Kıimi muntazdaı taza kelgen jigit aǵasy qalta telefonymen áldekimmen sóılesip kele jatyp, beıtanys aýlanyń mańyna aıaldaǵan edi, sol arada oınap júrgen balalardyń biri muny kóre sala «aǵataılap» qasyna jetip keldi.
- Aǵa, sizdiń telefonyńyz «aıfon» ba?!.
- Iá, solaı...
- Artynda jarty almanyń sýreti bar ǵoı, dá?!.
- Bar eken...
- Onda maǵan «aıfonyńyzdy» bere turasyz ba?!.
- Ony neǵylaıyn dep ediń? Nege meniń telefonym...
- Óıtkeni sizdiń telefonyńyzben barlyq jermen sóılesýge bolady. Eń kúshti telefon ǵoı «aıfon» degen, - dep balaqaı oınap júrgen bir dosyn daýystap shaqyrdy.
- Sámók, áý, Sámók! Beri kelshi, myna aǵaıda sen aıtqandaı telefon bar eken!..
Bet-aýzy oıyn qyzyǵynan kúıelesh bolǵan jas shamasy altylardaǵy qaǵylez bala shaýyp keldi.
- Seniń aıtqanyń osyndaı telefon emes pe? Qarashy... - dedi bala dosynyń jeńinen tartyp.
- Almasy bar ma?! Altyn tústes pe?! - dep pysyq bala munyń qolyndaǵy telefondy kórigisi kelip bara jatyr.
- Iá, bári seniń aıtqanyńdaı, bul «aıfon» ǵoı! – deıdi birinshi balaqaı.
- Onda osy telefon... Dál ózi. Saǵan keregi de osy «aıfon»! – dep ol bala qaıtadan oıyn alańyna júgirip ketti.
- Aǵaı, «aıfonyńyzdy» bir mınýtqa, tipti odan da az ýaqytqa bere turasyz ba? Sóıleseıin dep edim... Óte mańyzdy bir sharýamdy aıtýym kerek bolyp tur. Al bul mańaıda, bizdiń kórshilerimizde sizdikindeı telefon joq... ótinem, beresiz be?!. - dep jalyna suraǵan balaǵa, telefonyna sondaı mán berip, jolyn bógegen bul jaǵdaıǵa áli túsinińkiremeı tańǵalǵan jigit aǵasy ne derge bilmeı kúlimsireı berdi.
- Qyzyq eken... sóılesý úshin kez-kelgen telefon jaraı beredi emes pe?!. Nege mindetti túrde meniń telefonym kerek bola qaldy?!.
- Oı, aǵaı siz túsinbeısiz, óıtkeni ózińizde osyndaı myqty telefon bolǵasyn mán bermeıtin bolarsyz. Samat aıtady basqa telefondar álsiz, jaramaıdy dep... Tek sizdikindeı «aıfon» kerek, áıtpese men sizge bulaı jabyspaımyn ǵoı! Bar bolǵany bir-aq mınýtqa? Joǵa, jarty mınýtqa, aǵataı, a, osy arada sóılesemin... qoryqpańyz, aldamaımyn, berińizshi endi... eger aldap alyp, qashyp ketedi deseńiz, mine, meniń úıim, tipti men sóılesip bolǵansha qolymnan ustap turyńyz...
- Jaqsy balaqaı, ala ǵoı. Óziń muny paıdalanýdy bilesiń be?
- Joq, bilmeımin. Ustap ta kórmedim. Siz maǵan kórsetip bermeısiz be?
- Kórseteıin... Sonda kimge telefon shalasyń? Ol kisiniń nómirin bilesiń be? Aıta ǵoı. Men tezirek terip bereıin.
- Má, aǵa, nómiri joq...
- Endeshe qalaı sóılespeksiń?
- Qazir aǵataı, men surap qaıtaıyn, Samat, á, Samat! - dep bala tura shapty. Aldyńǵy balamen sóılesip, qaıtadan júgirip jetti, - aǵa, nómirdiń qajeti joq deıdi, osy telefon qosýly bolsa boldy, óıtkeni bul «aıfon» ǵoı, óziniń ishinde fýnksıasy bar deıdi, sózińdi aıta beresiń, ol estıdi... Solaı dep Samat dosym aıtty... berińiz, men tez... - dep balaqaı entige demaldy. Kútpegen tustan paıda bola qalǵandaı jolyn bógep, telefonyn surap qoımaǵan bul beıtanys pysyq balanyń qylyǵyna qaıran qalyp, jolynan qalǵan adam saǵatyna qarady:
- Men biraz ýaqyt joǵalttym. Bálkim kelesi joly... - dep balanyń bul isin oıynǵa balaǵan azamat ketýge yńǵaılandy.
- Aǵa, aǵataı, siz ketseńiz meniń sheshem aýrýynan jazylmaı qalýy múmkin! - dep shyr ete túspesi bar ma balanyń, - siz sál kútseńiz, men tez-tez aıtamyn da, telefonyńyzdy qaıtaramyn!.. Muny estigen soń bul adam shoshyp ketti, qaltasyna salǵan telefonyn sýyryp, qosty da balaǵa ustatty. Bala oń qolyna telefondy alyp, sol qolyn aǵaıynyń alaqanyna aparyp, ustaı aldy. Sosyn ádemi telefondy kishkentaı ýysyna syıǵyza almaı sál qyzyqtap turyp alǵan bala ony qulaǵyna jaımen aparyp:
- Alo, Alla-Taǵala, meniń atym Jomart, jasym beste, Samattyń dosymyn, meniń saǵan aıtaıyn degenim bar ǵoı, meniń mamam qatty aýyryp aýrýhanada jatyr, oǵan búgin be, erteń be, ota jasaıdy deıdi... ákem sony ýaıymdap otyr... eger mamam úıge oralmasa, onda biz jetim qalamyz... Qaryndasym Qarlyǵash áli kishkentaı. Sen bizdiń mamamyzdy aýrýynan jazyp jibershi, ótinemin!.. Úıde mamam bolmaǵasyn jóndep tamaq ta ishe almaı qaldyq... Ákem kúndiz jumysta. Ol durystap tamaq isteı almaıdy. Oǵan anamsyz óte qıyn bolyp júr... Men bir jaqsy aǵaıdyń «aıfonymen» aıtyp turmyn, eger qajet deseń jaýapty sol kisige aıtarsyń, ol aǵa qazir meniń qasymda tur, aǵa óte asyǵys, onsyz da men ýaqytyn aldym, rahmet saǵan, mamamdy tezirek emdeshi! Biz kútemiz! Sen Allasyń ǵoı, qolyńnan bári keledi, jaqsy, endi men saǵan telefon shala almaımyn, sebebi mende mundaı telefon joq, -dep jyldamdatyp sóılep, telefondy ıesine usynǵanda aq jaǵaly azamat kóz jasyna ıe bola almaı únsiz egilip turdy... Iá, bul adam Jomart pen Qarlyǵashtyń anasy jatqan aýrýhananyń hırýrgi bolatyn. Baladan sheshesiniń aty-jónin surap ózine muqıat jazyp aldy jáne keterinde balanyń basynan sıpap bylaı dedi:
- Jomart, sen óte jaqsy balasyń. Seniń dostaryń da tamasha. Alla-Taǵala seniń sózińdi estidi dep senemin jáne qaryndasyń ekeýiń jetim qalmaısyńdar... Olaı oılama. Alla saǵan sózsiz jaýap qaıtarady, ony men saǵan ózim mindetti túrde habarlaımyn, jaqsy ma?!. Al qazir bara ǵoı, aıtpaqshy, má, myna aqshaǵa dostaryńmen birge balmuzdaq alyńdar, sóıte ǵoı, bar endi, bar... - dep daýysy dirildep, kóziniń jasyn jeńimen súrtip úıdiń tasasyna sińe berdi. Jomart qolyndaǵy teńgege bir, úni jaryqshaqtanyp, tolqyp ketken aǵaıynyń ketken jaǵyna bir qarap turdy da artynan aıqaılady: «Aǵaı, sizge kóp rahmet! Siz óte jaqsy adamsyz!..» Úı tasasyndaǵy dáriger balanyń bul sózin emis-emis bolsa da estidi. Estigen boıda jylady. Jymıdy. Taǵy jylady... Jomart bul sátte dostaryna qaraı tura shapty: « Balalar, jańaǵy jaqsy aǵaı bizge balmuzdaq alyńdar dep aqsha tastap ketti! Mine, kettik!..» dep máz. Balalar da ýlap-shýlap qýanyp, onyń artynan júgirdi. Samat deıtin estıarlaýy: «Jomart, ol kisi shynymen de jaqsy kisi eken, Qudaımen sóılesýge «aıfonyn» berdi, endi seniń mamań táýir bolyp ketedi» dep daýystaıdy. Barlyǵy kósheni bastaryna kótere «alaqaılap» júgirip barady.
Arada birer kún ótkende balalar tilimen aıtqanda «jaqsy aǵaı», ıaǵnı dáriger Táńirbergen Dýlatuly Jomarttyń úıin izdep keldi. Balalar aýlada júr eken. Biraq aralarynda Jomart joq.
- Samat, seniń atyń solaı ma edi?..
- Samatpyn, aǵaı, Jomart úıinde qaryndasyn baǵyp qaldy. Al ákesi Qanat aǵa aýrýhanaǵa ketken...
- Bilemin. Maǵan páterin kórsetip jibershi,-dep dáriger Samattyń sońynan ilesti. Esiktiń qońyraýyn basqan Samat daýystap jatyr:
- Jomart, saǵan «jaqsy aǵaı» kelip tur, esigińdi ash!..
Esik ashylǵanda tabaldyryqta eki jasar qaryndasyn jetegine alǵan Jomart tur. Júzinde tańdanys bar. «Jaqsy aǵaıdan» jaqsy habar kútip turǵany kózinen kórinedi. Aǵaıy kóp kúttirmedi:
- Jomart balam, senderdiń analaryńnyń jaǵdaıy jaqsy, otany shúkir ótkerdi, qazir ońasha palatada demalyp jatyr, janynda ákeńiz bar, eshteńege alań bomańdar,-dep Qarlyǵashtyń basynan sıpady.
- «Jaqsy aǵaı», siz munyń bárin qaıdan bilesiz?!. Sizdi Alla jumsady ma maǵan osynyń bárin aıtyp bar dep?!.
- Iá, Jomart... ózi de solaı, jaraıdy, men baraıyn, aıtpaqshy, myna telefon sende bolsyn, saǵan syılyǵym, saý bop turyńdar,-dep dáriger kishkentaı Qarlyǵashtyń shashynan jáne bir sıpap, balaǵa telefonyn ustatty. Endi burylyp úıden shyǵa bergende balalardyń ákesi de kelip qaldy.
- Táńirbergen Dýlatuly, siz mundasyz ba?!.-dep tańyrqap jatyr.
- Iá, men osy aradan ótip bara jatqanmyn, balalaryńyzǵa anasynyń amandyǵyn aıtyp... saý-sálematta bolyńyzdar, jubaıyńyz jazylyp ketkenshe bir aıdaı bolatyn bolar, bári jaqsy bolyp jatsa, úıge shyǵaramyz. Kelip turasyz ǵoı, ázirge, - dep shyǵyp ketti. Samat ta onyń aldyna túsip alyp áldenelerdi aıtyp shaýyp barady.
- Áketaı, «jaqsy aǵaıdy» siz qaıdan bilesiz?!.-dedi Jomart.
- Nege bilmeıin?! Bilemin. Ol senderdiń mamalaryńa ota jasaǵan dáriger. Óte jaqsy adam! Bári maqtaıdy. Qoly altyn hırýrg deıdi. Qudaı jar bolyp senderdiń shesheleriń osy kisiniń qolyna tústi. Tájirıbeli dáriger eken, adammen sóılesýiniń ózi bólek...
- Dáriger?!. Má, solaı ma?!. Ol aǵaı degen maǵan Allaǵa anashym jaıly aıtyp, kómek suraýyma myna «aıfonyn» berdi...
- Bul qazir sende qaıdan júr?.. Qymbat dúnıe ǵoı ózi. Qalaı deısiń, «aı.. aıfon» deısiń be, aty ádemi eken, aıdan bastalatyn, birtúrli qazaqy estiledi, meniń Aıkúnimdeı, - dep ákesi ulynyń sózin bóldi, onyń ne dep jatqanyn jóndi uqpaǵandaı keıip tanytady.
- «Jaqsy aǵaı» jańa kelgende syılap ketti... Endi sen aýra qalsań da osy telefonmen Qudaıǵa habarlasamyn, endi bizdiń úıde eshkim aýyrmaıdy.
- Qulynym-aı, telefonmen Qudaıǵa habarlastym deımisiń?!-dep ákesi ilki sózdiń ushyǵyn sanasynan endi ótkizip, altyndaı jarqyraǵan telefondy qolyna alyp ári-beri aýdaryp qarady.
- Iá, áke, osy telefonmen men Allaǵa anamyz jaıly aıttym, emdep, tezirek úıge jibershi dedim, sóıtsem bul «aıfonnyń» ıesi anama ota jasaıtyn dárigerdiń ózi eken?!. Áke, endi anashym úıge keledi emes pe, solaı ǵoı, dá?!.
- Iá, qulynym, aqylyńnan seniń, Qarlyǵashym, botam meniń, júrińder, tabaldyryqta neǵyp turmyz? Erteń bárimiz mamalaryńa baramyz. Ekeýińdi kórip qýanyp qalsyn,-dep áke júregi eljirep, kóńili bosady,- qolyńdaǵy jyltyraqpen Qudaıǵa telefon shaldym deısiń be balam-aı?!. Óıtýge bolady ma eken?!.-dep sóılep, basyn shaıqap kúlip barady. «E, shirkin-aı, perishte peıil qulyndarym-aı!.. Jasaǵan senderdiń osy beıkúná bolmystaryńa bola Aıkúnime ómir syılaǵan shyǵar?!.Balamysyń degen, Allaǵa telefon shalýǵa bolady ma?!. Eı, perishte júrek-aı... Áıtsede, «Aıfon», Aıkún, qyzyq-eı, Jomartym meniń, seniń perishte únińdi estigen Alladan aınaldym!.. » dep te oılap, Qanat áke bárine shúkir qyldy. Iá, bul oqıǵanyń qıýy kelisip, ádemi órilýi qazekemniń " Qudaısyz qýraı synbaıdy" degen sóziniń taǵy bir dáleli, oılyǵa ǵıbrat eken...
Avtory: Asem Jumabekova
Sholýshy: Ásel Óteshova
