Basqa túspegen jan bilmeıdi, al «qashaq ákeniń»  qorlyǵy «kókek shesheden» bir kem emes. Týǵan balasyna kómek berýden qashyp, qara basynyń qamyn ǵana oılap boı tasalap júrgen erkekter az emes. Buryn «bir aýyldy bir ózi asyraıdy» degen azamattar ózinen týǵan baýyr eti balasyna tıyn-tebenin tóleı almaı qashyp júrse, ondaıǵa ne aıtýǵa bolady? Jýyrda Májilistegi Halyqtyq komýnıser partıasy fraksıasynyń bastamasymen osy másele talqylandy. Jınalysty júrgizip otyrǵan depýtat Aıqyn Qońyrovtyń málimetine qaraǵanda búgingi kúni elimizde 300 myń balanyń qashaq ákelerden óndire almaǵan alımentiniń somasy 2 mlrd. teńgege jetipti. Ony qalaı óndirýge bolady degen suraqqa depýtattar aqyldasa kelip, basqa elderdegideı memlekettik alıment qoryn qurý kerek dep sheshti. Sóıtip, tiri jetimder alımentti ókimetten alsyn, al ókimet alımentti qashaqtan óndirip alsyn degen tujyrym aıtyldy. Shynynda qoly uzyn, neshetúrli rychagtary bar memleket jesir áıel men tiri jetim balaǵa qaraǵanda áldeqaıda qaýqarly emes pe? Endeshe alımentti qashaqtan ózi óndirsin degen sheshimge kelgen jıyn usynysty úkimetke joldady. Buǵan Úkeń ne aıtar eken?

S.Eleý, sarapshy