Qazaq-Brıtan tehnıkalyq ýnıversıteti men Sátbaev atyndaǵy Qazaq Ulttyq tehnıkalyq zertteý ýnıversıteti bólingenin jáne budan bylaı jeke-dara ǵylymı-bilim berý mekemesi retinde damıtynyn málimdedi, - dep habarlaıdy Qamshy.kz aqparat agenttigi Tengrinews.kz málimetine súıenip.
1 qyrkúıekte "QazMunaıGaz" UK AQ men Sátbaev atyndaǵy QazUTZÝ arasynda QBTÝ aksıalarynyń 100 paıyz úlesin senimdi basqarý kelisimsharty aıaqtalǵan.
"Osy sátten bastap QBTÝ men QazUTZÝ jeke-dara ǵylymı-bilim berý mekemesi retinde damıdy. "QazMunaıGaz" UK AQ QBTÝ-dyń 100 paıyz aksıasyna ıe. QBTÝ-da bilim berý men ǵylym tolyqtaı ózara árekettestikte" ekeni aıtyldy.
Al óz kezeginde QazUTZÝ ókilderi QBTÝ aksıalaryn satyp alýǵa múmkindigi joq ekenin aıtyp otyr. "QBTÝ segiz jyl qatarynan úzdik tehnıkalyq ýnıversıtet, Qazaqstan teńiz akademıasy men Qazaqstanda úzdik Halyqaralyq ekonomıka mektebi bar. Sózsiz, QazUTZÝ QBTÝ-men birigýden utar edi, alaıda ony satyp alýǵa múmkindigi joq. QazUTZÝ QBTÝ-men ǵylymı jobalar jáne JOO-dan keıingi baǵdarlamalar boıynsha qyzmettestikke múddeli", - dedi Sátbaev atyndaǵy QazUTZÝ baspasóz qyzmetiniń ókilderi Tengrinews.kz saýalhatyna bergen jaýabynda.
Eske salaıyq, 2015 jyldyń 25 jeltoqsanynda Qazaqstan Prezıdenti Nursultan Nazarbaev qazaqstandyq eki JOO-ny biriktirý týraly tapsyrma bergen bolatyn. Sol kezde Elbasy Nursultan Nazarbaev ýnıversıtet bazasynda iri ǵylymı-zertteý ortalyǵyn qurý mindetin qoıyp, el ekonomıkasy qazirgi jaǵdaıda joǵary bilikti kadrlarǵa, ásirese ınjenerlik-tehnıkalyq beıindegi kadrlarǵa zárý ekenin atap ótken edi.
