ماجىلىستە وتكەن ۇكىمەت ساعاتىندا ادىلەت ءمينيسترى ەرلان سارسەمبايەۆ اليمەنت تولەمدەرىنە قاتىستى وزەكتى ماسەلەلەرگە توقتالدى.

ءمينيستردىڭ ايتۋىنشا، اليمەنتتەر – كامەلەتكە تولماعان بالالاردىڭ قۇقىقتارىن قامتاماسىز ەتەتىن الەۋمەتتىك ماڭىزى جوعارى تولەمدەردىڭ ءبىرى.

جىل باسىندا ورىندالۋعا جاتاتىن 283 مىڭنان استام اتقارۋشىلىق قۇجات تىركەلسە، ونىڭ ىشىندە 12 835 ءىس (شامامەن 4%) اليمەنت تولەۋدەن جالتارعان بورىشكەرلەرگە قاتىستى بولىپ وتىر، - دەدى سارسەمبايەۆ.

مينيستر بۇل قۇجاتتار بويىنشا ماجبۇرلەپ ورىنداتۋ شارالارى قولدانىلاتىنىن جەتكىزدى.

ونىڭ ايتۋىنشا، اليمەنت ءوندىرۋ كەزىندە نەگىزگى كەدەرگى – بورىشكەرلەردىڭ تۇراقتى تابىسى مەن مۇلكىنىڭ بولماۋى. كەيبىر جاعدايلاردا ازاماتتار تابىستارىن ادەيى جاسىرۋ ارقىلى تولەمدەردەن جالتارىپ كەلەدى.

مينيسترلىك جۇمىسسىز بورىشكەرلەردى جۇمىسقا ورنالاستىرۋ بويىنشا جۇيەلى جۇمىس جۇرگىزىپ كەلەدى. ناتيجەسىندە سوڭعى جىلدارى بۇل كورسەتكىش ايتارلىقتاي ارتقان. ەگەر 2020 جىلى 1 559 ادام جۇمىسپەن قامتىلسا، 2024 جىلى بۇل سان 6 232-گە جەتكەن. 2024 جىلى اليمەنت تولەمەگەنى ءۇشىن 4 642 بورىشكەر اكىمشىلىك جاۋاپكەرشىلىككە تارتىلعان. سونىمەن قاتار، ق ر قىلمىستىق كودەكسىنىڭ 139-بابى بويىنشا 745 قىلمىستىق ءىس تىركەلىپ، 461 ءىس سوتقا جولدانعان. ناتيجەسىندە 391 بورىشكەر سوتتالعان، - دەپ ايتتى ەرلان سارسەمبايەۆ.

ءمينيستردىڭ ايتۋىنشا، بالالارىن اسىراۋعا نيەتتىڭ بولماۋى، اليمەنت تولەۋدەن جالتارۋ - وتباسىلىق-نەكە قاتىناستارى داعدارىسىنىڭسالدارى. 2023 جىلى ەلدە 61 080 اجىراسۋ تىركەلگەن، بۇل نەكە قيۋ سانىنىڭ (124 774) شامامەن جارتىسىنا جۋىق. ەرلان سارسەمبايەۆ وتباسى ينستيتۋتىن نىعايتۋ مەن بالالاردىڭ قۇقىقتارىن قورعاۋ باعىتىندا كەشەندى شارالار قاجەت ەكەنىن ايتتى.

ادىلەت مينيسترلىگى اليمەنت تولەمدەرىن ءوندىرۋ ماسەلەسىن ەرەكشە باقىلاۋدا ۇستايتىنىن جانە بۇل باعىتتاعى جۇمىستار جالعاسا بەرەتىنىن اتاپ ءوتتى.