%-عا تومەندەتىلىپ، جىلدىق سىياقى مولشەرلەمەسىنىڭ شەكتى ءمانى 179% شاماسىندا بەلگىلەندى. مۇنداي زايمداردىڭ ماكسيمالدىق سوماسى 50-دەن 45 اەك-كە نەمەسە 184،6 مىڭنان 166،14 مىڭ تەڭگەگە دەيىن ازايتىلادى.

سونداي-اق تۇتىنۋشىلىق نەسيەلەر مەن ميكرونەسيەلەردىڭ ماكسيمالدىق سوماسى بەلگىلەندى:

كەپىلسىز بانك قارىزدارى بويىنشا  – 2200 اەك (8 122 400 تەڭگە)؛
كەپىلسىز ميكرونەسيەلەر بويىنشا – 1 100 اەك (4 061 200 تەڭگە)؛
لومباردتارداعى ميكرونەسيەلەر بويىنشا – 8 000 اەك (29 536 000 تەڭگە)؛
شاعىننەسيە ۇيىمدارىنداعى شاعىننەسيەلەر بويىنشا – 20 000 اەك (73 840 000 تەڭگە).