Búgin Óńirlik komýnıkasıalar qyzmeti alańynda Jambyl oblysy ákimdigi mádenıet, muraǵattar jáne qujattama basqarmasynyń basshysy Dúısenaly Byqybaev jýrnalısermen brıfıń ótkizdi dep habarlaıdy qamshy.kz. Brıfıń barysynda basqarma basshysy ótken jyldyń jumystaryn qorytyndylap, jýrnalıserdiń saýaldaryna jaýap qaıtardy.

Dúısenaly Dybysalyulynyń aıtýynsha, Jambyl oblysynyń ótken tarıhy jónindegi san myńdaǵan derekter men naqty qujattar oblysymyzdaǵy memlekettik arhıvterde saqtalýda. Mundaǵy mol tarıhı qujattar qory ólkemizdiń shejiresi, altyn qory.

Jyl qorytyndysy boıynsha oblys arhıvterinde 4473 qorda   880579 saqtaý birligi jınaqtaldy.

Arhıv mamandarynyń basty mindetteriniń biri - Ulttyq arhıv qoryn qalyptastyrý jumystary árdaıym úzdiksiz iske asyrylýda. Vedimistik saqtaýdaǵy qujattardyń qundylyǵy saraptalyp, nátıjesinde ótken jyly arhıv qyzmetkerleriniń usynýymen 14962 tizimdemeler qalyptastyrylyp, basqarmanyń saraptaý-tekserý komısıasy otyrysynda bekitildi.

Búginde arhıvter arnaıy semınarlar ótkizip, naqty ádistemelik kómek kórsetýdi jumys stıline aınaldyrdy. Ótken jylda is júrgizý, qujattardyń saqtalý tártibi boıynsha 231 mekemege ádistemelik kómek kórsetip, 29 semınar ótkizip, 1040 mekemeniń ister nomenklatýrasynyń júrgizý reti kelisildi.

Esepti jyly 19203 muraǵat anyqtamasy berilip, aldyńǵy jylmen salystyrǵanda 11%-ǵa ósti.

Arhıv qujattaryn paıdalana otyryp mańyzdy, qyzyqty faktilerge baılanysty ǵylymı-kópshilik kitaptar, arhıv qujattarynyń jınaqtaryn shyǵarý jumysy da qarqyndy túrde júrgizilýde. Búgingi kúnge deıin arhıv qory negizinde 20-ǵa jýyq kitap, on shaqty kitapshalar men jónsiltemeler shyǵaryldy. Jambyl oblysynyń 75 jyldyq tarıhy, Uly Otan soǵysy jyldaryndaǵy oblystyń tynys-tirshiligi,  maıdan hattary, Jambyl oblysynan shyqqan Sovet Odaǵynyń Batyrlary, oblystaǵy monýmentaldy eskertkishter, saıası qýǵyn-súrgin qurbandary, asharshylyq qasiretteri jeke-jeke kitap bolyp jaryq kórdi. Sonymen birge, Tarazda ótken Qazaq handyǵynyń 550 jyldyq toıy jáne Táýelsizdigimizdiń 25 jylynyń shejiresi hronıka retinde  jazylyp, kitap bolyp shyqqanyn erekshe atap ótý kerek, - dep sózin qorytyndylady D.Byqybaev.