Búgin QR Premer-Mınıstriniń orynbasary – Aýyl sharýashylyǵy mınıstri A.Myrzahmetov jáne úkimettik emes uıym ókilderi turaqty kezdesýler aıasynda AÓK-ti damytýdyń mańyzdy máselelerin talqylaý boıynsha kezdesý ótkizdi. Bul týraly Qamshy.kz aqparat agenttigi QR Aýyl sharýashylyǵy mınıstrliginiń baspasóz qyzmetine súıene otyryp jazady.
Úkimettik emes uıymdar strategıalyq jáne baǵdarlamalyq qujattardy daıyndaýǵa belsendi qatysatynyn aıta ketken jón. Mınıstrlik Memlekettik baǵdarlamany daıyndaýǵa kirisken sátinen bastap, jumys toptyń quramynda bolǵan qoǵamdyq birlestikter men agrarlyq sektor odaqtary men ókilderi birlese jumys atqardy.
A.Myrzahmetov óz sózinde, búgingi kúni Qazaqstanda azamattyq qoǵamdy damytyp, quqyqtyq el bolý úshin, Úkimet tarapynan Memleket pen úkimettik emes uıymdar arasynda tyǵyz baılanys ornatýǵa asa mán berilip otyrǵanyn atap ótti.
Kezdesý barysynda Vıse-premer 2017-2021 jyldarǵa arnalǵan QR AÓK-ti damytýdyń memlekettik baǵdarlamasynyń júzege asyrylý barysyn, aýyl sharýashylyǵy taýar óndirýshileri úshin memleket tarapynan kórsetiletin qoldaý túrlerin aıtty.
Sondaı-aq, jıyn barysynda A.Myrzahmetov qatysýshylarǵa qazirgi tańda salalyq qaýymdastyqtar men odaq, qoǵamdyq keńes, agrobıznes ókilderiniń qatysýymen Mınıstrliktiń, «Atameken» UKP-nyń alańdary men aımaqtarda talqylanyp jatqan aýyl sharýashylyǵyn damytýdyń Jol kartasyna erekshe kóńil bólýdi usyndy.
Sonymen qatar, jınalysqa qatysqan úkimettik emes uıym ókilderi óz sózderinde AÓK-tiń salalaryn damytýǵa arnalǵan Kartalardy biraýyzdan qoldap, atalǵan Kartalardy árbir baǵyt boıynsha naqty tapsyrmalarǵa baǵyttap, sol tapsyrmalardyń sheshý joldaryn qarastyryp jatqandyǵyn atap ótti.
Ári qaraı kezdesý suraq-jaýap formatynda jalǵasty. Úkimettik emes uıym ókilderiniń basym kópshiligi sýbsıdıa berý, jer máselesi, aýyl sharýashylyǵy taýarlaryn qaıta óńdeý jáne t.b. jónindegi máseleler qyzyqtyrdy.
Kezdesý sońynda A.Myrzahmetov Aýyl sharýashylyǵy mınıstrligi ár qashan ashyq áńgimege daıyn ekendigin, barlyq pikirler men usynystardyń mańyzdylyǵyn aıtyp, aldaǵy ýaqytta Mınıstrlikpen birlesip jumys isteýge shaqyrdy.
Osyǵan oraı, aldaǵy ýaqytta atalǵan jáne basqa da salalardy damytý boıynsha ózekti taqyrypty qozǵaıtyn jınalystardy turaqty túrde ótkizý usynyldy. Bul usynystar birlese jumys atqarý barysynda jaqsy nátıjege qol jetkizýge múmkindik beredi.
