شىمكەنت قالاسىنىڭ ازاماتتىق ىستەر جونىندەگى اۋدانارالىق سوتى قورعانىس مينيسترلىگىنىڭ ءتورت جاۋاپكەردەن 25 ملرد 93 ملن تەڭگە كولەمىندە كەلتىرىلگەن ماتەريالدىق زالالدى مەملەكەت پايداسىنا ءوندىرۋ تۋرالى تالاپ ارىزىن ءىشىنارا قاناعاتتاندىردى.
"جاۋاپكەرلەر اسكەري ءبولىمنىڭ تەحنيكالىق اۋماعىندا №14 ينجەنەرلىك وق-دارىلەردى ساقتاۋ قويماسىندا ءورت شىعۋىنا جول بەرگەندەرى، ياعني ولاردىڭ ىس-ارەكەتتەرىنەن اسا ءىرى مولشەردە شىعىن كەلگەنى سوتپەن انىقتالعاندىقتان، كەلتىرىلگەن ماتەريالدىق زالالدى ورتاقتاسقان تۇردە 23 764 530 881 تەڭگە كولەمىندە مەملەكەت پايداسىنا ءوندىرۋ تۋرالى شەشىم قابىلداندى. تالاپتىڭ 1 328 507 355 تەڭگە ءوندىرۋ تۋرالى بولىگى دالەلدەر بولماۋىنا بايلانىستى قاناعاتتاندىرۋسىز قالدىرىلدى" دەلىنگەن سوت باسپا ءسوز قىزمەتى تاراتقان حابارلامادا.
2021 جىلعى 26 تامىزدا جامبىل وبلىسى بايزاق اۋدانى قاينار جول تورابىندا ورنالاسقان №28349 اسكەري ءبولىمىنىڭ ينجەنەرلىك وق-دارىلەر قويماسىنىڭ بىرىنەن ءورت شىعىپ، جارىلىستارعا اكەلىپ سوقتىرعان. وقيعا سالدارىنان 18 ادام قازا تاۋىپ، مەملەكەت پەن جەكە تۇلعالارعا اسا ءىرى مولشەردە زالال كەلگەن.
پىكىر قالدىرۋ