Qytaıdaǵy qazaq dárigeri Jasarat Jáleluly tabany 17  jyl boıy jerge tımegen Alhar esimdi jigitti aıaqqa turǵyzǵan. Taǵy bir eńbektep kelgen kisiniń eńsesin túzepti. Naýqastyń ózi qalaı júrip ketkenin aıtyp qýanyp tur. Birneshe jyl buryn synǵan qolyna qaıta ota jasatýǵa kelgen azamatqa ózge dárigerler «aıaǵyn kesemiz» degen. Al Jasarat dáriger naýqastyń qaraıa bastaǵan súıegin aman alyp qalǵan. Qazir qýanyshtan sekirip oınap júr. 

Bul – Almaty-Úrimshi saparynda suhbat alǵan Jasarat Jálelulynyń aldyna em izdep barǵan naýqastardyń qysqasha oqıǵasy. Osydan 11 jyl buryn Qytaıdaǵy qazaq dárigeri týraly “Qamshy” portaly kólemdi materıal ázirlegen edi. Áli kúnge deıin Jasarat dárigerdi izdeıtin oqyrmandarymyzdyń  ótinishin arqalap, Qytaıǵa qaıta bardyq. 

Jasarat Jáleluly – zamanaýı medısınaǵa birneshe emdeý tásilin engizgen  bilikti dáriger. Onyń keıbir ádisi Amerıkada patenttelgen. Ol kıiz úı formaldy ota jasaý, qazaqy saptama etikpen ókshe taramysynyń úzilýin pyshaq tıgizbeı emdeý sekildi medısınalyq tyń ádis-tásilderdi oılap tapqan. Budan bólek urshyǵy shyqqan balalardy gıpsqa baılamastan óz-ózinen emdelýine múmkindik beretin taǵy bir qural shyǵarǵan. 

Baıqasańyz, Jasarat Jálelulynyń medısınaǵa engizgen ár tásilinen qazaqtyń ıisi shyǵyp turady. Zaman damyǵan saıyn izdenýin toqtatpaǵan Qytaıdaǵy qazaq dárigeri týraly arnaıy reportajdy siltemege ótip kórińizder.