قاسىم-جومارت توقايەۆتىڭ جارلىعىمەن قازاقستاننىڭ موڭعولياداعى، شري-لانكا دەموكراتيالىق سوسياليستىك رەسپۋبليكاسىنداعى جانە شۆەسيا كورولدىگىندەگى ەلشىلەر تاعايىندالدى.
اقوردانىڭ مالىمەتىنشە، پرەزيدەنت جارلىعىمەن الماس سەيتاقىنوۆ قازاقستاننىڭ موڭعولياداعى توتەنشە جانە وكىلەتتى ەلشىسى لاۋازىمىنا تاعايىندالدى.
"سەرگەي الەكساندروۆيچ ۆيكتوروۆ قازاقستان رەسپۋبليكاسىنىڭ شري-لانكا دەموكراتيالىق سوسياليستىك رەسپۋبليكاسىنداعى توتەنشە جانە وكىلەتتى ەلشىسى لاۋازىمىنا تاعايىندالدى. قازاقستان رەسپۋبليكاسىنىڭ شۆەسيا كورولدىگىندەگى توتەنشە جانە وكىلەتتى ەلشىسى ولجاس مۇحامەدعالىم ۇلى سۇلەيمەنوۆ قازاقستان رەسپۋبليكاسىنىڭ دانيا كورولدىگىندەگى توتەنشە جانە وكىلەتتى ەلشىسى قىزمەتىن قوسا اتقارۋشى لاۋازىمىنا تاعايىندالدى"، – دەلىنگەن اقپاراتتا.
ايتا كەتەيىك، الماس سەيتاقىنوۆ ءال-فارابي اتىنداعى قازاق ۇلتتىق ۋنيۆەرسيتەتىنىڭ حالىقارالىق قاتىناستار فاكۋلتەتىن اياقتاعان.
- 2008 جىلدان باستاپ قازاقستان رەسپۋبليكاسى سىرتقى ىستەر مينيسترلىگىنىڭ ورتالىق اپپاراتىندا ءارتۇرلى لاۋازىمداردا قىزمەت اتقارعان.
- 2008-2009 جىلدارى قازاقستاننىڭ ازيا جانە افريكا دەپارتامەنتىنىڭ اتتاشەسى؛
- 2009-2014 جىلدارى جۇڭگو حالىق رەسپۋبليكاسىنداعى ەلشىلىگىنىڭ اتتاشەسى، III حاتشىسى؛
- 2014-2015 جىلدارى ازيا جانە افريكا دەپارتامەنتىنىڭ III حاتشىسى؛
- 2015-2019 جىلدارى جۇڭگو حالىق رەسپۋبليكاسىنداعى شانحاي قالاسىنداعى باس كونسۋلدىعىنىڭ III حاتشىسى، II حاتشىسى؛
- 2019-2020 جىلدارى قازاقستاننىڭ كونسۋلدىق قىزمەت دەپارتامەنتىنىڭ تاياۋ شىعىس، ازيا جانە افريكا باسقارماسىنىڭ باسشىسى؛
- 2020-2022 جىلدارى قازاقستاننىڭ ازيا-تىنىق مۇحيتى ءوڭىرى دەپارتامەنتى جۇڭگو حالىق رەسپۋبليكاسى باسقارماسىنىڭ باسشىسى بولىپ جۇمىس ىستەدى.
- ال 2022 جىلدىڭ تامىز ايىنان باستاپ جۇڭگو حالىق رەسپۋبليكاسىنداعى سيانگان (گونكونگ) جانە اومەن (ماكاو) ارنايى اكىمشىلىك اۋداندارىندا قازاقستان رەسپۋبليكاسىنىڭ باس كونسۋلى قىزمەتىن اتقارعان.
ولجاس مۇحامەدعالىم ۇلى سۇلەيمەنوۆ 1980 جىلعى 2 شىلدەدە پاۆلوداردا دۇنيەگە كەلگەن. اباي اتىنداعى قازاق ۇلتتىق پەداگوگيكالىق ۋنيۆەرسيتەتىن اياقتاعان. "بولاشاق" باعدارلاماسى بويىنشا ۇلىبريتانياداعى نوتتينگەم ۋنيۆەرسيتەتىندە ماگيستر دارەجەسىن العان. ديپلومات مانسابىن 2002 جىلى سىرتقى ىستەر مينيسترلىگىندە باستاعان.
- 2008 جىلدان باستاپ پارلامەنت سەناتى پپپاراتى باسشىسىنىڭ كومەكشىسى قىزمەتىن اتقارعان، ال 2011 جىلدان باستاپ سەنات اپپاراتىنىڭ پارلامەنتارالىق بايلانىستار جانە حالىقارالىق ىنتىماقتاستىق ءبولىمى باستى كەڭەسشىسى بولعان.
- 2012 جىلدان باستاپ پرەزيدەنت اكىمشىلىگى جانىنداعى ستراتەگيالىق ازىرلەمەلەر مەن تالداۋ ورتالىعىنىڭ كەڭەسشىسى، 2013 جىلدان باستاپ پرەزيدەنت اكىمشىلىگىنىڭ سىرتقى بايلانىستار جانە حاتتاما ءبولىمىنىڭ مەڭگەرۋشى ورىنباسارى قىزمەتتەرىن اتقارعان.
- 2015 جىلدان باستاپ يسپانياداعى قازاقستان ەلشىلىگىندە كەڭەسشى جانە كەڭەسشى-ەلشى لاۋازىمدارىندا جۇمىس ىستەگەن.
- 2020 جىلدان باستاپ سىرتقى ىستەر مينيسترلىگىندە امەريكا دەپارتامەنتى ديرەكتورىنىڭ ورىنباسارى، كەيىنىرەك ەۋروپا دەپارتامەنتىنىڭ ديرەكتورى بولىپ قىزمەت اتقارعان.
