"Qazaq handyǵyna - 550 jyl" shyǵarmashylyq báıgesine

Men Men — túzde órgen taǵynyń tarpań tólimin. Bir taban jaqyn bóltirigi deseń bóriniń. Qamaýda qalsa quzdan da qulap qarǵyǵan, Qulandaı doly qylǵynyp óler qarǵydan, Buǵalyq kımeı, býlyǵyp ósken bulamyn, Barymdy salyp basyma saqtaý qylamyn. Men — Muzarttan ushqan mekeni bólek túlekpin, Qanaty qatty, topshysy bolat, dúr ekpin. Quzǵyndaı qoryp ólekse tatyp aldanbas, Qyrandaı sholyp qanaty qatyp qalǵan jas, Qolyńa ilip qoldana bilseń – Almaspyn, Qoltyǵyńa kirip qolańsa ıiskeı almaspyn! Men – Altaıdaı asqaq, etegi elsiz erenmin. Iirimge tartqan Ertisteı túpsiz tereńmin. Ashýy kelse, qabaǵyńdy ashtyrmas, alshaıtyp aıaq bastyrmas, Arqadan soqqan tútekteı doly kereńmin. Sary dala Kindik qanym tambasa da, bul dala qushaǵynda shattanamyn nurlana. Ystyq tartyp ár tóbesi, ár qyry, Shaqyrady saı-salasy, jylǵa da. Kóz ushymda kókjıegi manaýrap, Ańyz bolyp kórinedi ár aýmaq. Bir kezderi taı-tuıaǵyn jetelep, Osy óńirden ketti-aý babam jaıaýlap?! Eńseli oımen eligemin eljirep, Kóz aldymda kóshken sýret kólbirep. Shoq-shoq bolyp qoń sýlar da qalypty-aý, Kóshken eldiń kóz jasyndaı móldirep. Jerge qarap jadyma eles tunady; Qulaǵymda Muhıt saldyń bir áni. Keń qoınaýdyń kúńirengen áýezi, Qurmanǵazy kúılerindeı unady. Mahabbattyń muńyn aıtyp sherlegen, Bir tóbede Shege otyr kóregen. Anaý qyrdan aqboz atpen sydyrtyp, Aqjaıyqqa betin burdy Tólegen. Qula tóbe – quba jonǵa qyraǵy. Qulan jortsa jasyrǵandaı rańy. Ekindide kók ózekten kólbeńdep, Qyrǵa taıaý Musa jaıaý júr áli. Abyz dala, ańyz dala, ertek der. Sekem alsa seleý basy selt eter. Quba belden qulap túser sekildi atoı salyp, Mahambetteı «tentekter». Ashpasa da maǵan syryn ashalap, Maǵan jaqyn, maǵan tanys osy alap. Kenesary, Isataıdaı bóriler, Jaýǵa tıdi qaı jylǵańdy tasalap?! Qýanysh pen saǵynyshym kóp mende. Bórkimdi atyp, shaýyp shyqtym bókterge. Qasıetińnen aınalaıyn, sary dala, Asyldardyń bári ózińde ótken be?! Óz qolyna alsa ulyń teńdigin, Jara salmaq júregińe endi kim?! Sen arqyly tanyp turmyn, sary dala, Dúnıeniń tarlyǵy men keńdigin. Estımisiń, quzǵyndar! Shyń basyna qonyp, óńsheń quzǵyndar! Qus túgili, quzdyń synyn buzdyńdar. Búıtip shyqqan bıigińdi buzǵym bar, Burap-burap moıynyńdy úzgim bar, Jeti jerden jemsaýyńdy keskilep, Jegenińdi jipke taǵyp tizgim bar. Qý dalada súıegińdi qýratyp, Qý basyńnan taýdaı oba túzgim bar. Artta qalǵan urpaǵyńdy shýlatyp, Sol obada kózmonshaǵyn úzgim bar, Myna meni estımisiń, quzǵyndar! Myna meni estımisiń, quzǵyndar! Qasıetti qaǵbamdy buzdyńdar. Bılik úshin bıiktiktiń uǵymyn, Bul qoǵamnan birjolata syzdyńdar. Qus tóresi qyran qonar shyń edi, Qunyn bilmeı shyń basyna shyjdyńdar. Aqyrynda apan toly boqtyqty, Shyrmatylyp ózderiń-aq myjdyńdar, Bul sózimdi quptaımysyń, quzǵyndar! Bul sózimdi quptasańdar, quzǵyndar, Sonyń úshin sazaıyńdy tizgim bar: Mansappenen máńgúrttengen mıyńdy Arshyp alyp aıaqqa sap myjǵym bar, Qyryq qabat qorshaý salǵan úıińdi Árli-berli býldzermen súzgim bar, Baqytyńa balaıtuǵyn baryńdy Talasqa sap, Tartysyna qyzǵym bar, Myna meni estımisiń, quzǵyndar!

Oralbaı Kámetıauly – 1993 jyly dúnıege kelgen. Týǵan jeri – Baıan-Ólgıı aımaǵynyń Ólgıı qalasy. Qazir Aqtóbe oblystyq halyq shyǵarmashylyǵy Úıindegi «Aıtys» mektebine jetekshilik jasaıdy. «Bir tal ýyq» atty jeke jyr jınaǵy jaryq kórgen. Oblystyq aqyndar jyr-múshaırasynan eki ret júldeger, oblystyq aqyndar aıtysynan talaı márte jeńimpaz atanǵan.