Qyrǵyzstannyń saılaý jáne referendým ótkizý jónindegi ortalyq komısıasyna bıylǵy prezıdenti saılaýyna qatysýǵa nıet bildirgen taǵy úsh adamnan ótinish túsken. Qyrǵyzstan prezıdenttigine kandıdat bolǵysy keletinder sany qazir 51 adamǵa jetken, dep jazady Qamshy.kz aqparat agenttigi azattyq.org málimetine súıenip. 

Qyrǵyzstan prezıdenti saılaýyna túsýge "Polot bek" qoǵamdyq qorynyń prezıdenti Polotbek Kenjequlov, "Rıdýan" jaýapkershiligi shekteýli seriktestiginiń bas dırektory Aqylbek Mansýrov, qoǵam qaıratkeri Talǵatbek Kojogýlov ótinish bergen.

Qyrǵyzstanda prezıdent saılaýy bıyl qazannyń 15-i kúni ótedi dep belgilengen. Prezıdent saılaýyna túsýge nıet bildirgender resmı organǵa ótinishin tamyzdyń 1-ine deıin tapsyrýy tıis. Prezıdenttikke kandıdattardyń túpkilikti tizimin saılaý jáne referendým ótkizý jónindegi ortalyq komısıa qyrkúıektiń 10-y kúni jarıalaıdy.

Qyrǵyzstan konstıtýsıasy boıynsha, prezıdent tek bir ǵana merzimge saılanatyndaqtan eldiń qazirgi prezıdenti Almazbek Atambaev bul qyzmetten ketedi. Biraq Qyrǵyzstan konstıtýsıasyna sońǵy engizilgen ózgertýler prezıdenttiń ókiletin azaıtyp, premer-mınıstrdiń quzyretin keńeıtti. Saıası básekelesteri Atambaev negizgi zańǵa ózgertýlerdi ózi prezıdent qyzmetinen ketkennen keıin úkimet jetekshisi retinde bılikke qaıta kelý úshin engizdi dep sanaıdy.