«Qamshy» portaly Mal satýmen aınalysatyn aǵaıyndy úsh azamat Jarqynbek Doldanuly, Muqıat Zarlyhanuly men Qadylbek Álimhanulynyń ólimi týrasyndaǵy ispen oqyrmandaryn úzdiksiz aqparattandyrǵan edi. "Qamshy" portaly Marqumdardyń biri Qadylbek Álimhanulynyń aǵasy Qamet Ajdardyń inisine arnaýyn nazarlaryńyzǵa usynady.

 (İnim Qadylbek Álimhanulynyń qazasyna arnaımyn)

Sen kettiń otyz toǵyz órkenińde,

Baǵyńnyń baýy jasyl kórkeminde.

Jazyqsyz, qapıada qandyqoldar,

Janyńdy baılady ajal jelkenine.

Sógildi qabyrǵasy dúıim eldiń ,

Óreskel is boldy jurt kúıinetin.

Mezgilsiz úsh arystyń kúni bitip,

Údetti júregimniń kúıik otyn.

Kún kúıip , aı tutyldy aspanymda,

Taý qulap, tas mujylyp asqarymda.

Attanǵan arman qýyp azamattar,

Armany jetkendeı bop bastaryna.

Aramdyq arandady tilekterdi ,

Taptady adal nıet júrekterdi.

Qaskóıdiń qany buzyq qastandyǵy,

Abaısyz biriktirdi bilekterdi.

Bolsa da jurt tilegi amal bolmaı,

Máńgige kóz jumdyńdar aman bolmaı.

Aýyldyń irgesinde áspensidi,

Qanisher áshkereleıtin adam bolmaı.

Zań bar ma, zań atqarar adam qandaı?!

Kóńilde kúdik qaldy baǵamdalmaı .

Merezi jemqorlyq dendep alǵan,

Qaıran el tómendedi baǵań nardaı.

Ketpediń aılar boıy sen esimnen,

Keńesem baısal tulǵa elesińmen.

Ekeýmiz qulyn-taıdaı tel ósip ek,

İzdedi týǵan jeriń seni ósirgen .

İzdedi týǵan halqyń tuǵyryńda ,

Tasbastaý qanyp ishken tunyǵyń da.

Jylady Qarashoqy - qart anamyz,

Kinásiz arandalǵan qylyǵyńa .

Jylady sher kókirek atalarda,

Egildi qam kóńildi analarda .

Tuńǵyıyq aına kóliń joqtaý aıtyp,

Azaly áýen qaldy jaǵalaýda.

Qımady bul sumdyqqa qurbylaryń,

(Mezgilsiz óshirgen-aı tún shyraǵyn ).

Ańdamaı arandalǵan ajalyńa,

Ne deıin bosaǵanda "kún shyraǵym" .

Kóristiń mehnatpen kúlip kúnde,

Bulańdap aldaǵan-aı úmittiń de.

Otanym, Atajurtym dep júrgende,

Qyrshynyń qıylaryn bilippiz be ?!

İzdedi ádildikti tursyn aǵań ,

Shyndyqty tappaı qóńil tynshymaǵan.

Jazyqsyz qan tógilip jatsa qyrda,

Aıyrmaı aq-qarany kim shydaǵan.

Kúsh saldy erkin baýyryń, adal aǵań ,

Kúdikti seıiltýge qaýmalaǵan .

Qandy qol tabylsa da amal qansha,

kóńilde kóp suraqtar mazalaǵan .

Premer kóńil bóldi úkimetpen,

Sóz sóılep Qalmuhambet jyly leppen.

Ulyqtar tekteımiz dep nıet etip ,

Joıyldy qaraqshylar kúni bitken.

Ótken kún kórgen túske aınalama,

júrekke máńgi dert bop baılana ma?!

Bir mınýt keter emes kókeıimnen ,

Kinásiz atylǵanyń aıdalada .

Qosh, qosh, kosh kóńilimdi jubataıyn ,

Artymnan ergen inim quba taıym .

Elim dep izdep kelgen en daladan,

Qas nadan atyp ketti quralaıyn .

Qosh deıin, qosh aǵaıyn jylamaıyn,

Kóńilde kem bolǵandaı bir araıym !!!

Aqqýy atylǵanmen ýa Dárıǵa-aı,

Tolqytyp baryp-baryp tunar aıdyn,

Qosh deıin qaıǵyrsam da qulamaıyn.

Qamet Ajdar

2016 jyl, 22jeltoqsan.