Keshe Eńbekshiqazaq aýdanyndaǵy «Qazaqstan» aýylyna jol túsken. Sonda Shaımurat aqsaqaldyń balasy Almaspen sóılesip otyrǵanymyzda aýyldyń joǵarǵy taý jaǵy túgel qorshalyp alynǵanyn aıtty: «Jaılaýǵa shyǵatyn tóte jol jabyldy. Jaılaýǵa barý úshin endi Teskensýdiń ústi arqyly onshaqty shaqyrym aınalyp jetý kerek. Jaqyndaǵandardy kúzetshileri kirgizbeı «Atamyz!» dep qorqytady. Másimovtyń ákesi deı me bireý taý etegin menshiktep alypty. Sodan bul jaqtyń halqy óte ashynyp otyr».

Bul derekke meniń esh kúmánim joq. Shynymen de Alataýdyń búkil baýraıyn, Qazaqstannyń nebir shuraıly jerlerin dókeıler on myń gektarlap bólip alǵan. Ata-babalarymyz Qazaq jerin búgingi latıfýndıser kókparǵa salsyn dep qorǵap qalǵan joq. Bılik ádil bolsa – halyqtyń ıesi, al halyq qashan da – jerdiń ıesi.

Sondyqtan B.Saǵyntaevtyń tóraǵalyǵymen eldegi jer reformasyna qatysty zańnamalyq aktilerdi qarap, daýly máseleniń túıinin sheshýge tıis komısıanyń aldaǵy otyrystarynda Jer kodeksine qatysty jerdi satý men jalǵa berýdi toqtatyp qana qoımaı, buǵan deıin latıfýndıserge (jermen tikeleı ózderi aınalyspaıtyndarǵa, olıgarhtarǵa, bılik kastasyna) berilip ketken Qazaq jeri túgeldeı memleket menshigine qaıtarylýǵa tıis! Mundaı jerler korrýpsıalyq sqemalarmen menshiktelgenine halyqtyń esh kúmáni joq. Jer problemasy ary qaraı asa mańyzdy másele retinde Konstıtýsıaǵa sáıkes referendým jolymen sheshilgeni durys.

Oǵan deıin Jer daýyn basý úshin osyndaı «nýlevoı varıant» eki jaqqa da tıimdi. Óıtkeni, mundaı qadam asa yqtımal bolyp turǵan áleýmettik silkinistiń aldyn alady, halyqtyń kernegen ashý-yzasyn tómendetedi. Bılik latıfýndıserdiń múddesin emes osylaı halyqtyń múddesin qorǵasa ǵana azdy-kópti abyroıyn saqtap qalady.

Marat Toqashbaevtyń «Feısbýktegi» paraqshasynan alyndy