Qytaıda qazaqstandyq unnan jasalǵan kespege tapsyrys berý trendke aınaldy. Qazaqparattyń habarlaýynsha bul týraly búgin Úkimet úıinde ótken baspasóz máslıhatynan keıin QR Aýyl sharýashylyǵy vıse-mınıstri Gúlmıra Isaeva málim etti, dep jazady Qamshy.kz aqparat agenttigi.

«Aǵymdaǵy jyly astyqtyń sapasy óte jaqsy, aqýyz deńgeıi joǵary, shamamen 26-28 paıyz. Sonyń arqasynda sheteldik ınvestorlardy elimizde astyqty tereń qaıta óńdeýmen baılanysty óndiris oryndaryn ashýǵa tartýdamyz. Máselen makoron ónimderi, kespe daıyndaý. Kúni keshe ǵana Aýyl sharýashylyǵy mınıstrliginde osy jerde kespe shyǵaratyn zaýyt salǵysy keletin qytaılyq ınvestormen kezdesýim ótti. Unymyz ınvestorlardyń qyzyǵýshylyǵyn týdyryp otyr. Joǵary surypty un kespe óndirýge múmkindik beretin sapaǵa ıe. Tipti, Qytaıda qoǵamdyq tamaqtaný ornyna nemese meıramhanaǵa kelgende olardyń qazaqstandyq unnan jasalǵan kespege tapsyrys berýi trendke aınalypty. Biz  munan ary da ilgerilep, dál sol kespeni Qazaqstanda shyǵaryp, qaptamaǵa salyp, olarǵa daıyn ónim túrinde jibere alar edik», - dedi vıse-mınıstr.

Onyń aıtýynsha, qazirgi ýaqytta qytaılyq ınvestor kespe shyǵaratyn zaýyt qurylysyna baılanysty Astana men Qostanaı oblystarynyń ákimderimen kelissózder júrgizgen. Soltústik Qazaqstan oblysynyń múmkinshiligin nazarǵa alǵan.

«Endigi ýaqytta tańdaý jer ýchaskesine, ınfraqurylymǵa baılanysty bolmaq. Atalǵan kásiporynǵa qazaqstandyq seriktes te bar. Menińshe, ol Astananyń azyq-túlik beldeýinde bolatyn sıaqty. Joba quny shamamen 47 mln dollardy quraıdy. Óndiristik qýaty táýligine shamamen - 700 tonna kespe. Keıin bul kórsetkish táýligine 1 myń tonnaǵa deıin jetkiziledi», - dedi Gúlmıra Isaeva.