Soltústik Koreıa Japonıanyń ıadrolyq qarý ıelený nıetine qatań eskertý jasady.

Soltústik Koreıa Japonıanyń ıadrolyq qarý ıelený áreketin «kez kelgen jolmen toqtatý qajet» dep málimdedi.

Phenánnyń bul ustanymy Japonıa premer-mınıstri keńsesindegi bir sheneýniktiń «Tokıo ıadrolyq qarýǵa ıe bolýy tıis» degen sózine jaýap retinde aıtyldy. Bul týraly Soltústik Koreıanyń memlekettik KCNA agenttigi habarlady.

Soltústik Koreıa Syrtqy ister mınıstrligine qarasty Japonıany zertteý ınstıtýtynyń dırektory Japonıanyń mundaı málimdemeleri kezdeısoq nemese jaýapsyz aıtylǵan sóz emes, kerisinshe eldiń «uzaq jyldan bergi ıadrolyq qarýlaný nıetin» aıqyn kórsetedi dep baǵalady. Onyń aıtýynsha, Japonıanyń ıadrolyq qarýlar týraly qaǵıdalaryn qaıta qaraýy aımaqtyq qaýipsizdikke tikeleı qater tóndiredi. Alaıda Soltústik Koreıa málimdemesinde óziniń ıadrolyq baǵdarlamasy týraly aıtylmady.

Phenán ókili Japonıanyń ıadrolyq qarýǵa ıe bolýy Azıa elderi úshin aýyr saldarǵa ákelip, búkil adamzatqa qaýip tóndirýi múmkin ekenin aıtty. Soltústik Koreıa tarapy muny «qyzyl syzyqtan ótý» dep atap, Tokıonyń áreketterin qatań synǵa aldy.

Soltústik Koreıalyq BAQ bul pikirler AQSH-tyń Ońtústik Koreıaǵa ıadrolyq qýatpen júretin sýasty qaıyǵyn salýǵa ruqsat berýinen keıin aıtylǵanyn atap ótti. AQSH prezıdenti Donald Tramp Seýlge mundaı ruqsatty Ońtústik Koreıa prezıdenti Lı Dje Mónmen ótken kezdesý barysynda bergen.

Degenmen Soltústik Koreıa málimdemesinde Phenánniń ıadrolyq baǵdarlamasy týraly sóz qozǵamady. Phenán buǵan deıin de ıadrolyq qarýdan bas tartpaıtynyn birneshe ret málimdegen. Qyrkúıekte BUU minberinde sóılegen Soltústik Koreıanyń vıse-syrtqy ister mınıstri Kım Son Gón ıadrolyq qarý eldiń memlekettik saıasaty men egemen quqyǵy ekenin aıtyp, bul ustanymnan eshqashan bas tartpaıtynyn jetkizgen edi.