Polshadaǵy Vroslav aýrýhanasynyń dárigerleri týmasynan qolsyz týylǵan erkekke alǵash ret qol salyp, otanyń sátti ótkendigin málimdedi dep habarlaıdy vesti.ru , málimettiń qazaqsha nusqasyn «Qamshy» portaly oqyrman nazaryna usynady.

32 jastaǵy Pótr týmasynan qoly joq bolǵan. Oǵan kóz jumǵan donordyń qolyn alyp salǵan.

«Mundaı bir múshesi joq adamǵa óz denesiniń bólshegindeı etip jasalǵan ota álemde birinshi ret bolyp otyr», - dep málimdedi hırýrgtardyń basshysy Adam Domanasevıch.

Ota óte kúrdeli bolǵandyqtan 13 saǵatqa sozylǵan. Bul ýaqyttyń ishinde dárigerler kóz jumǵan donordyń qolyn alyp, ony emdelýshiniń denesine laıyqtap qoıǵan da, tıtandyq shtıftarmen súıegin jalǵap, bulshyqetterin, tamyrlaryn tigip qoıǵan.

Donordyń qolyndaǵy qanaınalymdy retteý barysynda ondaǵy qantamyrlary da ósip-jetilýi tıis.

Degenmen, oń nátıjeler baıqalyp jatyr, ota jasaǵannan soń bir aptadan keıin Pótr saýsaqtaryn qımyldatqan: bas barmaǵyn tolyqqandy maıystyryp, qalǵan saýsaqtaryn da aqyryndap qozǵaltýda.

«Alaıda, jańadan salynǵan qoldyń emdelýshige eki túrli másele týyndatýy múmkin: Qoldy salǵan jerdiń súıekteri durys damymaǵan, qantamyrlarynyń sany jetkiliksiz jáne de júıke júıesi men bulshyqetteri álsiz bolǵan; sonymen qatar jańa qoldyń basqarylýy adamnyń mııyna túsiniksiz bolýy múmkin», - dep málimdedi Domanasevıch.

Onyń aıtýynsha, ota shynymen de sátti ótti dep aıtý úshin keminde alty aı kerek eken. Eger, emdelýshi eki qolymen de birdeı jumys istep, ekeýin birdeı basqara alsa, onda transplantasıa sátti boldy dep aıtýǵa bolady.

Aıta keter bolsaq, adamǵa bir dene múshesin transplantasıa arqyly salyp berý úshin ol múshesinen oqysta aıyrylyp qalǵan bolý kerek, al týmasynan bir dene múshesi joq bolsa, onda ony salý osy ýaqytqa deıin múmkin bolmaǵan. Ásirese, eger adam jasqa kelip qalǵan eresek bolsa.

Hırýrgtardyń aıtýynsha, Pótrge jasalǵan otanyń sátti shyqqany kóp adamǵa úmit otyn syılaıdy.