Ońtústik Qazaqstan oblysyndaǵy Tólebı aýdanyna qarasty Qasqasý aýylynyń joǵary jaǵynda, taýdyń dál eteginde «Saıram – Ógem» ulttyq tabıǵı parki ornalasqan. Ol jerdiń tabıǵaty tamasha, qarasań kóz tartarlyq, - dep habarlaıdy Qamshy.kz Zamana basylymyna silteme jasap.

Sarqyrap aqqan bulaǵy, saf aýasy, jaıqalǵan jasyl jelegin kórip, tańdaı qaqpaıtyn adam joq shyǵar. Bul ólkeni Qazaqstannyń Shveısarıasy dese de jarasady.

Mine, dál osy erekshe qorǵalatyn aımaqtyń biraz bóligine, naqtyraq aıtsaq, 13,5 gektar jerge osydan birneshe jyl buryn Birikken Arab Ámirlikteriniń ataqty sheıhyna ar­nal­ǵan demalys aımaǵy salynypty degen sóz taraǵan. Taıaýda  atalmysh ólkedegi «Saıram – Ógem» ulttyq tabıǵı parkiniń ishinen arabtar­ǵa arnap salynǵan demalys aımaǵy turǵan jerge  gazet tilshileri baryp qaıtty.

"Eki taýdyń qaq ortasynda, «Saıram» shyńyna shyǵar jerdiń jolyn jaýyp alǵan demalys aımaǵy ıt tumsyǵyn suǵa almaıtyndaı etip qorshaýǵa alynǵan. «Kirý úshin «East weast company LTD» degen mekemeden arnaıy ruqsat alý kerek», – dedi esik aldynda turǵan kúzetshiler. Degenmen biz onda dál qazirgi ýaqytta kimder demalyp jatqanyn, jalpy, demalys aımaǵynyń qandaı ekenin sol óńirde turatyn, ishinde ne bop jatqanyn bes saýsaqtaı biletin bir azamattan surap aldyq", - dep jazady basylym tilshisi.

«Bul jerde búginde tórt úndi azamaty jatyr. Olar – sheıhtiń qyzmetshileri. Iaǵnı olardyń mindeti – osy demalys aımaǵyn aınadaı etip taza ustaý. Sol úshin olarǵa aı saıyn 1 myń dollar kóleminde jalaqy tólenedi. Al kire berisindegi qaqpada ózimizdiń qazaq jigitteri jumys isteıdi. Vahtalyq ádispen kezek aýysatyn kúzetshilerge aıy­na 35 myń teńgeden jalaqy tólenedi.

Al endi demalys aımaǵynyń ishi týraly aıtar bolsam, onda 7-8 kotej bar. Eń úlkeni, eki qabattysy sheıhtiki. Qalǵandary qyzmetshilerge arnap salyn­ǵ­an. Sondaı-aq jattyǵý zaly, asqana men kólik turaǵyna arnap salyn­ǵan ǵımarat ta bar.

Onyń ishinde sý jańa 4 «Lend Krýzer» jıpi jáne taý basyna shyǵýǵa arnalǵan kishigirim kólikter tur. Álgi kólikterdi jarytyp eshkim minbeıdi de, degenmen jylyna bir ret Shymkentten bir kólik jón­deýshi kelip, álgilerdiń bárin tek­serip, maıyn aýystyryp ketedi», – dedi ol.

Arab sheıhy bul demalys aımaǵyna sońǵy ret Shymkenttiń «Bekjan» bazarynyń janynan salynǵan ortalyq meshittiń ashylý saltanatyna kelgende bas suqqan eken. Degenmen jylyna bir ret, kúzge qaraı sheıhtiń týystary ma, álde qyzmetshileri me, áıteýir topyrlaǵan arab kelip, demalyp ketedi eken. Muny bizge sol mańdaǵy Keńes­aryq aýylynyń turǵyny Temirhan Ásenov aıtyp berdi.

«Bul jer negizinde orman sharýashylyǵyna qaraıtyn jer edi, – deıdi Ásenov. – Jeti-segiz jyldyń kólemi bolyp qaldy, arabtarǵa arnalǵan demalys aımaǵy salynyp, turǵyndardyń taýdy emin-erkin aralaýyna kedergi keltirip jatyr. Iaǵnı taýdyń eń bıik jeri – «Saıram» shyńyna shyǵý úshin osy jerdi arabtarǵa jalǵa bergen fırmadan ruqsat alý kerek eken. Menińshe, arabtar bul aımaqqa bekerden-bekerge qyzyǵyp otyrǵan joq. Kúzdi­gúni, qustar qaıtqan tusta ıtelgi ustaıtyn sıaqty. Áıtpese munda olarǵa bas­qa ne kerek?

Bul jer arabtar qorshap alǵanǵa deıin «Alteks» degen sporttyq saýyqtyrý lageri edi. Sol zamandarda oblystyq dene shynyqtyrý jáne sport basqarmasynyń joldamasymen elimizge tanymal sportshylar kelip, osynda demalatyn. Qazir ol dáýren kelmeske ketti».

Qysqasy, tabıǵaty tamasha, kórki kóz tartatyn Qasqasýdyń eń shyraıly da shuraıly jeri búginde arabtarǵa arnalǵan demalys aımaǵyna aınalyp ketipti. Ol jerge syrttan barǵan demalýshylar túgili, sol óńirde týyp-ósken jandardyń óziniń kirýine atymen ruqsat joq.

Jergilikti halyqtyń ishteı narazylyǵyn týǵyzyp otyrǵan bul qorshaýly aımaq keleshekte qasqasýlyqtarǵa qaıtaryla ma, joq álde túbinde arabtardyń menshigine ótip kete me, bul týraly ázirge eshkim eshteńe aıta almaıdy.