Almaty oblysyndaǵy Baıserke aýylynda júk kóligi qaǵyp, qaıtys bolǵan oqýshy jaıly jańa derek shyqty, dep habarlaıdy Qamshy.kz aqparat agenttigi QazAqparat málimetine súıenip.

Marqum bolǵan balanyń ata-anasy ulyn ólimge áldekimder ıtermeledi dep kúdiktenedi. Kóńil aıta kelgen bir top ata-ana da mekteptegi álimjettikti aıyptaıdy. «Osy oqıǵadan keıin balamyzdy sabaqqa jiberýge qorqamyz»,  deıdi olar.

Al 8-synyp oqýshysy bilim alǵan mekteptiń dırektory álimjettik  týraly bylaı túsinik berdi.

«Mektepte oqýshylardyń álimjettik kórsetýi, qazir endi barlyǵy aıtylyp jatady. Barlyq jumystar, ózimizge tısti sharalar atqarylyp jatyr. Men mektep basshysy retinde mekteptegi balalardy bopsalaý, bir-birine kúsh kórsetý, álimjettik bar dep sanamaımyn», - dedi Baıserke aýylyndaǵy №12 orta mekteptiń dırektory Tabıǵat Ibraımova.

Marqum bolǵan 8 synyp oqýshysy qaıǵyly jaǵdaı bolar sátten buryn bazardaǵy satýshylardan 2 metr jip suraǵan. Biraq qandaı maqsatta suraǵany belgisiz. «Bazardyń bári biledi ǵoı. Osy jerden jip suraǵan, eshkim bermegen. Sóıtip ana jaqqa barǵan da sekirgen», - deıdi Baıserke aýylynyń turǵyny Jumabaı Joldasuly.

Esterińizge sala keteıik, qaıǵyly jaǵdaı bolǵan kúni 8-synyp oqýshysy  sabaqqa barmaǵanyn oblystyń bilim basqarmasy málim etken edi. Al qaıtys bolǵan  Nurbol Týǵanbaı otbasydaǵy úlken bala bolǵan.