Bul týraly QR Investısıalar jáne damý mınıstri Jeńis Qasymbek feısbýktegi paraqshasynda jarıalady.

“Búgin ujymǵa Qazaqstan Respýblıkasy Investısıalar jáne damý Birinshi vıse-mınıstri bolyp taǵaıyndalǵan Alık Aıdarbaevty tanystyrdym.

Alık Aıdarbaev memlekettiń mańyzdy salalarynda qyzmet atqaryp kele jatqan asa tájirıbeli tulǵa. Elbasynyń senimine ıe bolǵan myqty uıymdastyrýshy, isker basshy retinde ózin Mańǵystaý oblysynyń ákimi bolyp turǵanda jáne oǵan deıingi qyzmetterinde jan-jaqty kórsetken edi. Endigi rette Alık Serikulyn taǵy da úlken jumystar, jańa mindetter kútip tur.   Asa tájirıbeli mamannyń kelýimen mınıstrlik jumysy odan ári jandanyp, Memleket basshysy men Úkimet júktegen mindetterdi oıdaǵydaı atqaramyz degen senimdemin” deıdi mınıstr.

Ómirbaıany

Alık Serikuly Aıdarbaev 1963 jyly 19 mamyrda Almaty oblysynda dúnıege kelgen. V.Lenın atyndaǵy Qazaq polıtehnıkalyq ınstıtýtyn bitirgen. 1985 jyldan beri munaıgaz salasynda jumys isteıdi. Munaıgaz óndirisinde kásibı damýdyń barlyq satylarynan ótti, aǵa geolog, keıinnen tehnolog, munaı jáne gaz óndirý sheberi, «Mańǵyshlaqmunaı» ÓB, «Jetibaımunaı» MGÓB munaı jáne gaz óndirý sehy bastyǵynyń orynbasary qyzmetterin atqardy. Árjyldary «Ońtústikqazmunaıgaz» óndiristik birlestiginde basshylyq qyzmetter atqardy. «Torǵaı Petroleým» jáne «Mańǵystaýmunaıgaz» AQ bas dırektory qyzmetterin atqardy. 2011 jyldyń sáýirinen beri – «QazMunaıGaz» Ulttyq kompanıasy» AQ barlaý jáne óndirý jónindegi basqarýshy dırektory. 2011 jyldyń mamyrynda Dırektorlar keńesiniń kezekten tys otyrysynda Dırektorlar keńesiniń tóraǵasy bolyp saılandy. 2011 jyldyń jeltoqsanynda «QazMunaıGaz» Barlaý Óndirý» aksıonerlik qoǵamynyń bas dırektory.. 2013 jyldan 2017 jylǵa deıin Mańǵystaý oblysynyń ákimi boldy. «Qurmet», «Parasat» ordenderimen marapattalǵan.