Monǵolıadaǵy etnıkalyq qazaq, búrkitshi qyz Aısholpan týraly «Búrkitshi qyz» fılmi Oskarǵa usynylmaq, dep habarlaıdy «Qamshy» portaly Egemen Qazaqstanǵa silteme jasap.

Bári búrkitshilikke tánti ataqty amerıkalyq rejıser Otto Belldiń ızraıldik fotograf Asher Svıdenskı túsirgen Aısholpannyń sýretin kórgen kezden bastalypty. Sol sátte oǵan Aısholpan týraly fılmniń ıdeıasy keledi.

Eki jylǵa sozylǵan jumys aıaqtalyp, Otto Bell «Búrkitshi qyz» (The Eagle Huntress) derekti fılmin qazan aıynda kópshiliktiń nazaryna usyndy. Fılm Nú-Iork pen Los-Andjeles kınoteatrlarynda 28 qazannan kórsetile bastady. Bir jarym saǵattyq týyn­dy aǵylshynsha jáne keıip­kerlerdiń sózi sýbtıtrlermen berilgen.

Búrkitpen ań aýlaý er adamnyń isi sanalatyny jaıly estigen fılm avtorlary aýyl aqsaqaldaryna baryp, bul jaıdyń mánin suraǵan. Sonymen qatar, Otto Bell dástúrdi bil­meıtin kórermen durys túsin­beı qalýy múmkin degen oımen ańshylyqtyń keı kórinisterin qysqartqanyn aıtqan.

Fılmniń prodúseri ári dybystaýshysy «Juldyzdy soǵys» («Zvezdnye voıny») aktrısasy Deızı Rıdlı boldy. Otto Bell Business Insider portalyna bergen suhbatynda Rıdlıdiń Aısholpannyń oqı­ǵasyna erekshe tolqyǵanyn aıtqan. Deadline basylymyna bergen suhbatta Deızı ózi de: «Aısholpannyń oqıǵasy maǵan erekshe áser etti. Sondyqtan osy fılmniń bir qatysýshysy bolǵym keldi. Jobaǵa qatysqanymdy maqtan etemin», – dedi.

Fılmdi Latyn Amerıkasy, Jańa Zelandıa, Germanıa, Aýs­tralıa men Azıada kórsetý qu­qyǵy Sony kompanıasyna tıesili. 20th Century Fox Animation kartınaǵa remeık túsirý týraly kelisózder júr­gizip jatyr. Biraq bul ıdeıany júzege asyrý úshin Sony Pictures kompanıasynyń kelisimi kerek. Ekeýi básekeles bolǵandyqtan, ázirge bolashaǵy belgisiz. Derekti fılm negizinde anımasıalyq fılm jasaý quqyǵy 2 mıllıon dollarǵa baǵalanyp otyr. Bul quqyq aıasyna, sondaı-aq, álemniń birqatar elderine taratý múmkindigi de kiredi.

Aısholpan qazir Baıan-Ólgıı qalasyndaǵy Mońǵol-Túrik kol­ledjinde 10-synypta oqıdy.

1 qarasha kúni «Qazaqstandyq búrkitshi qyz» dep maqala jarıalaǵan «New York Times» eki kúnnen keıin qateleskenderin jazyp, Mońǵolıada turatyn qazaq qyzy ekenin aıtyp, túzetý jarıalady. Fılm týraly basqa da álemdik BAQ jazyp jatyr. Keıbiri Aısholpandy «ǵasyrlar dástúrin boıyna sińirgen arý» atady.

Aısholpandy uıań, názik ári batyr qyz degen North West Herald amerıkalyq basylymy «Bul fılm kórermendi Aı­sholpannyń álemine aparady. Aısholpan óskende dáriger bolýdy armandaıdy. Biraq búrkit­shilikti tastaǵysy kel­meıdi. «Búrkit­shi qyz» – jastarǵa shabyt beretin, áserli peızajymen júrekterge jylý beretin fılm» dep jazdy.

Daily News «Mońǵolıanyń batysyndaǵy Altaı taýlarynda túsirilgen fılm búrkitpen saıatshylyq jasaý dástúrin kórsetedi. Bul kóshpendi qazaq­tardyń urpaqtan urpaqqa mura etip kele jatqan óneri. Aısholpan – osy dástúrdi meńgergen erekshe qyz» dep jazdy.

Aıta keteıik, Otto Bell «Búrkitshi qyzdy» «Oskarǵa» usynǵaly otyr.