تەحنوكراتتى وركەنيەت كەڭ ءورىس الا باستاعان ءححى عاسىردىڭ وزىندە شىنايى رۋحاني ازىق ىزدەگەن جان نەگىزىنەن، ونى مادەني ورىنداردان تابارى انىق.
وسى ورايدا، اسىرەسە، كوپشىلىكتىڭ قاجەتىن قاناعاتتاندىرۋدا جەرگىلىكتى جەرلەردەگى مادەني وشاقتار ءوز جۇمىسىن قالاي ۇيىمداستىرىپ وتىر دەگەن ويمەن اتىراۋ وبلىستىق مادەني مەكەمەلەرىنىڭ جۇمىسىمەن تانىسقان ەدىك.
گۇلجاناي قالييەۆا، وبلىستىق كىتاپحانا باسشىسى:
وقىرمان سۇرانىسى قالتقىسىز ورىندالادى
– عابدوللا سلانوۆ اتىنداعى اتىراۋ وبلىستىق عىلىمي امبەباپ كىتاپحاناسى – ءار وقىرمان-پايدالانۋشىعا رەسپۋبليكالىق جانە الەمدىك اقپاراتتىق رەسۋرستارعا ەركىن شىعۋعا مۇمكىندىك بەرەتىن قابىلەتكە يە زاماناۋي اقپاراتتىق جانە وبلىستاعى 155 كوپشىلىك كىتاپحانانىڭ جۇمىسىن ۇيلەستىرۋشى ادىستەمەلىك ورتالىق. كىتاپحانادا 6 ءبولىم جۇمىس جاسايدى:
جەرگىلىكتى اقىن-جازۋشىلار كىتاپحانامەن تىعىز بايلانىستا. ولاردىڭ قاتارىنا كىتاپحانامىزدىڭ 40 جىلدان اسا ۋاقىت وقىرمانى بولىپ كەلە جاتقان اقىن، حالەل دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ پروفەسسورى قادىر ءجۇسىپ، جازۋشى-ولكەتانۋشىلار امانعالي ءامىرجان ۇلى، تولەگەن جاڭاباي ۇلى، وتەپبەرگەن الىمگەرەي ۇلى، مۇرات بەكتەنوۆ، اقىندار قازاقستان جازۋشىلار وداعىنىڭ اتىراۋ وبلىستىق فيليالىنىڭ ديرەكتورى قويشىعۇل جىلقىشييەۆ، جەڭىس ارونوۆ، ءومىرزاق قاجىمعالييەۆ، گۇلزادا نيەتقالييەۆا، ءاليا داۋلەتبايەۆا، باقىتگۇل باباش جانە تاعى باسقالاردى جاتقىزا الامىز. ولار كىتاپحانادا وتەتىن شارالارعا ۇنەمى قاتىسىپ، جارىققا شىققان كىتاپتارىنىڭ تۇساۋكەسەرلەرىن كىتاپحانادا وتكىزىپ، كىتاپ قورىنا سىيلاۋدى داستۇرگە اينالدىرعان.
«ونەگەلى ءومىر» سەرياسىمەن شىعاتىن بەلگىلى قوعام قايراتكەرلەرى تۋرالى، قازاق، ورىس اقىن-جازۋشىلارىنىڭ كوپتومدىق تاڭدامالى شىعارمالارى جانە تاعى دا باسقا ادەبيەتتەر ۇلكەن سۇرانىستا.
وقىرمان سۇرانىستارى بويىنشا ءبىزدىڭ كىتاپ قورىندا جوق كىتاپتارعا ەلىمىزدىڭ ۇلتتىق كىتاپحانا قورىنا سۇرانىس بەرىلىپ، «قۇجاتتاردى ەلەكتروندى جەتكىزۋ» قىزمەتى ارقىلى قاناعاتتاندىرىلادى. سۇرانىستاردى سكانەرلەپ، وقىرماننىڭ ەلەكتروندى پوشتاسىنا جىبەرۋ، فلەشكاعا كوشىرىپ بەرۋ، كوشىرمەگە ءتۇسىرۋ سياقتى قىزمەت تۇرلەرى كورسەتىلەءدى.
كىتاپحانامىزدا اتىن يەلەنىپ وتىرعان جازۋشى عابدوللا سلانوۆ شىعارمالارى مەن قورداعى سيرەك كىتاپتاردىڭ ەلەكتروندى كىتاپحاناسىن جاساقتاۋ ۇستىندەمىز.
كىتاپحانا – جالپىۇلتتىق يدەيامىز ماڭگىلىك ەلدى باستى باعدار ەتىپ، «قازاقستان – 2050» ستراتەگياسى: قالىپتاسقان مەملەكەتتىڭ جاڭا ساياسي باعىتى» جانە «نۇرلى جول» – بولاشاققا باستار جول»، ەلباسى نۇرسۇلتان نازاربايەۆتىڭ قازاقستان حالقىنا جولداۋلارىن، ەڭبەككە، ادال كاسىبي تابىسقا، وتانعا قىزمەت ەتۋگە، جوعارى پاتريوتتىق نيەتتەرگە وڭ كوزقاراستار قالىپتاستىراتىن وتاندىق الەۋمەتتىك مادەني ونىمدەردى جاڭعىرتۋدىڭ 2012 – 2016 جىلدارعا ارنالعان جوسپارىن بەكىتۋ تۋرالى ق ر ۇكىمەتىنىڭ 2012 جىلعى 31 تامىزداعى №1124 قاۋلىسى، ق ر ازاماتتارىنىڭ قۇقىقتىق مادەنيەت دەڭگەيىن ارتتىرۋدىڭ 2012 – 2014 جىلدارعا ارنالعان كەشەندى جوسپارى، قازاقستان رەسپۋبليكاسىندا ماتەريالدىق ەمەس مادەني مۇرانى قورعاۋ جانە دامىتۋ جونىندەگى تۇجىرىمداما تۋرالى ق ر ۇكىمەتىنىڭ 2013 جىلعى 29 ساۋىردەگى №408 قاۋلىسى جانە «مادەني مۇرا» ۇلتتىق جوباسىن ودان ءارى ىسكە اسىرۋ اياسىندا، ءوڭىردىڭ ۇلتتىق تاريحىن زەردەلەۋ، «سىبايلاس جەمقورلىققا، ناشاقورلىققا قارسى كۇرەس» باعدارلامالارى مەن ءىس-شارالار جوبالارىن باسشىلىققا الىپ، ءتۇرلى كوپشىلىك شارالار ءوتكىزىپ، سان الۋان تاقىرىپتاردا ۆيرتۋالدى بيبليوگرافيالىق شولۋلار جانە كىتاپتاردى اشىق قاراۋ كورمەلەرىن ۇيىمداستىرىپ كەلەدى.
«كىتاپ دەگەنىمىز – الدىڭعى ۇرپاقتىڭ ارتقى ۇرپاققا قالدىرعان رۋحاني وسيەتى. كىتاپ وقۋدان تىيىلساق، وي ويلاۋدان دا تىيىلار ەدىك». عابيت مۇسىرەپوۆ.
كىتاپحانا قالاداعى بارلىق جوعارى جانە ارناۋلى ورتا وقۋ ورىندارىمەن، مەكەمە، كاسىپورىندارمەن ەكىجاقتى كەلىسىمشارت نەگىزىندە تۇراقتى بايلانىستا جۇمىس جۇرگىزىپ وتىر. جەرگىلىكتى زيالى قاۋىم وكىلدەرى، ۇستازدار مەن ستۋدەنتتەر وتكىزىلەتىن كوپشىلىك شارالارعا ۇنەمى قاتىسادى. مەكەمە، كاسىپورىنداردىڭ سۇرانىسى بويىنشا كوشپەلى كىتاپ كورمەلەرى، شارالار وتكىزىلىپ تۇرادى.
بىلتىرعى جىلى ءداستۇرلى رەسپۋبليكالىق «ءبىر ەل – ءبىر كىتاپ» اكسياسى اياسىندا سايىن مۇراتبەكوۆتىڭ «جۋسان ءيىسى»، «باسىندا ءۇشقارانىڭ...» شىعارمالارى كىتاپحانا وقىرماندارىنىڭ اراسىندا قىزۋ تالقىلاندى.
وتكەن جىلى ق ر ۇلتتىق اكادەميالىق كىتاپحاناسىنىڭ 10 جىلدىعىن مەرەكەلەۋ شەڭبەرىندە ۇيىمداستىرعان «قازاقستاننىڭ ۇزدىك جىل كىتاپحاناشىسى»، «كىتاپحانا – كەمەل دوس»، «وقىرمان – ءبىزدىڭ دوسىمىز»، «كىتاپحانا تۋرالى ۇزدىك ەسسە» ۆيرتۋالدى بايقاۋى جانە ج.بەكتۇروۆ اتىنداعى قاراعاندى وبلىستىق جاسوسپىرىمدەر كىتاپحاناسى قاراعاندى قالاسىنىڭ 80 جىلدىعىنا وراي جاريالاعان «مەن تۇراتىن قالا» اتتى جاستاردىڭ حالىقارالىق ۆيرتۋالدى فوتوبايقاۋلارىنا كىتاپحانانىڭ ءجاسوسپىرىم وقىرماندارى بەلسەنە اتسالىستى.
ال بيىلعى جىل تاڭداۋى – قازاق حاندىعىنىڭ 550 جىل تولۋىنا وراي، حالقىمىزدىڭ رۋحاني ءداۋلەتىنە ەستەتيكالىق جاڭا بايلىق، مول قازىنا قوسىپ، ەلىنىڭ ماحابباتىنا بولەنگەن، دارابوز جازۋشى ءىلياس ەسەنبەرءليننىڭ «كوشپەندىلەر» شىعارماسى بولىپ تانىلدى. بۇل تۋرالى كىتاپحاناشى س.بايزاقوۆا د.نۇرپەيىسوۆا اتىنداعى اكادەميالىق قازاق حالىق وركەسترىنىڭ اتىراۋ قالاسى تۇرعىندارىنىڭ جايىق جاعالاۋىنداعى كەشكىلىك دەمالىس كەزىندە ۇيىمداستىرعان كونسەرتتىك شارالارىنىڭ الدىندا جۇرتشىلىقتى، اسىرەسە، جاستاردى كىتاپ وقۋعا شاقىرعان «ىمىرتتاعى وقۋ» شاراسى كەزىندە اقپارات بەرسە، كىتاپحاناشىلار ج.بايىمبەتوۆا ءى.ەسەنبەرليننىڭ «كوشپەندىلەر» تريلوگياسىنا توقتالىپ،
گ.قارابالييەۆا، ا.كۋلوۆا، ب.داۋلەتوۆالار جازۋشىنىڭ «كوشپەندىلەر» تريلوگياسىنىڭ «الماس قىلىش»، «جانتالاس»، «قاھار رومانى» بولىمدەرى تۋرالى ءاڭگىمەلەپ بەردى.
شارا سوڭىن بارلىعى ءبىر داۋىسپەن: «بارشاڭىزدى «ءبىر ەل – ءبىر كىتاپ» اكسياسى اياسىندا ءىلياس ەسەنبەرليننىڭ «كوشپەندىلەر» شىعارماسىن وقۋعا شاقىرامىز» دەپ كوتەرىڭكى داۋىسپەن جارناما جاسادى، وزگە كىتاپحاناشىلار سەرۋەندەپ جۇرگەن جاستارعا كىتاپحاناعا، كىتاپ وقۋعا شاقىرعان جارنامالىق بەتشەلەر تاراتتى.
كىتاپحانادا قازاق حاندىعىنىڭ 550 جىلدىعى، قازاقستان حالقى اسسامبلەياسىنىڭ 20 جىلدىعىمەن قاتار تويلانعان جەڭىستىڭ 70 جىلدىعىنا وراي كوپتەگەن شارالار جوسپارلانىپ، ۇيىمداستىرىلدى. مەرەكە قارساڭىندا باستالىپ كەتكەن شارالار ءالى دە جالعاسىن تابۋدا.
جەڭىستىڭ 70 جىلدىق مەرەكەسىنە وراي جىل باسىندا وبلىس كىتاپحانالارى وقىرماندارىنىڭ اراسىندا جەڭىس تاقىرىبىنا ارنالعان شىعارمالار جازۋدان بايقاۋ جاريالانعان بولاتىن. كىتاپحانا قورجىنىنا قالالىق، اۋداندىق، اۋىلدىق كىتاپحانالاردان 50 شىعارما كەلىپ ءتۇستى. سولاردىڭ اراسىنان بەسەۋى ۇزدىك، سونداي اق 10 وقىرماننىڭ شىعارماسى ىنتالاندىرۋ سىيلىعىنا لايىق دەپ تانىلدى. بۇل وقىرمانداردىڭ بارلىعىنا دا كىتاپحانا اتىنان ارنايى العىسحاتتار مەن سىيلىقتار تابىس ەتىلدى.
جاستار مەن ءجاسوسپىرىم وقىرمانداردى كىتاپ وقۋعا تارتۋدا كىتاپحانادا وتكىزىلىپ جاتقان شارالار جەتەرلىك.
جىل اياعىنا دەيىن اقىن-جازۋشى، مادەنيەت قايراتكەرى جەڭىس ارونوۆتىڭ 70 جاسقا تولۋىنا وراي «اق جەلەڭ ءداۋرەن، جايساڭ جىر» اتتى شىعارماشىلىق كەشى، بارد اقىن، كومپوزيتور تابىلدى دوسىموۆتىڭ تۋعانىنا 50 جىل تولۋىنا ارنالعان كىتاپحانالىق بلوگتاردىڭ وبلىستىق بايقاۋى جانە اقىن، ءانۇران اۆتورلارىنىڭ ءبىرى جۇمەكەن ناجىمەدەنوۆتىڭ تۋعانىنا 80 جىل تولۋىنا وراي، «تەرەڭىنە ءبىز جەتپەگەن جۇمەكەن» اتتى كوركەمسوز سايىسى وتەدى دەپ جوسپارلاپ وتىرمىز.
بيشىلەرى مىڭ بۇرالعان – «ءىنجۋ-مارجان»
اتارىۋ وبلىستىق نۇرمۇحان ءجانتورين اتىنداعى فيلارمونيانىڭ بي ءانسامبلى – «ءىنجۋ-مارجاننىڭ» ونەرىن تاماشالاعانداردىڭ سۇيسىنبەيتىنى كەمدە-كەم. مىڭ بۇرالعان سۇيكىمدى قىزدار ساحناعا شىققاننان كوپشىلىكتىڭ ىقىلاسپەن قول شاپالاقتاپ، قوشەمەتتەۋى تەكتەن-تەككە ەمەس. ول – شىنايى ونەرگە دەگەن قۇرمەتتەن تۋىنداعان كورەرمەننىڭ ىستىق ىقىلاسىنىڭ ءبىر بەلگىسى.
«ۇجىمعا 2013 جىلى وبلىستىق فيلارمونيانىڭ ديرەكتورى ءعادىل دۇيسەنعالييەۆتىڭ شاقىرۋىمەن كەلدىم. سودان بەرى ءبيشى قىزدارمەن تىعىز جۇمىس جاساۋدامىن» دەيدى ءانسامبلدىڭ جەتەكشىسى گۇلۆيرا قالىباي قىزى. «وسى جىلدىڭ مامىر ايىندا رەسەيدىڭ استراحان قالاسىندا وتكەن قازاق قوعامىنىڭ 20 جىلدىعىنا وراي مادەني شارالارعا قاتىسىپ، ونەر كورسەتتىك. ماۋسىم ايىندا شىمكەنت قالاسىندا وتكەن اتىراۋ وبلىسىنىڭ مادەني كۇندەرىنە، سونىمەن بىرگە شىلدە ايىندا استانا كۇنى مەرەكەسىنە قاتىستىق. جاقىندا عانا وبلىستىق فيلارمونيانىڭ «مۇراگەر» فولكلورلىق ءانسامبلىنىڭ ەسەپ بەرۋ كونسەرتىندە ونەر كورسەتسەك، قازان ايىندا وتكەن اباي كۇندەرىن «ەركەلەر» بيىمەن اشتىق. بىزدە بوس ۋاقىت دەگەن مۇلدەم جوق. مادەني شارالاردىڭ اراسىندا قىزۋ دايىندىقتار. دايىندىقتى بوساڭسىتۋعا ەش بولمايدى. ونەر سالعىرتتىقتى كوتەرمەيدى، اسىرەسە، بي ونەرى. سالقىن قاراساڭ بولدى، سىنى قاشادى» دەيدى جەتەكشى.
«ءىنجۋ-مارجان» ءانسامبلى – ەلىمىزدەگى ايتۋلى شارالاردى اتاپ ءوتۋ بارىسىندا وتكىزىلەتىن بارلىق مادەني شارالاردىڭ بەلسەندى قاتىسۋشىلارىنىڭ ءبىرى. ولار قازاق حاندىعىنىڭ 550 جىلدىعىنا وراي كورشى رەسەي ەلiنە دە ارنايى گاسترولدىك ساپارمەن بارىپ كەلدى. چەليابى وبلىسىنداعى ماگنيتوگورسك قالاسىنىڭ كورەرمەندەرىنە قازاق حالقىنىڭ سالت-داستۇرلەرىن بي تىلىمەن جەتكىزگەن بيشىلەردىڭ ونەرىنە ءتانتى بولماعاندار كەمدە-كەم. اسىرەسە، سوندا تۇراتىن قانداستارىمىز ەرەكشە العىس جاۋدىرىپتى.
«ءانسامبلدىڭ رەپەرتۋارى دا باي. 30-دان اسا ەلدىڭ ۇلتتىق بيلەرىن ناقىشىنا سالا ورىندايتىن ۇلبىرەگەن 12 قىز قاي حالىقتىڭ بولسا دا ءبيىن قاس-قاعىم ساتتە قاعىپ الادى. ءبارى شەتىنەن تالانتتى. قازىرگى تاڭدا ەرجان قيتاروۆ اعامىز جەتەكشىلىك ەتەتىن «مۇراگەر» فولكلورلىق بي انسامبلىمەن تىعىز بايلانىستامىز. جاڭا قويىلىمدارعا بىرلەسە وتىرىپ، جۇمىس جۇرگىزىپ جاتىرمىز. جاڭا قويىلىمدارعا جاڭا كوستيۋمدەر تىگىلىپ جاتىر. ءبارىن ۇيىمداستىرىپ، باعىت-باعدار بەرىپ، قاجەتتى زاتتارىمىزدى دەر كەزiندە تاۋىپ بەرۋگە ءاردايىم قامقورلىق تانىتىپ، قولعابىس جاسايتىن فيلارمونيا ديرەكتورى ءعادىل دۇيسەنعالييەۆتىڭ ەڭبەگى ەرەن ەكەنىن ەرەكشە اتاپ وتكىم كەلەدى» دەيدى گۇلۆيرا تۇراقبايەۆا.
«ءىنجۋ-مارجان» – ەلىمىزدەن تىس جەرلەرگە گاسترولدىك ساپارلارمەن شىعىپ، قازاق ونەرىن پاش ەتۋدە دە ايتارلىقتاي ۇلەس قوسىپ جۇرگەن توپتاردىڭ ءبىرى. وتكەن جىلدىڭ قازان ايىندا ۋفادا وتكەن دوستىق پەن ىنتىماقتاستىق فەستيۆالىندە حورەوگرافيا جانرىندا ونەر كورسەتسە، جەلتوقسان ايىندا قازاقستان ەلشىلىگىنىڭ شاقىرۋىمەن ەلىمىزدىڭ تاۋەلسىزدىگىنە وراي كاتاردا وتكىزىلگەن مادەني شارالارعا قاتىسىپ قايتىپتى.
«قايدا ونەر كورسەتسەك تە سان قىرلى قازاقتىڭ بي ونەرىن، قازاق مادەنيەتىن كوپشىلىككە تانىستىرۋ – باستى ماقساتىمىز. سول جولدا تىنباي ەڭبەكتەنە بەرەتىن بولامىز. كورەرمەنگە قىزمەت ەتۋدەن جالىقپايمىز. ول – ءبىز ءۇشىن ۇلكەن جاۋاپكەرشىلىك ءارى ماقتانىش» دەيدى بيشىلەر ءانسامبلىنىڭ جەتەكشىسى گۇلۆيرا تۇراقبايەۆا.
كۇمىس كومەي ءانشى – گۇلمايدان
گۇلمايدان سۇندەتوۆا – ەلىمىزگە تانىمال ءانشى. كەزىندە «كەرەكۋدiڭ مايراسى» اتانعان كۇمىس كومەي ءانشى اقىن سارا ءرولىن سومداپ، كورەرمەندى تالانتىمەن ءتانتى ەتكەن ناعىز دارىن يەسى. ول – بۇل كۇندەرى اتىراۋ وبلىستىق نۇرمۇحان ءجانتورين اتىنداعى فيلارمونيانىڭ بەلدى ءانشىسى.
«اتىراۋ – تۋعان جەرىم، وسكەن ەلىم. ءانشى رەتىندە جەر جانناتى جەتىسۋدا تانىلىپ، كوپشىلىكتىڭ ىقىلاسىنا بولەنگەن رۋحانياتتىڭ ورداسى الماتى – كىمگە بولسا دا قانات بىتىرەتىن، شەبەرلىگىنىڭ شىڭدالۋىنا دەم بەرەتىن قۇتتى مەكەن. جالپى، ناعىز ونەر ادامى ءۇشىن ەڭ باستىسى – كورەرمەن ىقىلاسى. ول – ونەر يەسىنە ەرەكشە كۇش-قۋات سىيلايتىن، تىلمەن ايتىپ جەتكىزە المايتىن ءبىر قۇدىرەت. بۇل رەتتە اتىراۋلىقتار شىنايى ونەردى شىن جۇرەكتەن باعالايتىن تالعامپازدىعىمەن كىمدى دە بولسا تاڭعالدىرماق» دەيدى گۇلمايدان.
وبلىستىق فيلارمونيانىڭ قۇرامىندا وبلىستىڭ تۇكپىر-تۇكپىرىن تۇگەل ارالاپ شىقتى دەسە دە بولعانداي. گۇلمايدان قاندايدا ءبىر اكىمدىك تاراپىنان وتكىزىلەتىن مەرەكەلىك شارالاردىڭ بەل ورتاسىنان تابىلادى ءاردايىم. ول ءۇشىن سىلتاۋ ايتىپ، سىرت قالۋ دەگەن مۇلدەم جوق.
– كونسەرتتەرگە قاتىسقاننان ونەر ادامى قوسىمشا كۇش الادى عوي. يگى جاقسىلاردى، ونەر دەسە ىشكەن اسىن جەرگە قويار كوپشىلىكتى كورىپ، كوڭىلىڭ مارقايادى. ونىڭ ءبارى ادامعا جاڭاشا ءبىر رۋحاني سەرپىن بەرەدى. تاماشا اسەردەن ارىلا الماي، سول اسەردىڭ جالعاسا بەرۋىن قالاعان سايىن، كەلەسى ءبىر ساپارعا قۇلشىنا دايىندىققا كىرىسەسىڭ.
بيىل استانادا وتكەن قازاق حاندىعىنىڭ 550 جىلدىعىنا قاتىستىم. عاجاپ! قازاق حاندىعىنىڭ 550 جىلدىعى تامىرىن تىم تەرەڭنەن تارتاتىن ەل تاريحىنىڭ ءبىر بۇتاعى عوي. باتىر بابالارىمىزدىڭ قايتپاس قاھارماندىعى مەن ۇلتىن ۇيىستىرا بىلگەن حانداردىڭ كەمەڭگەر قاسيەتى قانداي داۋىردە ءومىر سۇرسەك تە، ۇرپاق ءۇشىن وشپەس ونەگە. قازاق حاندىعىنىڭ 550 جىلدىعى «بىرلىك بار دا، تىرلىك باردىڭ» ناقتى كورىنىسى. بۇگىنگى ۇرپاقتىڭ باستى پارىزى – ءوزىنىڭ ادال ىسىمەن، ءار سالادا قولىنان كەلگەنشە بابالار سالعان داڭعىل جولدى لايىقتى جالعاستىرۋعا ۇلەس قوسۋ دەپ بىلەمىن. سوندىقتان دا ونەر ارقىلى حالقىمنىڭ ۇلىلىعىن پاش ەتۋگە، ەل مەن ەلدى جاقىنداستىرا تۇسۋگە بارىنشا اتسالىسۋعا تىرىسامىن. قازاق حاندىعىنىڭ 550 جىلدىعىنا بايلانىستى وبلىس كولەمىندە وتكەن ءىس-شارالاردىڭ دا بەل ورتاسىنان كورىندىم. يساتاي اۋدانىنىڭ قۇرمەتتى ازاماتى اتاندىم.
ەلىمىزدە كوشباسشىمىز نۇرسۇلتان نازاربايەۆتىڭ باستاماسىمەن ىسكە اسىرىلىپ جاتقان ۇلان-عايىر يگىلىكتى ىستەردىڭ ءبارى دە ۇلت بولاشاعى، تاۋەلسىزدىك تۋى بيىكتەن جەلبىرەي بەرۋى جولىنداعى قولعا الىنعان يگى شارالار عوي. رەسپۋبليكامىزدىڭ وركەنيەت كوشىندە ايشىقتى ورىن يەلەنۋى جولىندا ءبارىمىز ءبىر كىسىدەي جۇمىلا كىرىسسەك، الىنبايتىن اسۋ، كەدەرگى بولار قورعان قالماسى انىق. سوعان ۇلى دالانىڭ ءبىر پەرزەنتى، ونەر يەسى رەتىندە ءوز ۇلەسىمدى قوسقانىمدى ماقتان تۇتامىن» دەيدى ءانشى ءارى سازگەر، قازاقستان رەسپۋبليكاسىنىڭ مادەنيەت قايراتكەرى گۇلمايدان سۇندەتوۆا.
"قامشى"سىلتەيدى
دەرەككوز: "ايقىن-اقپارات"
پىكىر قالدىرۋ