Ál-Farabı atyndaǵy Qazaq ulttyq ýnıversıtetinde «Konstıtýsıalyq reforma: Uly dala memlekettiliginiń jańa belesi» taqyrybynda dóńgelek ústel ótti. Ýnıversıtettiń jetekshi tarıhshylary, quqyqtanýshylary men ǵalymdary eldegi aýqymdy saıası ózgeristerdi tarıhı mura men ulttyq biregeılik turǵysynan talqylady. 
     Sharany ashqan tarıh fakúltetiniń dekany Dosbol Baıǵonaqov qazirgi reformalardyń elimizdiń bolashaǵy úshin mańyzdylyǵyn erekshe atap ótti. Ol Memleket basshysynyń bastamasymen júzege asyrylyp jatqan reformalardyń adamǵa baǵyttalǵan basqarý modeliniń aınasy ekenin atap ótti. «Biz, tarıhshylar, úshin bul reformalar erekshe mánge ıe: bul – Uly dala memlekettiliginiń tarıhı sabaqtastyǵyn zań júzinde bekitýdiń jańa kezeńi jáne ádiletti Qazaqstan qurý jolyndaǵy berik quqyqtyq negiz. Búgin qabyldanatyn sheshimder erteńgi tarıhtyń ózegine aınalady», – dedi Dosbol Baıǵonaqov.
      Qatysýshylar demokratıalyq ınstıtýttardyń evolúsıasyna erekshe nazar aýdardy. Profesor Bereket Káribaev baıandamasynda ejelgi dástúrler men qazirgi zaman arasyndaǵy uqsastyqtardy keltirdi. Onyń pikirinshe, Uly dala demokratıalyq dástúrleri ejelgi dalalyq zańdardan bastaý alyp, qazirgi Konstıtýsıada logıkalyq jalǵasyn tabady, bul memlekettik qurylymnyń turaqtylyǵyn qamtamasyz etedi.
    Profesor Amanjol Qalysh halyq ókildiginiń ınstıtýttaryn jańǵyrtý máselesine toqtaldy. Ol konstıtýsıalyq ózgerister aıasynda Ulttyq quryltaıdyń jańa mártebege ıe bolǵanyn erekshe atap ótti. Spıkerdiń aıtýynsha, jańa Konstıtýsıadaǵy Kuryltaıdyń orny men róli memlekettiń qoǵamdy konsolıdasıalaýǵa jáne mańyzdy saıası sheshimder qabyldaýda halyqtyń pikirin eskerýge degen umtylysyn kórsetedi.
     Kezdesý barysynda sondaı-aq «Alash» qozǵalysy qaıratkerleriniń konstıtýsıalyq ıdeıalary men «Ádiletti Qazaqstan» tujyrymdamasynyń úndestigi talqylandy. Qatysýshylardyń pikirinshe, qazirgi konstıtýsıalyq reforma bılik tarmaqtary arasyndaǵy tepe-teńdikti kúsheıtip qana qoımaı, memleket pen azamattar arasyndaǵy ózara senimge negizdelgen jańa qoǵamdyq kelisim qalyptastyrady.
 
 Ál-Farabı atyndaǵy QazUÝ-dyń Baspasóz qyzmeti