تەاتر جانە كينو اكتەرى ءۇسىپحان سەيتىمبەت ومىردەن ءوتتتى. بۇل تۋرالى مۇحتار اۋەزوۆ اتىنداعى قازاق ۇلتتىق دراما تەاترىنىڭ باسپا ءسوز قىزمەتى حابارلادى.
"قازاق ونەرى اۋىر قايعىعا ۇشىرادى. تەاترىمىزدىڭ اكتەرى، 1986 جىلعى جەلتوقسان وقيعاسىنىڭ قاھارمانى، "قۇرمەت" وردەنىنىڭ يەگەرى ءۇسىپحان ابدىكەرىم ۇلى سەيتىمبەت دۇنيەدەن ءوتتى. ول سانالى عۇمىرىن مۇحتار اۋەزوۆ اتىنداعى قازاق ۇلتتىق دراما تەاترىنا ارناپ، تۋما تالانتى، تابيعي دارىنى ارقاسىندا ءار جانردا ەستە قالارلىق سان قىرلى وبرازدار گالەرەياسىن جاسادى. حالىق جادىندا بويىنا بارلىق ونەردى قابىستىرا بىلگەن شەبەر اكتەر رەتىندە قالدى... مارقۇمنىڭ وتباسى مەن جاقىندارىنا، بۇكىل تەاتر ۇجىمىنا قايعىرىپ، كوڭىل ايتامىز. جاتقان جەرى جايلى بولىپ، جانى پەيىشتە شالىقتاسىن. ارتىندا قالعان ۇرپاقتارىنا ۇزاق عۇمىر بەرسىن" دەلىنگەن تەاتر حابارلاماسىندا.
ءۇسىپحان ابدىكەرىم ۇلى سەيتىمبەت 1960 جىلى تۇركىستان وبلىسى كەلەس اۋدانى يگىلىك اۋىلىندا دۇنيەگە كەلگەن.
1979 جىلى رەسپۋبليكالىق ەسترادا-ونەر ستۋدياسىن ءبىتىرىپ، الماتى وبلىستىق فيلارمونياسىنا جۇمىسقا قابىلداندى.
1983 جىلى ت. جۇرگەنوۆ اتىنداعى تەاتر جانە كوركەمسۋرەت ينستيتۋتىنا وقۋعا ءتۇستى.
جەلتوقسان وقيعاسى كەزىندە باتىرلىق پەن پاتريوتيزم ۇلگىسىن كورسەتىپ، جاستار قارسىلىعىن ۇيىمداستىرعانى ءۇشىن 1987 جىلى ەكى جىلعا سوتتالىپ، 1989 جىلى بوستاندىققا شىقتى. وسى جىلى ينستيتۋتتاعى وقۋىن قايتا جالعاستىرىپ، ءتامامدادى.
1990 جىلى ع. مۇسىرەپوۆ اتىنداعى جاسوسپىرىمدەر مەن بالالار تەاترىنىڭ اكتەرلىك قۇرامىنا جۇمىسقا قابىلداندى.
1999 جىلدان بەرى م. اۋەزوۆ اتىنداعى قازاق ۇلتتىق دراما تەاترىندا اكتەر بولىپ قىزمەت اتقاردى.
