Krıs Gardner kishkentaı balasymen birge qoǵamdyq dárethanalarda túnep júrgeninde ol óziniń ómiri jaıly oqıǵa gollıvýdtyq fılmderdiń basty sherýine aınalady dep oılamaq túgili túsine de kirmegen edi.

   Bul 1980 jyldardyń basy bolatyn. Gardner myrza 27 jasynda kishkentaı ulymen birge San-Fransısko qalasynda jyl boıy úısiz qańǵyp júrgen kezi. Deldaldarǵa tóleýge de qarjysy jetpeı, úı jaldaýǵa shamasy jetpeıtin edi. Sondyqtan olar ár jerde túneýge májbúr bolǵan. Temir jol beketterindegi dárethanalar, parkter, shirkeýler, jumys ornyndaǵy ústelder – onyń «jatyn bólmesi» bolatyn. Olar tek sorpamen tamaqtanyp júrdi, ózi jumys isteý úshin aqshasynyń az bóligin balasyn balabaqshaǵa berýge jumsaıtyn.

   Jolyndaǵy taýqymetterge qaramastan Gardner myrza jumysynda tabysqa jetti. Fırmasynda taǵylymdamadan ótý kezeńinde, aksıalar men úlesterdi satý barysynda Dın Vıtter Reınolds (DWR) ony shtattyq qyzmetke jumysqa alady. Aqyry jaldanǵan páterge qoly jetken onyń tasy órge domalaı tústi. Qyzmetinde tez kóterilip, 1987 jyly ol óziniń ınvestısıalyq fırmasyn ashty. Búgingi kúni Gardner 62 jasta. Baılyǵy 60 mıllıon dollarǵa baǵalanyp otyr. Motıvasıalyq orator retinde áıelderge qarsy kúsh kórsetý máseleleri jóninde organızasıalar men úısiz adamdarǵa demeýshilik jasap, dúnıe júzin sharlap júr. Gardner myrzanyń balalyq shaǵy da aýyrtpalyqqa toly boldy. DWR-ǵa jumysqa turmastan buryn túrmede qyzmet etken. Óziniń «V pogone za schastem» avtobıografıasyn jazǵan kezde Gollıvýdtyń ne sebepti qyzyǵýshylyq tanytqanyn túsiný qıyn emes. Fılm 2006 jyly osy atpen jaryqqa shyqty. Ýıll Smıt Gardner myrzany somdaǵany úshin «eń úzdik erkek róli» nomınasıasy boıynsha Oskar aldy.

   Ótkenge kóz júgirte otyryp, Gardner myrza «ómirinen eshteńeni ózgertpegen bolar edim» dedi BBC-ǵa bergen suhbatynda.

   «Men bala kezimnen bastap, kóptegen aýyrtpalyqtardan óttim. Bes jasymda meniń balalarym ákeleriniń kim ekenin biletin bolady dep sheshim qabyldaǵanmyn». Vıskonsın shtatyndaǵy Mılýokıda týylǵan Gardner myrza óziniń bıologıalyq ákesi kim ekenin eshqashan bilmegen. Ol Bettı Jan esimdi anasymen jáne fızıkalyq qysym kórip kelgen, maskúnem ógeı ákesiniń qolynda kedeıshiliktiń ashshy dámin tatyp, er jetti. Anasy serigine ashýlanyp, óltirmek bolǵan kezde, kishkentaı Gadnerdiń balalar úıinde ótkizgen kezderi de bolǵan. Balalyq shaǵyndaǵy keleńsizdikterge qaramastan, anasy ol úshin shabyttandyrýshy adam bolǵanyn aıtady. Eskiliktiń adamy bolǵan analardyń ishinde meniń bir-aq anam boldy, ol únemi ulyna: «Balam, seniń qolyńnan bári keledi jáne óziń kim bolǵyń kelse de, neni qalasań da, óz qolyńda» dep aıtyp otyratyn. Bir kúni bala kezimde teledıdardan kolejdiń basketbol oıynyn kórip otyrǵan bolatynmyn. Oıynshylardyń biri mıllıon dollar tabys tabatynyn habarlady. Meniń anam: «Balam, kúnderdiń bir kúninde sen de mıllıon dollar tabatyn bolasyń», – dedi. Anam aıtpaǵanǵa deıin meniń oıyma kirip shyqpaǵan edi.

   Mıllıon dollar birden kele salmady, ol AQSH-tyń áskerı-teńiz flotynda tórt jylyn ótkizdi. 1974 jyly San-Fransıskoǵa qonys aýdarǵannan keıin medısınalyq jabdyqtar satýmen aınalysty. Onyń ómiri qyzyl Ferrarı kóligin turaqqa qoıyp jatqan adamdy keziktirgende tolyqtaı ózgerdi. Gardner myrza odan mundaı ómirge jetý úshin ne istegenin surady. Ol Bob Brıjes esimdi deldal bolatyn. Ekeýi áńgimelesip ketkennen keıin Gardner myrza ındýstrıaǵa qyzyǵýshylyq bildirdi. Olar taǵy da kezdesip, Brıjes myrza Gardner myrzaǵa praktıka úshin ıntervúdi qamtamasyz etetin bolyp kelisti. Biraq, ıntervúǵa birer kún qalǵanda, turaq talondaryn tólemegeni úshin túrmege qamaldy. Aqyr sońynda ıntervú jasaldy, biraq ony túrmege qamalǵan kezindegi jılet pen krosovkı kıimimen jasaýǵa týra kelgen. Qaljyraǵan túrine qaramastan onyń qulshynysy men yntasy jumysqa qol jetkizýine ábden jetetin. Fılm jaryqqa shyqqan soń alty jyldan keıin 2012 jyly Gardner myrzanyń ómiri taǵy da ózgeristerge ushyrady, áıeli 55 jasynda qaterli isikten kóz jumdy. Bul jaǵdaı ony qarjy salasyndaǵy tabysty otyz jyldan keıin, ómirden neni qalaıtynyn qaıta qaraýǵa túrtki boldy. Karerasyn tolyqtaı ózgertýge bel býady.

   «Áıelimmen bolǵan sońǵy áńgimelerdiń birinde onyń maǵan aıtqany: «Ómirdiń qanshalyqty qysqa bolatynyn kóre alǵan sátte, qalǵan ǵumyryńda ne istemekshisiń?»

 «Ómirińizdi ózgertetin áńgime bolǵan kezde, men aıtar edim, eger jan dúnıeńiz qalaǵan isińizben aınalyspasańyz, siz ózińizdi kún saıyn qaýip-qaterge qoıasyz» Ol endigi ınvestısıalyq-bank qyzmetterimen aınalysqysy kelmeıtinin túsingen boıda ózin motıvasıalyq orator men avtor retinde tanytty. Qazirgi ýaqytta ol jyldyń 200 kúnin 50-den astam eldi aralap, aýdıtorıalarda sóz sóıleýmen ótkizedi.

 «Morningstar» ınvestısıalyq fırmanyń dırektory Skott Berns Gardner myrzany «rýhy myqty, tańǵajaıyp adamnyń beınesi» dep baǵa bergen.

Aýdarǵan: Maral Shaıhy