بيشىمبايەۆ ءىسى بويىنشا ايىپتى دەپ تانىلىپ، 4 جىلعا باس بوستاندىعىنان ايىرىلعان باقىتجان بايجانوۆتىڭ شاعىمى جوعارعى سوتتا قارالمايتىن بولدى. بۇعان بايجانوۆتىڭ سوت شەشىمىن قايتا قاراۋ تۋرالى كاسساسيالىق ارىزىنان باس تارتۋى سەبەپ بولعان. بۇل تۋرالى جوعارعى سوت مالىمدەدى.
"26 تامىزدا بايجانوۆ سوت اكتىلەرىن قايتا قاراۋ تۋرالى كاسساسيالىق ءوتىنىشىن قايتارىپ الدى. ءوتىنىشتى الدىن الا قاراۋ جۇرگىزىلمەيدى. ءوتىنىشتى قايتارۋ تۋرالى رەسمي قاۋلى 4 قىركۇيەكتە شىعادى"، – دەلىنگەن حابارلامادا.
ەسكە سالا كەتەيىك، باقىتجان بايجانوۆ ايەلى سالتانات نۇكەنوۆانى ولتىرگەنى ءۇشىن سوتتالعان ەكس-مينيستر قۋاندىق بيشىمبايەۆتىڭ ءىسى بويىنشا ايىپتالعانداردىڭ ءبىرى. وعان اتالعان قىلمىستىق ءىس بويىنشا "كىسى ءولتىرۋ فاكتىسىن جاسىردى" دەگەن ايىپ تاعىلعان بولاتىن.
پىكىر قالدىرۋ