Búginde halyqtyń mádenıetin arttyryp, óser urpaqty ultjandylyqqa tárbıelep, ulttyq ónerimizdi dáriptep otyrǵan oblys kólemindegi mádenıet, arhıv mekemeleriniń sany 2000 jyldary 40-qa jýyq bolsa, búgingi kúni 546-ǵa jetip otyr. Bul týraly Óńirlik komýnıkasıalar qyzmetinde ótken brıfıńte Jambyl oblysy ákimdigi mádenıet, muraǵattar jáne qujattama basqarmasynyń basshysy Dúısenaly Byqybaev málimdedi dep habarlaıdy qamshy.kz.

Spıkerdiń málimetine súıensek, 2016 jyly josparlanǵan sharalar oryndalyp, kózdelgen maqsatty ındıkatorlarǵa qol jetkizildi.

Mádenıet salasyna bólingen qarjy kólemi 4,7 mlrd. teńgeni qurap, búdjet qarajaty 100%-ǵa ıgerildi.

2016 jyly «Jumyspen qamtý – 2020 jol kartasy» baǵdarlamasy aıasynda 242 mln. 317 myń teńgege 29 mádenıet nysany kúrdeli jáne aǵymdaǵy jóndeýden ótti. Jalpy alǵanda 2009 jyldan beri «Jol kartasy» ınvestısıalyq jobasy men «Jumyspen qamtý – 2020 jol kartasy» baǵdarlamasy aıasynda 3 mlrd. 331,5 mln. teńgege oblys kóleminde 249 nysan kúrdeli jáne aǵymdaǵy jóndeýden ótti.

«Tarıhı mura – baǵa jetpes qazyna» - deıdi dana halqymyz. Sondyqtan kıeli murany saqtaý, keler urpaqqa jetkizý – bizdiń basty paryzymyz. Qazirgi tańda oblystaǵy tarıh jáne mádenıet eskertkishteriniń sandyq kórsetkishi 3 365-ti quraıdy. Onyń ishinde: 741 tarıhı-mádenı eskerktish memlekettik tizimge alynǵan, munyń 711 eskerktishi jergilikti dárejedegi, 25-i respýblıkalyq dárejedegi, al 5-i Búkil álemdik halyqaralyq dárejedegi eskerktishter.

Uly Jibek Joly boıyndaǵy IýNESKO-nyń «Búkilálemdik Mádenı Mura» tizbesine engen 5 nysanǵa (Aqtóbe (Balasaǵun), Órnek, Qulan, Qostóbe qalashyqtary jáne Aqyrtas kesheni)  2016 jyldyń 31 qazan – 9 qarasha aralyǵynda Dúnıejúzilik mura ortalyǵy, IKOMOS, QR Mádenıet jáne sport mınıstrligi sarapshylarynyń qatysýymen monıtorıń júrgizý jónindegi reaktıvtik mısıaǵa ótip, komısıanyń qorytyndysymen jergilikti mańyzdaǵy ortaǵasyrlyq Qostóbe jáne Órnek qalashyqtaryna Respýblıkalyq dárejedegi mártebesi berildi.

Ótken jyly Jambyl óńiriniń rýhanı mádenıetin damytýǵa úlken úles qosqan uly tulǵalar men iri qaıratkerlerdiń eńbegin keleshek urpaqqa jetkizý maqstynda, el Táýelsizdiginiń 25 jyldyǵy men qazaq halqynyń uly aqyny J.Jabaevtyń 170 jyldyǵyna oraı Jambyl Jabaev atyndaǵy «Rýhanıat» ortalyǵy ashyldy.

Sonymen qatar, akademık «K.I.Skrábınniń úı-murajaıy» jáne Qarahan kesenesi janynda ornalasqan «Ortaǵasyrlyq meshit» qaıta qalpyna keltirilip, týrıser baratyn orynǵa aınaldyrý jumystary júrgizildi, - dep habarlady brıfıń barysynda basqarma basshysy Dúısenaly Dybysalyuly.