Elimizdiń qazirgi ekonomıkalyq ósimin eskersek, 2050 jylǵa deıin damyǵan 30 memlekettiń qataryna kirý mindeti oryndalmaı qalýy ábden múmkin, dep xabarlaıdy QazAqparat.

Búginde Qazaqstanda adam basyna shaqqandaǵy ishki jalpy ónimniń kólemi 25 myń dollardy qurap otyr. Al damyǵan 30 memlekettiń qataryna kirý úshin atalǵan kórsetkish 60 myń dollarǵa jetýi tıis.

«Bizdiń esebimizge sáıkes, elimizdiń qazirgi 3-3,5 paıyzdyq ekonomıkalyq ósimimen 2050 jylǵa deıin damyǵan 30 memlekettiń qataryna kirý múmkin emes. Sol sebepti ekonomıkalyq damýdyń jańa modelin qolǵa alý qajet. Sóıtip, otandyq ekonomıkanyń bir jyldyq ortasha ósimin 5-6 paıyzǵa deıin jetkizý kerek», - dedi QR Ulttyq ekonomıka mınıstri Tımýr Súleımenov búgin Astanada ótken baspasóz máslıxatynda.

Onyń aıtýynsha, ekonomıkalyq damýdyń jańa modeli aıasynda óndiris pen aýyl sharýashylyǵyn barynsha damytý qajet. Budan bólek, iri ken oryndaryn ıgerýdi jalǵastyrǵan jón. Jalpy, otandyq ónerkásipterdi texnologıalyq jaǵynan jańǵyrtý sharalaryn jalǵastyra berý kerek. Atalǵan mindetterdiń bári Prezıdenttiń bıylǵy Joldaýynda da kórsetilgen.

Aıta keteıik, búgingi baspasóz máslıxatynda mınıstr Súleımenov eki kúnnen keıin kásipkerlikti jappaı damytý baǵdarlamasy aıasynda xalyqqa nesıe berý sharalaranyń bastalatynyn málimdedi.