Astanadaǵy Ortalyq komýnıkasıalar qyzmetinde taıaýda ótken  brıfıńte Din isteri jáne azamattyq qoǵam mınıstri Nurlan Ermekbaevtyń din salasyndaǵy ýákiletti organnyń negizgi ustanymdary men memlekettiń din salasyndaǵy saıasatynyń basym baǵyttary týraly aıtqan oılaryna  qatysty Astana qalasyndaǵy «Sheıh Kýnta qajy» meshitiniń naıb ımamy Sábıt Erejepovtiń pikirin suraǵan edik.

Saıasılanǵan din máselesin memleket sheshedi

Biz din salasynda júrgendikten, jýyrda qurylǵan mınıstrliktiń árbir minberde aıtylǵan tujyrym-pikirlerin nazardan tys qaldyrmaýǵa tyrysamyz. 14 qazanda Ortalyq komýnıkasıalar qyzmetinde ótken brıfıńte Din isteri jáne azamattyq qoǵam mınıstri Nurlan Ermekbaev baıandama jasap, sáláfızmge qatysty da pikirlerin ortaǵa salǵan bolatyn. Sanada mynadaı aqjoltaı pikiri qaldy: «Bizdiń ary qaraıǵy jumysymyz sáláfızm ıdeologıasyn nasıhattaıtyn ádebıetter men ınternet-saıttardyń taralýyna jol bermeýge baǵyttalady». Árıne buǵan deıin osy baǵyttaǵy jumystar jasalmady demeımiz. Dese de olardyń arasynda keıbir saıttar ulttyq dástúrdi, sportty jáne taǵy basqa da ultqa qajetti dúnıelerdi nasıhattap otyrǵan túr tanytyp, óz ıdeologıalaryn astyrtyn júzege asyra berdi. Qaqpanyn qar astyna qurǵan mundaı ınternet resýrstardy qatań baqylaý kerek. Olar qarjy kózin qaıdan alyp otyr? Bas «ıdeologtary» kim? Anyqtasaq... Biz, áýeli, túri qazaq, tini «kázzáp» sáláfılik aqparattyq ekspansıanyń zardaptaryn joıýymyz kerek, taralý joldaryna tosqaýyl qoıýǵa tıispiz. Osyndaı ótkir suraqtar tur aldymyzda...

Din taqyrybyn tereń zerttegen ǵulamalardyń deni «ár nárseniń aqıqaty – sol obektıvtiń orta tusynda dep jatatyny bar. Bizdiń qoǵam din salasynda osyndaı bel ortaǵa kelgen sekildi. El táýelsizdik alǵan jyldardan beri biz zaıyrly memleket bolýǵa basymdyq berdik. Biraq qoǵamdy demokratıalyq ári mádenıetti jolmen damytatyn mundaı tamasha múmkindikti pıǵyly zymıandyqpen jymdasqan aǵymdar da óz paıdasyna asyryp baqty. Kóptegen jyl «bas aýrýymyzǵa» aınalyp keldi. Bul dinı daý-damaı da emes, ǵylymı tartys ta emes. Islam tarıhynda mundaı rýhanı qaıshylyqtar buǵan deıin  bolǵan. Ol jasyryn emes. Halıfattar arasynda, áýletter arasynda da boldy. Olar ǵalymdardyń aldynda sheshimin taýyp, bitisip otyrdy. Ári pikir jańaryp, rýhanı túleý paıda boldy. Al búgingi álemdegi jaıt, sonyń ishinde Qazaqstandaǵy jaǵdaı odan góri saıasılanǵan másele dep oılaımyz, sondyqtan da bul máseleni memlekettiń qolǵa alýy – quptarlyq jaǵdaı.

Túıin. Saıyp kelgende, elimizdegi dinı ahýaldyń qanshalyqty deńgeıde ýshyqqanyn, ne qalypqa túskenin baǵamdap otyrǵan dintanýshylar eń bastysy jańa vedomstvonyń qurylǵanyna qýanyshty ekenin bildirse, onyń túpki astarynda el ishin búlinshilikke alyp keletin máselelerdiń aldyn alýǵa yqpaldy saıasattyń ornaıtynynan úmitti. «Eki qoldyń sesi baryn» bir maqsatqa jumylǵanda ǵana ańǵarýǵa bolar...