Halyqaralyq terorıstik DAISH uıymyna kirý maqsatynda Sırıaǵa attanbaq bolǵan qaraǵandylyq áıel sottaldy, dep jazady Qamshy.kz aqparat agenttigi.

Qylmystyq is materıaldaryna sáıkes, Qaraǵandy turǵyny 2016 jyldan beri radıkaldy dinı aǵymnyń quramyna enip, DAISH uıymynyń múshelerimen birleskeni anyqtaldy. 1 jyl buryn dál osyndaı qylmyspen onyń jubaıy sottalǵan.

«2017 jyldyń tamyzynda sottalýshy DAISH terorıstik uıymynyń múshelerine medısınalyq nemese basqa da kómek kórsetý maqsatynda Sırıaǵa attaný týraly sheshim qabyldaıdy. Sol maqsatta áıel jaýyngerlerdiń birimen úzdiksiz aralasyp turǵan. Nátıjesinde sottalýshyǵa Qyrǵyzstan jáne Túrkıada arqyly elden shyǵý usynyldy», - delingen Tengrinews.kz jarıalaǵan istiń materıalynda.

Sondaı-aq sottalýshy áıel Sırıaǵa kúıeýiniń 18 jasqa tolmaǵan inisin de memleket saıasatyna qarsy qoıyp, ózimen birge alyp ketpen bolǵan. Kúıeýiniń inisi Sırıaǵa barýǵa kelisken soń áıel ol úshin qomaqty aqsha qajet ekenin jetkizdi. Alaıda balada aqsha bolmaǵan. Sol sebepti áıel ázirge elden jalǵyz shyǵýǵa uıǵaryp, keıin qaıyn inisin alyp ketýge bekinedi.

Ótken jyldyń 14 qyrkúıeginde sottalýshy jol jónekeı kólik toqtatyp Jambyl oblysyndaǵy Qordaı aýylyna baratynyn aıtqan. Sol jerden shekara asyp ketýdi josparlady. Sóıtip 15 qyrkúıekte jolǵa shyǵyp, aqyr sońy ustaldy. Ol QK 259-babynyń 2-bólimine sáıkes «Esirtki zattardy nemese psıhotroptyq zattardy zańsyz saqtaý, tasymaldaý, berý nemese ótkizý» boıynsha jáne QK 24-257-babynyń 3-bólimine sáıkes «Terorıstik top qurý jáne onyń qyzmetine qatysý» boıynsha aıyptaldy.

Atalmysh is Qaraǵandy oblystyq qylmystyq ister jónindegi mamandandyrylǵan aýdanaralyq sotynda qaralýda.