گرانتقا ىلىنبەي قالعان تۇلەكتەرگە ءالى دە مۇمكىندىك بار. بۇگىن ۇكىمەتتە وتكەن جينالىستا عىلىم جانە جوعارعى ءبىلىم ءمينيسترى ساياسات نۇربەك وسىنداي جاعىمدى جاڭالىقپەن ءبولىستى. وقۋ ورىندارىنداعى اتاۋلى رەكتور تاعايىندايتىن گرانتتاردان بولەك، ەلىمىزدەگى ءىرى كومپانيالار دا جەكە گرانت بولۋدە. ولاردىڭ جالپى سانى 10 مىڭعا جۋىقتايدى. ونى تەگىن وقۋعا تۇسە الماعان، الايدا جوعارى بالل جيناعان تۇلەك ۇتىپ الادى. 

بۇگىن ۇكىمەت وتىرىسى جاڭا وقۋ جىلىنىڭ باستالۋىنا ارنالدى. بىلىمگە جاۋاپتى قوس مينيستر جەكە-جەكە بايانداما جاسادى. ورتا بىلىمگە جاۋاپتى باس ءمۇعالىم عاني بەيسەمبايەۆ ەلىمىزدىڭ بارلىق مەكتەپتەرى الداعى جاڭا وقۋ جىلىنا دايىن. بيىل ءبىلىم كۇنى العاشقى قوڭىراۋ 4 ملن.-عا جۋىق وقۋشى ءۇشىن جەكسەنبىدە سوعىلادى دەدى. ودان بولەك، بيىل مەكتەپتەر مەن بالاباقشالاردا قاۋىپسىزدىك شارالارى كۇشەيەدى. مەكتەپتەردىڭ ءار بۇرىشىنا دابىل تۇيمەسى قويىلىپ، بەينەباقىلاۋ كامەرالارىنىڭ سانى كوبەيەدى. 

عاني بەيسەمبايەۆ ق ر وقۋ-اعارتۋ ءمينيسترى: «جاڭا وقۋ جىلىندا 1 قىركۇيەكتەن باستاپ 7،9 مىڭ ءبىلىم ۇيىمىندا 3،9 ملن بالا ءبىلىم الادى، ونىڭ 360 مىڭى – ءبىرىنشى سىنىپ وقۋشىلارى. بۇگىندە اقپارات بويىنشا وڭىرلەردىڭ وقۋلىقتارمەن قامتاماسىز ەتۋى 90% جەتىپ وتىر. وسى جىلدىڭ 25 تامىزىنا دەيىن وقۋشىلاردى وقۋلىقتارمەن تولىق قامتۋدى بارلىق وڭىرلەر اياقتاۋعا ءتيىس. اكىمدىكتەر تاراپىنان تەگىن تاماقتاندىرۋدى ۇيىمداستىرۋ ءۇشىن قاجەتتى قاراجات ءبولىنىپ وتىر. بيىل قىركۇيەكتەن باستاپ 1،7 ملن وقۋشى تەگىن تاماقتاناتىن بولادى. بۇل كورسەتكىش وتكەن جىلمەن سالىستىرعاندا 100 مىڭ بالاعا ارتىپ وتىر. جىل سايىن الەۋمەتتىك وسال ساناتتاعى وتباسىلارعا كومەك كورسەتىلىپ كەلەدى. بيىلدا 510 مىڭ بالانى مەكتەپكە دايىندالۋعا قاجەتتى كومەكپەن قامتۋ كوزدەلگەن».

ال، عىلىم جانە جوعارعى ءبىلىم ءمينيتسرى ساياسات نۇربەك بولسا، داۋلى گرانت ماسەلەسىنە قاتىستى شۋدىڭ نۇكتەسىن قويدى. جوعارى بالل الىپ تۇرىپ گرانتقا وتپەگەندەر دەمەك، ول ماماندىققا دەگەن كونكۋرستىڭ قاتتى بولعانى دەدى. ءمينيستردىڭ ايتۋىنشا، گرانت كوبىنە مەملەكەتتىك تاپسىرىستىڭ اياسىنداعى ماماندىقتارعا كوپ بولىنگەن. الايدا، ۇبت-دان جوعارى باللا الىپ تۇرىپ، تەگىن ءبىلىم الۋعا وتپەگەندەر ءۇشىن ءالى دە مۇمكىندىك بار دەپ قۋانتتى. 

ساياسات نۇربەك ق ر عىلىم جانە جوعارعى ءبىلىم ءمينيسترى: «بىرىنشىدەن جەرگىلىكتى اكىمدەر گرانتتار ءبولدى. 3000-داي گرانت.  KazEnergy قاۋىمداستىعىنىڭ گرانتتارى بار. ح.ا.ياسساۋي اتىنداعى حالىقارالىق قازاق-تۇرىك ۋنيۆەرسيتەتىندە ءبىلىم الۋ ءۇشىن تۇرىك رەسپۋبليكاسىنىڭ 500 گرانتى بەرىلدى. Freedom Finance Group كومپانياسىنان 400 گرانت كەشە ءبولىندى. تۇركىستانداعى حالىقارالىق تۋريزم جانە قوناقجايلىلىق ۋنيۆەرسيتەتى 800ماقساتتى گرانت ۇسىندى. «قازاقستان حالقىنا» قورى 850 گرانت بولەدى. سونىمەن قاتار، ساتبايەۆ، ەسەنوۆ، امانجولوۆ، تورايعىروۆ، تۇران-استانا جانە تاعى باسقا ۋنيۆەرسيتەتتەر رەكتورلىق 3000-داي گرانتتار بەرەدى. 8000-10000-عا جۋىق قوسىمشا گرانتتار بەرىلەتىن بولادى». 

بيىل وقۋعا تۇسكەن تۇلەكتەر ءۇشىن جاتاقحانامەن پروبلەما بولمايدى دەپ سەندىردى جاۋاپتى مينيستر.