اباي وبلىسىنىڭ ءۇرجار اۋدانىنان جول-كولىك وقيعاسىنان زارداپ شەككەن ەكى بالانى جەتكىزۋ ءۇشىن ۇلتتىق شۇعىل مەديسينانى ۇيلەستىرۋ ورتالىعىنىڭ (ءۇشمۇو) سانيتاريالىق اۆياسيا بورتى استانا قالاسىنا ۇشىپ شىقتى.
پاسيەنتتەردى استانا قالاسىنداعى №2 كوپ بەيىندى قالالىق بالالار اۋرۋحاناسىنا ەمدەۋگە جاتقىزۋ تۋرالى شەشىم قابىلداندى.
- بورتتا بالالارعا مەديسينالىق كومەك كورسەتۋ ءۇشىن ءۇشمۇو رەانيماتولوگى ە. شاقان، استانا قالاسىنىڭ №2 كوپ بەيىندى قالالىق بالالار اۋرۋحاناسىنىڭ تراۆماتولوگى ن. جاكيپوۆ جانە ۇلتتىق نەيروحيرۋرگيا ورتالىعىنىڭ (ۇنحو) نەيروحيرۋرگى س. سەيتبەكوۆ دارىگەرلەر بريگاداسى قۇرامى قالىپتاستىرىلدى، دەلىنگەن حابارلامادا.
وقيعا ورنىندا بىردەن اۋداندىق اۋرۋحانادا وبلىستىق جانە رەسپۋبليكالىق دەڭگەيدەگى مامانداردان قۇرىلعان مۋلتيتارتىپتىك بريگادا تولىق دياگنوستيكالىق زەرتتەۋ جۇرگىزىپ، زارداپ شەككەندەردىڭ جاعدايىنا باعالادى جانە جەدەل ەمدەۋ جوسپارىن جاسادى.
بالا جاعدايىنىڭ تۇراقسىزدىعى ەسكەرىلە وتىرىپ، پاسيەنتتەردىڭ ءبىرى – توعىز جاسار قىز بالا اباي وبلىسىنىڭ باس شتاتتان تىس انەستەزيولوگ-رەانيماتولوگى د. كاريموۆتىڭ باقىلاۋىمەن جاعدايى تۇراقتالعانعا دەيىن ستاسيوناردا قالدىرىلدى.
19 تامىزدا تاڭەرتەڭ ءۇرجار اۋدانىنىڭ بەستەرەك اۋىلىندا جانتۇرشىگەرلىك جول اپاتى بولدى. پوليسيا دەرەگىنشە، Toyota ماركالى اۆتوكولىكتى تىزگىندەگەن 55 جاستاعى جۇرگىزۋشى رولگە يە بولا الماي، جولدىڭ نەبارى ون مەتردەي جەرىندە تۇرعان بالالاردى قاعىپ كەتكەن. سونىڭ سالدارىنان ەكى بالا وقيعا ورنىندا كوز جۇمدى، تاعى بىرەۋى اۋرۋحاناعا بارار جولدا قايتىس بولدى. ءۇش بالا جانساقتاۋ بولىمىندە جاتىر.
