«Arsyz bolmaı ataq joq» nemese «Atyń shyqpasa, jer órte». Qazir onyń ornyna «haıp» degen termındi qoldana bastadyq. Elge tanylýdyń ersileý jolyn tańdaǵandar elimizde kóp-aq. Biri «jezókshelerge» qamshysyn ala júgirse, ekinshisi myńdaǵan kórermenniń kózinshe tósek tóńiregin shıyrlap álek. Ulttyń qan tazalyǵyn saqtaımyn dep, qazaq qyzdarynyń júris-turysyn ańdıtyndar da paıda boldy. Olar kim? Neni maqsat tutady? Qamshy.kz aqparat agenttigi dańq pen daqpyrttyń ara-jigin ajyratpaıtyn juldyzdardy bir tizimdep kórdi.
Jan Ahmadıev. Jýyrda «zamanaýı jyraý» kóshedegi «jezókshelerdi» qamshymen sabap, haıptyń kókesin kórsetti. Áleýmettik jelidegi oqyrman pikiri qaq jaryldy. Bireýler Jan Ahmadıevtiń áreketin qoldap, «naǵyz qazaqtyń er azamaty», «nege barlyq qazaq jigitteri Ahmadıevtaı bolmaıdy eken?» dep jarysa jazsa, bularǵa qarsy top barlyq adamnyń quqyǵy teń ekenin alǵa tartyp, reperdiń isin qylmysqa balady.
«Jezókshelerdi sabaǵanyna nege namystanasyńdar? Olarǵa zań joq eken, demek ózimiz shara qoldanýymyz kerek. Aqshaǵa aryn satqandardyń sózin sóılegender – aqshaǵa aryn satatyndar. Kóshe kezip, tánin satyp aqsha tabatyndardy óz basym adam qataryna jatqyza almaımyn. Qandaı jaǵdaı bolsa da, jezókeshelikpen aınalysatyndaı jaǵdaıǵa jetkender adam atynan aıyrylǵan», - degen pikir bildirdi jeli qoldanýshysy Rysgúl Aıdarova.
Al Jan Ahmadıevtiń bul áreketin zańǵa qaıshy dep baǵalaǵan Zarına Adasbaeva esimdi qoldanýshy: «Jezókshelik úshin sottamaıdy, al sizdi adamdy sabaǵanyńyz úshin túrmege jabý kerek. Uıatsyz! Sen sıakty arsyzdar qazaq qyzdarynyń namysyn qorǵamaı-aq qoısynshy!», - dep jazdy.
Ýaqyt ozdyrmaı Jan Ahmadıevtiń «kóshedegi qyzdardy» qamshymen sabaǵan vıdeosyn tekserýge Almaty qalalyq İİD kiristi. İs nasyrǵa shabady dep qoryqty ma, álde aqıqatyn aıtyp aǵynan jarylǵysy keldi me – kóp uzamaı Jan Ahmadıev bar shyndyqty moıyndady. «Jezóksheler rólinde oınaǵan – meniń áıelim men tanystarym», - dep at-tonyn ala qashty.
Ótirigi shyqqan reper: «Qamshy – haıp, qamshy – laık» dep ándetip júr. Degenmen Jan Ahmadıevti qoldaıtyn halyq az emes kórinedi. Jelidegi jarysa jazylǵan pikirlerge súıensek, halyqqa Jan Ahmadıev sekildi jigitter kerek. Basqalar osydan keıin aıaqtaryn ańdap basatyn bolady.
Byltyr «Temir qatyn» degen beınebaıanyna syrt kelbeti Baıan Esentaevaǵa uqsas qyzdy túsirip, halyqtan maqtaý estigen edi. Alaıda qarsy pikirler de aıtyldy. «Ózgeniń basyna tóngen qara bultty qara basynyń qamy úshin paıdalanyp otyr», - dep aıyptaǵandar da tabyldy.
Ras, Baıan Esentaevanyń atyn aýzyna alǵan adamnyń ataǵy sharyqtap ketetin tusta Ahmadıev aqparat keńistiginde jarq ete qaldy. Bul joly da solaı bolýyn kútti me eken?! Kim bilsin...
Jánibek Imanmázir – ózge ult ókilderimen qoltyqtasyp júrgen qyzdarǵa eskertý jasap, odan qalsa balaǵattap, qol kóterýge deıin baryp júrgen adam. Óziniń áreketi túsirilgen vıdeolardy jelige salyp, halyqtyń qyzý talqysyna shyǵarady.
Internette taraǵan vıdeolaryn Jánibektiń ózi «halyqty oıatý» dep túsindiredi. Qoldaryndaǵy neke saqınasyna qaramastan, qazaq qyzy men ózge ult ókiliniń turmys qurǵanyna senbeı qoıǵany bar.
Jeli qoldanýshylardyń arasynda: «Jánibek Imanmázir qazaq qyzdaryn qutqaryp júr»,- dep qoldaý bildiretinder birsypyra. Olar qazaq qyzdarynyń ózge ulttyń jeteginde ketpegenin qalaıtyndaryn jazyp, Jánibekke jaqtasady.
Onyń isin qylmys dep baǵalaıtyndar da kezdesedi. «Qazaq jigitteri qazaq qyzdaryn óziniń jekemenshik zatyndaı kórip, jabaıylyq tanytýyn qoıý kerek», - deıtinder de bar.
«Qoǵamdaǵy jer men sýdyń áńgimesi kóterilgende Jánibek Imanmázirdiń aty da, tipti ıisi de shyqpaıdy. Bul ultshyldyqtyń, ultjandylyqtyń qaı túri? -dep jazdy Eldar Aımuhambet atty qoldanýshy.
Tánin kórsetý — haıptyń ótimdi túri. Ol jaǵynan ózimiz jan-jaqtan dattap, jappaı jarnamalaǵan Aıjan Baızaqova kósh bastap tur. Kókiregin ashyp, jartylaı jalańashtanǵan onyń sýretteri ınternetti kezip ketti. Baızaqova túsken kez kelgen beınebaıan birden kópshiliktiń nazaryna iligip, talqysyna túsedi. Oǵan Alem Band tobynyń sońǵy beınebaıany birden-bir dálel.
Qara pıarmen tanymal bolmaqqa talpynǵandardyń qataryna jýrnalıser de qosylypty. «Keshki kezdesý» baǵdarlamasynyń júrgizýshisi Aman Tasyǵan Youtube jelisinde TalkLike vıdeoblogyn júrgizip, el aýzyndaǵy adamdarǵa belden tómen suraq qoıady.
Ol suhbattarynyń birinde: «Meniń belden tómen suraq qoıatyn suhbatymnyń ózindik syry bar», - dep jaýap berip júr. Al oǵan deıin Aman Tasyǵan ótkir tildi jýrnalıs atanǵan edi. Bireýler mundaı saýaldardy qalypty qabyldap, «Uly sózde uıattyq joq» degenniń aıasyna syıdyrsa, endi bireýler «bul – qazaqtyń mentalıtetine jat nárse» dep jerden alyp, jerge salady.
Pikir qaldyrý