«Qazaqstan Úkimetiniń ókili Parıjden 65 mıllıon eýroǵa elıtaly páter satyp aldy. Bul Fransıa astanasynda osy jyly jasalǵan eń qymbat saýda-sattyq boldy». Osyndaı aqparat elıtaly jyljymaıtyn múlik saýdasymen aınalysatyn Mansionglobal halyqaralyq agenttiginiń saıtynda jarıalanǵan, dep habarlaıdy Qamshy.kz aqparat agenttigi Astana telearnasyna silteme jasap.
Páter áıgili Elıseı alańyna jaqyn jerde, baı-manaptar turatyn aýdanda ornalasqan. Aýmaǵy - 1200 sharshy metr. 5 jatyn bólmesi, spa-aımaq, qyzmetshiler men kúzetke arnalǵan bólek oryndar qarastyrylǵan. Ásirese, qaýipsizdigi keremet. Terezelerinen oq ótpeıdi, jáne bas saýǵalaıtyn arnaıy jer de bar.
Saýdanyń bolǵanyn arna tilshilerine belgıalyq rıeltor de rastaǵan.
"Jyljymaıtyn múlik reseılik olıgarhqa tıesili edi. Ony jeke kezdesýler ótkizýge qolaıly etý úshin, 100 mln eýrodaı qarjy quıdy. Satyp alýshy - Qazaqstan Úkimetiniń ókili. Páterdiń naryqtaǵy baǵasy sharshy metri úshin kem degende 20 myń eýro. Iaǵnı úıdiń quny 24 mıllıon eýrony quraıdy. Qosymsha kúsheıtýler, jańǵyrtýlar men kólikterdiń quny ári ketse 5 mıllıon eýroǵa túsýi múmkin", - dep pikir bildirgen belgıalyq rıeltor Ignas Múvıssen.
Jyldyń em qymbat saýdasy týraly málimet birqatar basylymdarda jarıalanǵan. Al, Qarjy mınıstri men Syrtqy ister mınıstrliginiń resmı ókili bul aqparattan habarsyz bolyp shyqty. Tipti vedomstvolar bir birine siltedi.
"Bul suraqty syrtqy ister mınıstrliginiń ókiline qoıyp turǵandaryńyzǵa tań qaldym. Men bul suraq mınıstrliktiń quzyretinde emes dep senimmen jaýap bere alamyn. Syrtqy ister mınıstrligi Qazaqstan Úkimetiniń áreketine qatysty túsinik bere almaıdy", - deıdi QR SİM resmı ókili Ánýar Jaınaqov.
