Sońǵy on kún kóleminde eldiń ishi-syrtynda Qazaqstanǵa qatysty saıası salmaǵy úlken sózder aıtyldy. Elbasynyń kıeli Ulytaý tórinde bergen suhbatyn estip, serpilip qalǵan qazaqtyń kóńilin ótken aptanyń jumasynda Reseı prezıdenti aıtqan «qazaqta «Qazaqstanǵa» deıin eshqandaı memleket bolmaǵan» degen sózi qaýipke jeteledi. Reseıdiń 10 ret ótip jatqan «Selıger» jastar forýmynda tilshi suraǵyna jaýap beregen RF basshysy qazaqtardyń ótken tarıhyn tutastaı joqqa shyǵaryp, qazaq halqyn ashyq kózge ilmeı otyrsa, osy eldiń LDPR partıasynyń jetekshisi, qazaqqa aty ábden tanys Jırınovskıı tipti «qazaqtarǵa qazirgi jerdi orys áskerleri alyp bergen» dep saldy. Onyń aıtýynsha qazaq dalasynan Jońǵarlardy orystar qýyp tastapty, biz daıynǵa ıe bolyp otyr ekenbiz. Osy tusta orys tildi basylymdar Nazarbaevtyń «Ulytaýdaǵy suhbatyn» ózderinshe «qajetke jaratyp», til máselesi Qazaqstandy Ýkraınadaǵy jaǵdaıǵa jetkizýi múmkin degendi jarysa basty. Sondaı-aq «Táýelsizdikke nuqsany bar bolsa Qazaqstan EAEO-dan shyǵady» degen Elbasynyń sózin jurtshylyqqa jaǵymsyz keıipte usynyp jatty, bul shyndyǵynda odaq shartynyń bir tarmaǵy ǵana.
Osynyń bári Qazaqstanǵa jasalyp jatqan ashyq aqparattyq soǵystar edi jáne bul soǵysty múddeli toptar qazaq bıliginde otyrǵan keıbir adamdardyń qolymen jasap otyr. Osyǵan deıin «Qazaqstannyń terıtorıalyq tutastyǵyn» buzý týraly sóz aıtqandar qatań jazaǵa tartylatyn zań qabyldanǵan. Solaı bola tura Taıshybekv sıaqtylar «Qazaqstan Reseıdiń bir gýbernıasy bolsa eken» dep «qurbandyq» shalyp júrse, kóktemgi jeńis merekesi qarsańynda Oralda, Pavlodarda, Qostanaıda, Soltústik Qazaqstan oblystarynda Reseı týyn kóterip parad ótkizgen, Reseıdiń týyn jelbiretip, qala ishinde kólik kortejin júrgizgender kóptep kezikti. Qaraǵandy da bir top orystyń kempir-shaly «Reseıde» ómir súrgisi keletinin aıtyp pıket ótkizip júrse, keıbir orys tildi basylymdar qaıta-qaıta «tehnıkalyq qatelikterge» jol berip, birde Óskemendi, birde Soltústik Qazaqstandy Reseıge qosylýdy qalaıdy dep jazyp tastady. Bul jaǵdaılar týraly «Qamshy», «Abaı» sıaqty birneshe qazaq saıty másele kóterip jazǵanymen, olarǵa baǵanaǵy aıtqan qatal zańnyń esh áseri bolmady. Jırınovskıı ýaqyt ótken saıyn ımperıalyq arannyń adal quly bolyp, Qazaqstanǵa aýzyn ashyp, oıyna kelgenin aıtýdy jalǵastyrsa, endi kórshi eldiń álem narazylyǵyna ushyrap otyrǵan prezıdenti «Qazaqta memleket joq» dedi, tarıhty joqqa shyǵardy, tarıhymyzdy moıyndamaǵany – táýelsizdigimizdi kózge ilmegeni.
Ýkraınanyń aýyr halin Qazaqstan da keshýi múmkin be? Árıne múmkin, eger biz aqparattyq shabýyldarǵa tótep bere bilmesek, qıturqy aqparattarǵa arandalyp qalmasaq jáne Elbasynyń ózi aıtqan «biz Ýkraınadaǵy jaǵdaıdan sabaq alýymyz kerek» degen sózge mán bermesek. Ekonomıkamyz aıtarlyqtaı táýeldi Reseımen at quıryǵyn kesisip ketýimiz múmkin emes árıne, biraq ta bıliginiń basynda otyrǵan adamdarynyń ózi shovınısik pikir ustanatyn, Ýkraına sıaqty baýyrlas halqynyń terıtorıasyna ashyqtan ashyq qol suqqan, ózge eldi óz tilinde sóıletkisi keletin Reseıden aıaq tartyp, irge bóletin kez jetti. Ol qazaq bıliginiń ǵana emes Qazaqstan halqynyń da moınyndaǵy júk. Sebebi bizdiń eń úlken baılyǵymyz táýelsizdik. Prezıdent ylǵı da beıbitshilik pen turaqtylyqty aıtady. Ózge elden góri Máskeýge kóp ushatyn Prezıdent Pýtınnan keletin qaýipti siz ben bizden góri jaqsy biletini anyq, endeshe Elbasy odan shyǵar joldy da biledi. Al bizdiń mindet - alaýyzdyqtan arylýda bolmaq.
Nurǵalı Nurtaı
