Mundaı jaǵdaı barlyq adamdardyń basynan ótedi – sen bireýge shyn júregińmen yqylas bildiresiń, al ol senen keri aınalyp ketedi. Adamdar bir-biriniń jaqsy isterin kórgisi kelmeıdi, al eger bireýge shyn nıetińmen kómekteskiń kelse, ol seniń janyńdy jaralaıdy. Mundaı jaǵdaıda ózimizge «Meniń ne jazyǵym bar? Men neni durys jasamadym?» degen sıaqty suraqtar qoıamyz. Nege, rasymen de, barlyǵy osylaı? Buǵan jaýapty myna bir ańyzdan tabýǵa bolady.
Bir kúni egde tartqan kisiniń úıine kózi jasqa tolǵan boıjetken kelip, esigin qaǵady da qart kisige ishindegi syryn aqtarady.
– Men ary qaraı qalaı ómir súretinimdi bilmeımin... – dep sóıledi daýysy dirildep. – Ómir boıy adamdardyń maǵan qalaı qaraǵanyn qalasam, men de olarǵa sondaı qarym-qatynas jasaıtynmyn. Qolymnan kelgenshe barlyǵyna kómek kórsetip, jaqsylyq jasaýǵa tyrysatynmyn, al qaıtarymyna eshnárse suramaıtyn edim. Men munyń barlyǵyn shyn kóńilimmen jasadym, alaıda meniń aınalamdaǵylardyń barlyǵy meni mazaqtap, tek jamandyq jasaýmen boldy. Bul nárse meniń janyma ábden batty, men sharshap kettim... Jalynamyn, maǵan ne isteý kerektigin aıtyńyzshy.
Egde tartqan dana kisi úndemesten tyńdap otyrdy da, qyzǵa bylaı dep aqyl aıtty
– Tyr jalańash sheshin de, qalanyń kóshelerimen júrip ót, - dep salmaqty daýyspen sóıledi.
– Keshirińiz, men ondaı dárejege deıin túsken emespin... Sizdiń esińiz aýysqan sekildi me áldi qaljyńdap tursyz ba? Eger men olaı isteıtin bolsam kóshede júrgender men jaıly ne oılaıdy?.. Bireý maǵan zorlyq kórsetip, ar-uıatymdy taptasa qaıtemin?..
Dana kisi ornynan turdy da, esikti ashyp, ústeldiń ústine aınany ákelip qoıdy.
– Sen kóshede tánińdi jalańashtap júrýge uıalasyń da, myna esik sekildi ashyq-jarqyn janyńmen álemdi kezip júrýge uıalmaısyń ba?! Júregińnen kez kelgen adamǵa oryn beresiń. Seniń janyń – bul aına, sol sebepti de basqa adamdarǵa qarap ózimizdi kóremiz. Olardyń jany jamandyq men zulymdyqqa toly, sol sebepti de seniń pák janyńa qaraǵanda olar ózderiniń usqynsyz túrlerin kóredi. Seniń olardan álde qaıda jaqsy, myqty ekendigińdi moıyndaýǵa olaryń batyly men aqyly jetpeıdi. Bul nárse tek batyl adamdardyń qolynan keledi...
– Endi men istesem bolady? Bul jaǵdaıdy men qalaı ózgerte alamyn? – dep surady boıjetken.
– Menimen beri júr, men saǵan bir nárse kórseteıin... Mynaý meniń baqsham. Myna jaıqalyp turǵan gúlderge jyldar boıy sý quıyp, olarǵa qarap kelemin. Ómirimde eshqashan da gúl búrshiginiń qulaǵanyn kórmeppin. Meniń kórgenim tek osy gúlderdiń jaıqalyp óskeni, bular ózderiniń hosh ıisteri men sulýlyǵymen álemdi tańqaldyryp keledi. Adamdar tabıǵattan úırenýi kerek. Myna ǵajap gúlderge qara da, osylardan úlgi al – adamdarǵa júregińniń kiltin olar baıqamaıtyndaı abaılap ash. Jaqsy adamdarǵa ǵana jaqsylyq jasa. Seniń kúltelerińdi julyp, aıaqtarymen taptaıtyndardan aýlaq júr. Olar seniń dárejeńe deıin jete almaǵan aram shópter sekildi, sol sebepti de biz olarǵa eshqandaı da kómek kórsete almaımyz. Saǵan qarap olar tek ózderiniń usqynsyz túrlerin ǵana kóredi...
