Almatyda birqatar kóshelerdiń ataýlary qazaqtyń rýhty batyrlary men beldi tulǵalarynyń esimimen aýysatyny jaıly habarlaǵanbyz. Endigi jerde Kenesary han men Alash arystary bastaǵan Jumeken Nájimedenov, Aqseleý Seıdimbek, Ázilhan Nurshaıyqov, Gerold Belger, Qudaıbergen Sultanbaev, Tumanbaı Moldaǵalıev, Qadyr Myrzalıev, Ámına Ómirzaqova, Ermek Serkebaev, Hadısha Bókeeva, Maqash Tátimov, t.b. ult zıalylarynyń esimderi Almaty kóshelerin rýhtandyryp turatyn bolady.

Al ózbekstandyq vesti.uz portaly qazaqtyń eń sońǵy hany bolǵan Kenesary hannyń atyn Almaty kósheleriniń birine berý – naǵyz bassyzdyq deıdi. Sebebi, Kenesary ult satqyny, bandıt bolǵan eken.

Vesti.uz saıtynyń málimetinshe, Kenesary han 19 ǵasyrda Reseıde adam urlap, olardy Tashkent, Buhar, Qoqan bazarlaryna quldyqqa satqan. Al qazaq júzderi Reseıge qosylǵan soń onyń «kásibine» núkte qoıylǵan. Reseı polkovnıginiń pogonyn alǵan soń satqyndyq jolyn jalǵastyryp, urlaý, tonaý, óltirý syndy áreketterge barǵan. Sóıtip júrgende qyrǵyz manaptarynyń qolyna túsedi. Qyrǵyz manaptary Kenesarynyń otbasynan bastap, óziniń de dene múshelerin bólshektep, basyn kesip alǵan. Kesilgen basyn Omsktegi otyrysta Batys Sibir gýbernatory Gorchakovqa syı retinde tabystady. Al bandıttiń qabiri men bas súıegi áli kúnge deıin tabylmady. Búginde satqyn men bandıtti qazaq bıligi «erkindik úshin kúresken batyr» dep baǵalap otyr.

Ózbekstandyq aqparat quraldary jazǵan maqala mazmuny osyndaı. Áskerı qolbasshy, qazaq halqynyń 1837 – 1847 jyldardaǵy ult-azattyq qozǵalysynyń kósemi, Qazaq handyǵynyń sońǵy hany Kenesary jaıly joǵarydaǵydaı topshylady.