Úndistannyń Bhýbaneshvar qalasynda ótken Azıa chempıonaty óz máresine jetti. Tórt kúnge sozylǵan qurlyq birinshiliginde Qazaqstan quramasy 4 altyn, 2 kúmis, 2 qola medal jeńip aldy dep habarlaıdy Qamshy aqparattyq agenttigi. 

Jarystyń sońǵy kúninde sprınterler úshin báseke sátti boldy. Áıelder arasynda 200 metrge júgirgen Vıktorıa Zábkına bıylǵy maýsymdaǵy Azıadaǵy úzdik nátıjelerdiń birin kórsetip, altyn medal jeńip aldy. Onyń ýaqyt kórsetkishi – 23.10 sekýnd. Márege ekinshi bolyp, Shrı-Lanka ókili Rýmeshıka Kýmarı keldi. Úzdikti úshtikti taǵy bir jerlesimiz Olga Safronova (23.47 sek) qorytyndylady.

– Vıktorıa start basynda baıaý qımyldady. Keshe estafetada júgirgen bolatyn. Sondyqtan azdap sharshady. Degenmen búgin óziniń qalaı júgiretinin kórsetti. 200 metrge júgirýde kóbinese ara qashyqtyqtyń jartysynan asqannan keıin sheshiledi. Vıktorıa márege jaqyndaǵanda kúsh alady. Negizinen únemi solaı jeńip júredi, – deıdi Zábkınanyń ustazy, tanymal qazaqstandyq jattyqtyrýshy Lúbov Nıkıtenko.

Osylaısha, Vıktorıa Zábkına 2017 jylǵy Azıa chempıonatynyń úsh dúrkin chempıony atandy. Ol buǵan deıin jekeleı synda 100 metrge júgirýden jeńiske jetken bolatyn. Sondaı-aq áriptesteri  Rıma Kashafýtdınova, Svetlana Golendova, Olga Safronovamen birge 4h100 metrge júgirý boıynsha komandalyq estafetadan ekinshi altyndy ıelendi.

Aıta keteıik, 8 shilde kúni qazaqstandyq jeńil atletter 100 metrge komandalyq estafetaǵa júgirýde sary qurlyqta ózderine teń keler eshkim joq ekenin dáleldegen bolatyn. Qazaqstan quramasynyń ýaqyt kórsetkishi – 43.53 sekýnd. Ekinshi oryn Qytaı qyzdary (44.50) bolsa, úshtikte Úndistan (44.57) quramasy bar.

Tórtinshi altyndy úsh qarǵyp sekirýden Marıa Ovchınnıkova enshiledi. Ol Azıa chempıonatyn 13.72 metrmen qorytyndylady. 18 jastaǵy atlet sonymen qatar 4-13 tamyz aralyǵynda Londonda ótetin álem chempıonatynyń joldama aldy. Marıadan bólek, dál osy saıystan taǵy bir qazaqstandyq sportshy Irına Ektova kúmis medal jeńip aldy. Ol óz kezeginde 13.62 metrge sekirdi.

Azıa chempıonatynan sprınter Olga Safronovaǵa eki medal buıyrdy. Ol 100 metrde  (11.45 sekýnd) kúmis, 200 metrde qola júlde enshiledi.

Taǵy bir qolany jarystyń ekinshi kúninde ıadro serpýden Ivan Ivanov oljalaǵan bolatyn. Ol Iran men Úndistan sportshylaryn alǵa jiberip, 19.41 metrge laqtyryp, úshinshi orynǵa qol jetkizdi. 

Osylaısha, Bhýbaneshvardaǵy Azıa chempıonatynan Qazaqstan quramasyna 8 medal buıyrdy. Onyń tórteýi altyn, ekeýi kúmis, ekeýi qola. Sóıtip, jalpy komandalyq esepte úshinshi orynǵa jaıǵasty. Kóshbasynda jarys qojaıyny Úndistan 29 medal (12 altyn, 5 kúmis, 12 qola) men Qytaı (8 altyn, 7 kúmis, 5 qola) bar.

Jalpy, Azıa chempıonatyna 43 elden 800-den astam sportshy qatysty.