Oqıǵa Avstralıalyq jigittiń birinshi kýrsta oqyp júrgen kezinde bolǵan. Odan bir jyl buryn ata-anasy qaıtys boldy, jaqsy kóretin ıtinen aıyryldy. Bir aptanyń ishinde eki márte kólik apatyna ushyrady. Oryn alǵan jaǵdaılardyń bári jigitke kóp nárseni túsinýge septigin tıgizdi. Jigit óz-ózine suraqtar qoıa bastaıdy. Ómirdiń máni ne? Ómirge kelgendegi maqsatym ne? Tańerteń ne úshin turamyn? Ne úshin ómir súrip júrmin? Osylaısha, ómirdiń máni týraly oılanýǵa kóshedi, fılosofıalyq, ádebı, sondaı-aq dinı kitaptardy oqýdy bastaıdy. Dinı kitaptar oqyp júrip, Hrıstıan dini jaıynda estip-biledi, sol dindi qabyldaıdy.

Alaıda, ár túrli túsinikterge senetin hrıstıandyqtar jigittiń kóńiline kúdik uıalatady. Býdda dini jaıynda zerttep kóredi. Jany joq músinderge tabynatyn býddalyqtarǵa qarap jigittiń jany taǵy rahat tappaıdy.

Endi ne ister ekem dep júrgende dostarynan ıslam dini jaıynda estıdi. Alaıda, at tonyn ala qashady. Islam degende kóz aldyna terrorıster, jaýyzdar, adam óltirgishter elestegen. Biraq sonda da dinderdi zerttep júrgendikten musylman qaýym qulshylyq qylatyn Lıvannyń meshitine kiredi.

Musylman zańdarynan habary joq jigit meshit ishine aıaq kıimimen kirip ketedi, namaz oqyp otyrǵandyrdyń aldyn kesip, sájdege jyǵylǵandardy attap ótedi. Sóıtip, sol meshittiń ishinde bir uzyn saqaldy adammen tanysady. Sol sátten bastap ómiri ózgeredi. Terrorıst, jaýyz dep oılap júrgen lıvandyq musylmandar jigitke jyly shyraı tanytyp, jaqsy qarsy alady. Toqash pen sháıǵa ábden toıdyrady. Bul jaǵdaıdan soń jigit meshitke kelýin jıiletedi. Sháımen toqash jegen unap qalǵan bolý kerek.

Sondaı bir kúni, ózin mazalap júrgen suraqty musylmandarǵa da qoıyp kórdi. Din qyzmetkerleri esh irkilmesten qolyna Quran kitabyn usyndy. Barlyq suraqtardyń jaýabyn sol kitaptan tabatynyn aıtty. Jigit suraq qoıa berdi, din qyzmetkerleri jaýap berýden esh sharshamady. Jigit qoıǵan suraqtardyń jaýaptary Quranda boldy. Qurandy oqyp júrip, jigit adamdardyń óz oılaryn surady. Alaıda, olar Qurannyń sózi turǵanda bizdiń oıymyzdy ne qylmaqsyń dedi. Sóıtip, Qurandy oqı bastaıdy.

Bir ýaqytta jigit tylsym kúshti sezingisi keledi. Jazdyń bir keshinde aınalasyna qarap turyp, tabıǵattyń ǵajap kórinisin kózi shalady. Buryn sońdy baıqamaǵandaı. Bári kózine tańǵajaıyp dúnıedeı kórindi. Islamǵa aıaq basýyna jaqyn qaldy. Tek bir nárse jetpedi. Ǵajap kórinis emes, bir tylsym kúshtiń bolǵanyn qalady. Naızaǵaı jarq etse, qus ushyp ótse... Biraq kútken belgisi bolmady.

Únjyrǵasy túsken jigit qolyna Qurandy alyp, ári qaraı oqı bastaıdy. Ǵajap! Bar belgi Quranda jazylǵan. «Sender úshin túndi, kúndizdi jarattym, ári aı, juldyzdar da onyń ámirine baǵynyshty. Shyn máninde oılanǵan qaýym úshin álbette belgiler bar».

Iá, rasynda, aınalanyń bári adam úshin belgi, dálel, bárin Alla jaratqan. Buǵan kózi jetken ol ıslamdy qabyldaýǵa sheshedi.

Bir kúni meshitke barsa, meshit ishinde myńǵa jýyq adam júr. Ramazan aıy eken. Namaz bitken soń adamdardyń bári bir-birin qushaqtap, Ramazanmen quttyqtaı bastady. Ondaıdy buryn kórmegendikten tańdanysyn jasyrmady. Islamnyń qaı jaǵynan da eń keremet din ekenine kózi jetti.

Islamǵa deıin múldem basqasha bolǵan jigittiń qazirgi túrinen nur tógilip turǵandaı.