Búgin Astana ákimdiginde densaýlyq saqtaýdy sıfrlandyrý boıynsha baspasóz jıyny ótti. Sıfrlandyrýdyń basty maqsattarynyń biri – densaýlyq saqtaý aqparattyq júıeleriniń ıntegrasıasy, medısınalyq júıelerdiń bir-birimen jáne syrtqy júıemen áerkettesýi jáne árbir azamat úshin elektrondyq densaýlyq saqtaý pasportynyń qurylýy. Elimizdiń bas qalasynyń turǵyndary 2019 jyldan bastap elektrondyq densaýlyq saqtaý pasportyn ıelenetin bolady, dep habarlaıdy Qamshy.kz aqparat agenttigi Astana qalasy ákimdiginiń resmı saıtyna silteme jasaı otyryp.

Iaǵnı 2019 jyldan bastap naýqas ózimen birge densaýlyq kartasyn tasyp júrmeıtin bolady. Naýqas adam aýrýhanaǵa nemese emhanaǵa qaralatyn bolsa ol sol kúnge deıin qandaı syrqatqa shaldyqqany, dıagnozy, analızderi jáne qandaı em-dom alǵany týraly bar aqparat elektrondyq pasport arqyly dárigerdiń qolynda bolady. Sizdiń týǵannan bastap dárigerge ár qaralǵanyńyz elektrondyq pasportqa aıdan anyq jazylyp turady.

Pasıentte ózine tıesili logın, paról arqyly elektrondyq densaýlyq saqtaý pasportyna kirip syrqaty týraly bar aqparatty bile alatyn bolady. 2018 jyldan bastap QR aýmaǵynda elektrondyq densaýlyq pasportyn kezeń-kezeńmen engizý josparlanǵan. Bolashaqta mundaı júıe elimiz boıynsha tolyqtaı qoldanysqa enedi.

«Paıdalanýshylardyń elektrondyq densaýlyq pasportyndaǵy derbes derekterine qoljetimdilik elektrondyq úkimettiń saıtynda pasıenttiń jeke kabıneti arqyly uıymdastyrylady. Medısınalyq aqparattyń ortalyq habary rólinde engizilgen elektrondyq densaýlyq saqtaý pasporty pasıentter men medısınalyq qyzmetshilerdi zamanaýı jáne senimdi aqparatpen qamtıtyn bolady. Portal qazirgi kúni ózin tolyq túrde aqtap otyr. Portal arqyly tirkelgen pasıent tolyq túrde tegin em alýda», – deıdi Respýblıkalyq elektrondyq densaýlyq saqtaý ortalyǵynyń Astana qalalyq fılıalynyń medısınalyq aqparatty óndeý sektorynyń meńgerýshisi Shaýza Satybaldına.