Onyń ıisi ózgeshe edi... Tal shybyqtaı ıirilgen bitimi, názik kelbeti men osy kelbetine asa saı kelmeıtin  jýandaý daýysy áli esimde. Daýsy keremet edi... Bir qaraǵanda názik qyz deısiń, tildeskende basqasha áser... Súıkimdi názik qyz ilezde daýsynyń senimdi yrǵaǵymen baýrap alatyn.

Ony oılamaıtyn  kúnim  de, túnim de boldy desem- ótirik aıtqanym. Barlyǵy sonaý ótken kúnder elesinde qalyp qoısa da, men dál osy estelikterdiń  birin de álemniń bar baılyǵyna almastyrmas em. Sebebi onda – Jarqynaı bar...

Almatynyń jańbyrly keshteriniń birinde uzyn sonar keptelis ýaqytynda telefonym shyryldady.

—  Alo, ıá?

—  Arman, qaıdasyń? Tezdet!-deıdi maǵan ashýly daýys.

—  Joldamyn. Almatynyń keptelsin bilesiń ǵoı..

—  Aıtpaqshy, ózińmen birge men aıtqan nárseni aldyń ǵoı?

—  O, Allam! Esime túskeni qazir.... Qap, ne istesem eken?

—  Arman! Aqymaqsyń! Qalaısha esińnen shyǵady, osy seniń basyńda aqyl degen nárse bar ma ózi?-deıdi telefonnyń arǵy jaǵyndaǵy daýys. Jaqyn baýyrymdy kúttirip qoıǵanym úshin  ishteı ózime rıza emes edim... Barlyǵyna kináli meniń oılarym. Sońǵy ýaqyttary kóp oılanatyn bolyp ketippin.

-—  Renjime, baýyrym. Qazir úıge qaıtyp baryp, alyp kelemin. Kút meni, -dedim de telefondy tastadym. Jol erjelerin dál osyndaı qysyltaıań sátte buzýǵa bolatyn shyǵar dedim de kólik jyldamdyǵyn 100-ge kóterdim.

Aldymda ketip bara jatqan «Húndaı Elantra» ary-beri ótip meniń júıkeme tıe bastady. Asyǵyp kele jatqan maǵan jol bermeı ses kórsetip qoıady-taǵy..

«Qap bálem, qazir saǵan kórsetem. Osydan túsersiń qolyma...».

Menen sál ǵana qalyp bara jatqan Elantra aldyma shyǵyp, jolymdy bógedi. Onsyzda keshigip bara jatqan men ashýǵa býlyǵyp gazdy basyp kep qaldym. «Qarǵys atqyr!!! Jetpegeni osy edi!». Kóligimniń sol jaq terezesin julyp kete jazdady ǵoı mynaý..

Kólikten shyqtym. Ol da toqtady. Biraq onyń kólikten shyǵatyn túri joq. Kenetten áldeneden seskengendeı toqtap qaldym. Ashýym da, yzam da  - bári seıilip ketti. Áldebir kúsh maǵan toqtaý qoıǵandaı aldyǵa jyljýǵa shamam kelmeı, aıaq-qolym baılandy.  Arada bir mınýt óter-ótpeste kólik ishinen ortasha boıly, aq tústi kúrteshe kıgen shashy túıilgen jyly júzdi qyz shyqty. Kúlimsirem kele jatty, alaıda kózime tike qaramaıdy. Qoryqqan bolar dedim ishteı.

Al men bolsam, sanaýly mınýttar burynǵy ashýymnyń qaıda ketkenin túsinbeı, endi bul qyzǵa ózimniń qanshalyqty kúıinip turǵanymdy qalaı jetkizerimdi bilmeı abyrjyp turmyn.

Belgisiz qyz qasyma keldi de:

—  Keshirińiz, asyǵyp kele jatyr em,-dedi

Siz ózi júrgizýshi tólqujatyńyzdy oqyp aldyńyz ba?-dedim oǵan kózine tike qaraýǵa tyrysyp. Kózin alyp qashady. Bul qylyǵyna tipten kúıinip endi taǵy birdeńe deı bergende, kóz janarymyz kezdesti. Kezdesti de, bir-birimen uzaq ýaqyt kóristi...

 Shamamen 5 mınýttyń kólemi únsiz turdyq.

Maǵan salsa, osy móldir kózderge máńgi qarap tura berer em. Shynymdy aıtsam, osy sátte ýaqyttyń toqtap qalǵanyn qalar em. Únsizdikti ómirimdi 360 grýdasqa buryp áketken aq kúrtesheli qyz buzdy:

— Qudaıym-aı! Sen.. Sen.. Sen qaıdan júrsiń?-dedi ol júzi bozaryp.

— Kólikte otyrǵan sen be ediń?-deımin oǵan.

— Amansyń ba ózi? Qalyń qalaı?-deımin taǵy dirdektep..

Ol maǵan tike qaraıdy da, kózin tómenge túsiredi.  «Men oǵan 189  8-ge qaldyqsyz bóline me» degen sıaqty oılanýdy talap etetin suraq qoıǵandaı uzaq únsiz turdy.

— Jaryǵym- aý! Men seni izdedim ǵoı,-dedim shydaı almaı.

Júregim aýzyma tyǵylyp tap qazir tamaǵyma shyǵyp dúrsildep turǵandaı sezildi. Tynysym tarylyp, sózge shamam jetken joq. On jyl júzin kórmegen, aman-saýlyǵyn bilmegen Jarqynaıǵa lám-mım deýge shamam kelmeı qushaǵyma qystym.

«Kúl bolsyn kók, jemirilsin jer, ýaıym joqtyń» halin keship, men úshin ýaqyt toqtap qaldy. Josparlarym mánsiz, maǵynasyz, mańyzsyz bolyp ketti. Qaltamdaǵy telefon shyryly meni qıal áleminen shyndyq dúnıege oraltty.

Jol jıeginde turǵan ekeýmiz aınaladaǵy ómirdi umytyp ketippiz. Osylaı jalǵasa beretin bolsa, MAI qyzmetkerleri kelip osy bir tátti shaqty buzatyndaı kórindi. Sondyqtan barlyǵyn basqasha sheshýge tyrystym..

Bir saǵattan keıin Jarqynaı ekeýmiz kóligimiz soqtyǵysqan jerden alys emes  jerde sháı iship otyrdyq.

Ekeýmizde de ún joq. Tek kózderimiz ǵana bir-birimen tildesip, sóılesip jatqan syńaıly.

— Men seni kúttim,-dedi ol kenetten. Shynymdy aıtsam, ózińnen keıin eshkimdi shynaıy súıe almadym.

Qýanym kettim. 30 jyldyq ǵumyrymnyń dál osy sáti men úshin eń baqytty sátterdiń biri edi, boıymdy bılegen qýanysh pen baqytty, úlken úmitti  mektep kezinen súıip, kútken mahabbatym, ómirimniń maǵynasy Jarqynaıym bir sátte úzip jiberdi.

— Jaryǵym, janym Jarqynaıym, al men seni qanshalyqty saǵynǵanymdy bilseń ǵoı,-degenshe bolmady.

—  Men turmysqa shyqtym. Ulymyz bar,-dedi.

Baıaǵyda romantıkalyq sýretterden «Ózińe úlken baqyt syılaı alatyn adam bir sátte ózińdi baqytsyz etýi múmkin» degen sózderdiń maǵynasyn túsindim.

Men Jarqynaıdy kinálaǵan joqpyn, kinálaýǵa quqyǵym da joq  edi. Sebebi ekeýmizdi taǵdyr ekige aıyrǵanda biz bala edik. Bir-birimzge ǵashyqtyq sertin bergen joqpyz, desek te birge bolatynymyzǵa sendik.  Alaıda men ony joǵaltyp alǵanyma ókindim. Mektep kezinde bes jyl boıy dos bolǵan ekeýmizdi taǵdyr ekige aıyrdy deıtinim: ol mektepti bitirgen soń, birden Astanaǵa kóshti. İz-tússiz ketti. Sol kezde qoshtasyp ta úlgermegen edik. Alaıda men onyń maǵan degen kirshiksiz taza seziminiń ólmeıtinine sendim. İzdedim, tanys-tamyr arqyly da baılanysqa shyqtym. Ol kezde áleýmettik jeliniń de asa damymaı turǵan ýaqyty bolatyn. Estýim boıynsha, ol shetelge ketip qalǵan. Mahabbatymnan aıyrylǵan men, qatty kúızeldim. Osy ýaqytqa deıin ony oılamaǵan kúnim bolǵan emes. Sebebi men ony shynaıy súıgen edim..

Osy oılarǵa shomyp otyrǵanda onyń álsiz ǵana:

— Keshir meni. Seni kúte almadym,-degen sózin estidim. Men seni áli de súıemin-dedi sálden soń.

-— Jubaıyń qalaı?- dedim aıtqan sózin estimegensip.

—  Jaqsy adam. Ulymyz osy jazda ekige keledi,- deıdi kúlimdep.

—  Esimi kim?

—  Rasýl

—  Esimi maǵynaly eken..

—  Otbasyn qurǵandaryńa qansha ýaqyt boldy?

-— Úsh jyldan asty..... Óziń nemen aınalysyp júrsiń? Qalyń qalaı, jalpy?

-— Jaman emes, Jarqynaı. Jumys óz retimen, balyq sharýashylyǵyna baılanysty jeke bıznesimdi damytyp kelemin,-dedim de:

—  Shynymdy aıtsam, eshteńe de jaqsy emes. Ózińsiz ótken kúnder maǵynasyz, mánsiz boldy. Osy ýaqyt ishinde bir ózińdi kezdestirsem degen armanmen ómir súrdim. Alaıda, men keshigippin-dedim ishqusa bolyp.

Qynjylysym sondaı aýyr edi, onyń únsizdigi aýany taryltyp, azap shektirdi. Ornymnan turyp ketkim keldi.   Jarqynaıymdy on jylda birinshi ret kezdestirip turǵanymdy oılap, sabama keldim.

Ol esh ózgermepti. Názik kelbeti, sulý bitimi, ózine jarasymdy daýys yrǵaǵy, betiniń qyzyly men sonaý jastyq shaqta qushyrlana súıetin erinderi sondaı ádemi edi.. Ol has sulýdyń ózi bolatyn. Qoıý qońyr shashy jaıýly kúıinde qandaı ádemi bolatynyn elestetip otyrdym.

Meniń júregimdi mahabbatpen toltyrǵan, osy júrekke pyshaq suǵyp, qanyn aǵyzǵan has sulýym, úmitim, janymnyń serigi – qarsy aldymda otyrdy.

— Men olardy tastap kete almaımyn. Otbasymdy oıran etýge bara almaımyn,-dedi ol bir kezde oıymdy bólip.

— Árıne, janym. Men seni túsinemin. Tek búgingi keshti on jyl boıy kórmegen eski dosyńa arnashy. Tilegim osy ǵana.

Biz uzaq áńgimelestik. Ol maǵan mektepten keıingi ómiri, mamandyǵy týraly aıtyp, sheteldegi saıahatyn, ómirinde bolǵan mańyzdy  jaıttarymen bólisti. Kesh batpaı ony úıine shyǵaryp saldym. Qushaǵyma qysyp, uzaq ustap turdym. Ol da meni qımaıtynyn sezdim. Taǵy da kóriseıik dedim. Ol - úndemedi. Bir-birimizdi qımaı qoshtassaq ta, júrek shirkinge daýa bar ma?

Kózimnen jas shyqpasa da, júregim qan jylady osy sátte....

Kólik soqtyǵysqan  kesh  taǵdyrlar soqtyǵysyna aınalatynyn kim bilgen. «Apyraý, ómirimniń mánin taýyp, ony bir sátte joǵaltyp alǵandaı kúıde edim. Osy ýaqytqa deıin úlken úmitpen ómir súrdim. Al endi, ol úmittiń de tas-talqany shyqty.

Ol otbasyly. Otbasyn tastamaıdy. Jáne osy úshin - men ony súıemin. Ómir boıy súıip ótem...

Dala qyzy