Qazaqtyń nar tulǵaly batyr uldary taǵy beldespek! Elimizde 1-shi sáýirden dúnıejúzine áıgili bolǵan "Qazaqstan Barysy" týrnırine irikteý bastalady. Onyń ústine bıyl baıraqty báseke «EKSPO» kórmesine tuspa-tus uıymdastyrylyp otyr, dep habarlaıdy KTK arnasy.

Qazaq kúresi EKSPO kórmesiniń kórigin qyzdyrmaq. Sóıtip tól sport túri taǵy álemge tanylyp, sheteldik týrıser beldesýdi óz kózderimen kóre alady. Túıe balýandar qazir kúni-túni damyl tappaı ázirlenip jatyr. Al irikteý aldaǵy senbiden bastalmaq.

Arman Shoraev, Qazaq kúresi federasıasynyń prezıdenti:

–Jýyrda ótetin dodaǵa tek qana áskerıler emes, ishki ister mınıstrliginiń ókilderi qatysady. Ulttyq qaýipsizdik komıtetiniń palýandary qatyspaq. Bir emes 2 palýanǵa 1 jáne 2 oryn alǵan palýanǵa joldama berýge ruqsat berip jatyrmyz.

Al irikteý týrnıri 3 aı boıy aýyl, aýdan, oblystyq deńgeıde ótedi. Júzden júırik atanǵan 34 túıe balýan ǵana «Qazaqstan Barysyna» joldama alady. Biraq olarǵa qoıylatyn talap qatal. Qara kúsh ıeleri dopıngke qarsy tekserilmekshi.

Serik Jarasbaev, QR MSM Sport jáne dene shynyqtyrý isteri komıteti tóraǵasynyń orynbasary:

–Dopıngke qarsy ortalyǵynda qan tapsyrady. Qaraımyz,tekseremiz.

Al qarsylas shaq keltirmegen bilekti balýanǵa byltyr 25 mıllıon teńge men páter kilti tabystalǵan. Uıymdastyrýshylar bıyl da júlde qory budan artyq bolmasa kem bolmaıdy dep otyr. Buǵan qosa, balýandardyń básekesi tikeleı efırde 120 elde kórsetilip, ony 60 mıllıonǵa jýyq kórermen tamashalamaq. Aıtýly doda tuńǵysh ret jańadan turǵyzylǵan sport saraıy «Barys Arenada» shildeniń 2-inde ótedi.