2017 jylǵy 20 qazanda Almaty qalasynda Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografıalyq saıasat jónindegi Ulttyq komısıa (budan ári - Ulttyq komısıa) Almaty qalasynyń ákimdigimen jáne «Ákeler odaǵy» qoǵamdyq birlestigimen birlesip II Respýblıkalyq ákeler forýmyn (budan ári - forým) ótkizdi,- dep habarlaıdy Qamshy.kz aqparat agenttigi.
Forýmda otbasy ınstıtýtyn jáne otbasylyq tárbıedegi ákeniń rólin nyǵaıtý, «Rýhanı Jańǵyrý» qoǵamdyq sanany jańǵyrtý aıasynda balalardyń patrıottyq sezimin qalyptastyrýǵa, bilimge umtylysty ósirýge qoǵamnyń nazaryn aýdarý máseleleri talqylandy.
Forýmnyń jumysyna parlament depýtattary, Ulttyq komısıa músheleri, ortalyq memlekettik jáne jergilikti atqarýshy organdardyń basshylary, qoǵamdyq qaıratkerler, úkimettik emes uıymdardyń ókilderi, sonymen qatar úlgili ákeler – barlyq óńirden kelgen delegattar qatysty.
Forýmnyń ashylýynda Ulttyq komısıa tóraıymynyń orynbasary, QR Ortalyq saılaý komısıasynyń múshesi Lázzat Súleımen, Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynyń arqasynda qoǵamnyń rýhanı-adamgershilik túrlenýiniń negizgi baǵdarlary anyqtalǵandyǵyn atap ótti. Jaqynda ótken TMD jáne JEEO elderi basshylary Keńesiniń otyrysynda otbasy ınstıtýtyn jáne dástúrli otbasylyq qundylyqtardy qoldaý týraly birikken málimdemeniń qabyldanǵandyǵy tekten tek emes ekenin atap ótti.
Qazaqstandyqtardyń otbasylyq dástúrlerge beıimdiligi qoǵamda joǵary moraldyq qundylyqtardy jáne rýhanıatty saqtaýǵa yqpal etedi, bul jahandyq syn-qaterlerge qarsy turýǵa múmkindik beredi.
Qazirgi ýaqytta QR Prezıdentiniń Jarlyǵymen (2016 jylǵy 6 jeltoqsandaǵy №384) qabyldanǵan Qazaqstan Respýblıkasynda 2030 jylǵa deıingi otbasylyq jáne genderlik saıasattyń tujyrymdamasynyń birinshi kezeńi iske asyrylýda. Tujyrymdamada balanyń tárbıesindegi qos ata-ananyń jaýapkershiligin arttyrý, sonyń ishinde jaýapty ákelik ınstıtýtyn damytý jáne úlgili ákelerdi nasıhattaý máselesi alǵa qoıylǵan.
Qazaqstanda 70 belsendi ákelerdiń kúshimen «Ákeler odaǵy» qoǵamdyq birlestigi quryldy, ol otbasyn nyǵaıtý boıynsha tájirıbelik sharalardy iske asyrady. 8 aımaqta ókildikteri quryldy, sonyń ishinde búgingi kúni Astana, Almaty qalalarynda, Qaraǵandy jáne Mańǵystaý oblystaryndaǵy ókildikter belsendi bolyp tabylady, olar ákelik ınstıtýtty nasıhattaýmen qatar óńirlerde keıbir jaýapsyz ákelerdiń alıment tólemeýi, az qamtylǵan otbasylarǵa mekenjaılyq kómek kórsetý jáne t.b. sıaqty áleýmettik máselelerdi sheshedi. Ákeler odaǵynyń ókilderin ortalyq memlekettik jáne jergilikti atqarýshy organdarynyń janyndaǵy ártúrli saraptamalyq jumys toptaryna tartý iske qosyldy.
Forým aıasynda qatysýshylar «Reseı Federasıasynyń ákeler odaǵy» aımaqaralyq qoǵamdyq uıymynyń atqarýshy dırektory Iýrıı Solenovtiń usynǵan jumys tájirıbesimen tanysty.
İs-sharanyń sońynda úzdik úlgili ákelerge Ulttyq komısıanyń atynan Alǵys hattar tabys etildi. Kúnniń ekinshi jartysynda dóńgelek ústel uıymdastyryldy, onda forýmǵa qatysýshylar balalar men jastardyń tárbıesine ákeniń qatysý máseleleri, sondaı-aq Qazaqstanda ákeler ınstıtýtyn damytý joldary talqylandy.
Odan ári Ulttyq komısıa músheleri osy jylǵy shilde aıynda ashylǵan turmystyq zorlyq-zombylyq qurbandaryna arnalǵan daǵdarys ortalyǵyna baryp, onyń jumysymen tanysty. Bul otbasylyq-turmystyq turǵyda zardap shekken áıelderge qajetti áleýmettik qyzmetter kórsetetin elimizdegi otyzynshy daǵdarys ortalyǵy bolyp tabylady.
