Búgin Qazaqstan Respýblıkasy Din isteri jáne azamattyq qoǵam mınıstri Nurlan Ermekbaev jumys saparymen Qyrǵyzstanda boldy dep habarlaıdy Qamshy.kz aqparat agenttigi.  Mınıstr Bishkek qalasyndaǵy «Ala-Archa» memlekettik rezıdensıasynda ótken «Qazirgi zamanaýı zaıyrly memlekettegi Islam» taqyrybynda uıymdastyrylǵan Halyqaralyq konferensıaǵa qatysty.  

Konferensıa jumysy Qyrǵyzstan Respýblıkasynyń Prezıdenti Almazbek Atambaevtyń quttyqtaý sózimen ashyldy.

Konferensıa barysynda Nurlan Ermekbaev Qyrǵyz Respýblıkasynyń Prezıdenti Almazbek Atambaevqa jáne osyndaı mańyzdy sharany uıymdastyrǵan Qyrǵyz Úkimetiniń ókilderine alǵys bildirdi. 

Qazaqstan Respýblıkasynyń Din isteri jáne azamattyq qoǵam mınıstri Nurlan Ermekbaev óz sózinde radıkalızm kórinisterine qarsy kúres baǵytyn kórsete otyryp, destrýktıvti dinı aǵymdar ıdeıalarynyń nasıhattalý máselesin kóterdi.

 «Keńes úkimeti kezeńiniń ózinde  bizdiń  halyqtarymyzdyń arasynda  adamdardyń dinge degen kózqarasyna qaramastan, beıbitshilik pen toleranttylyqqa baǵyttalǵan dinı dástúrler qalyptasqan bolatyn. Biz  dinı muralarymyzdy zaman talaptaryna sáıkes beıimdep, saqtap qalý kerekpiz. Tek zaıyrly qoǵam ǵana kópkonfessıaly ortada óziniń dinı teńdigin qamtamasyz ete alady»,-dep óz oıyn ortaǵa saldy Nurlan Ermekbaev.

Mınıstr halyqaralyq yntymaqtastyqty tereńdetý  jáne dinı negizde ekstremızmniń aldyn alý salasynda tájirıbe almasý men birlesken sharalardy qabyldaý maqsatynda dinı qyzmet salasyn retteıtin Ortalyq Azıa elderiniń vedomsvolary arasynda Halyqaralyq Konsýltatıvtik keńes qurý týraly unysys bildirdi.

«Bizge, memleket qaıratkerleri, ǵylym men din jolyndaǵy tulǵalar – bárimiz dinı ekstremızm men radıkalızm tarapynan týyndaıtyn qaýip-qaterlerge qarsy birigýimiz kerek... Mundaı Keńes óńirlik formatta birlesken tıimdi jumys tetikterin qalyptastyrýǵa jol ashady. Birlesip sheshimderdi júzege asyrý arqyly destrýktıvti kúshterge qarsy tura alamyz»- dep atap ótti QR Din isteri jáne azamattyq qoǵam mınıstri Nurlan Ermekbaev. 

Sondaı-aq, Nurlan Ermekbaev konferensıa qatysýshylaryn memlekettiń jáne dinderdiń ózara árekettesýi jolynda qazaqstandyq modelin qalyptastyrý baǵytynda Qazaqstan Úkimeti tarapynan atqarylyp jatqan sharalarmen tanystyrdy. Zańdy túrde jumys isteıtin barlyq dinı birlestiktermen yntymaqtastyq ornatý arqyly azamattardyń ar-ojdan bostandyǵyna degen quqyqtaryn qamtamasyz etýdegi memleket qolǵa alyp otyrǵan  jumystar týraly  aıtty.   

Mınıstr qazaqstandyq qoǵam etnosaralyq jáne dinaralyq kelisimdi saqtaýdyń biregeı úlgisi bolyp sanalatyndyǵyn atap ótti. Osyndaı ońtaıly tájirıbeniń negizinde Prezıdent Nursultan Nazarbaev álemdik dástúrli din kóshbasshylarynyń sezin ótkizý týraly bastama jasady.

Qazirgi zaıyrly memleketterde ıslamnyń orny men rólin talqylaý konferensıanyń basty taqyrybyna aınaldy. Qatysýshylar memleketterdiń ulttyq mádenı erekshelikterin saqtaý, teris dinı qundylyqtardyń taralýyn boldyrmaý jáne dinı salada demokratıalyq basqarýdyń tıimdiligin arttyrý qajettiligine nazar aýdardy.

Konferensıanyń ashylý saltanatynda sondaı-aq Ortalyq Azıa boıynsha Eýropalyq Keńestiń arnaıy ókili Peter Býrıan, Úndistannyń syrtqy isteri jónindegi memlekettik mınıstri Mýshabar Akbar, Ózbekstan Prezıdentiniń keńesshisi Rýstam Kamılov, Mysyr Arab Respýblıkasynyń Mádenıet mınıstri Helmı Namnam, Tájikstan Respýblıkasynyń Din isteri komıtetiniń tóraǵasy Sýlaımon Davlatov jáne Ázerbaıjan, Belgıa, BUU, EQYU kelgen basqa da mártebeli meımandar sóz sóıledi.

Eske sala keteıik, konferensıa jumysyna 19 eldiń din salasyndaǵy ýákiletti organdarynyń basshylary, bedeldi halyqaralyq uıymdardyń ókilderi jáne tanymal sheteldik ıslamtanýshy sarapshylar qatysýda.