Almatyda múmkindigi shekteýli jandardyń quqyǵyn taban asty etken kásipkerlerge 3 mıllıon teńgeden astam aıyppul salyndy. Olar ǵımarattarynda kembaǵal jandardyń emin-erkin kirip shyǵýyna múmkindik jasamaǵan. Tipti, qarapaıym pandýsty ornatýdy da shyǵyn sanaǵan. Mundaı olqylyqtarǵa ashynǵan múgedekterden shaǵym da kóbeıip ketipti. Arbaǵa tańylǵandar, ásirese, emdeý mekemelerine bas suǵa almaǵanyna narazy.

Almatydaǵy áleýmettik qorǵaý jáne kóshi-qon komıtetiniń departamentine sońǵy kezderi múgedekterden túsken shaǵym kóbeıgen. Olar arnaıy pandýs pen arbanyń joqtyǵynan 30-ǵa tarta ǵımaratqa kire almaı, qınalyp jatqanyn jetkizipti. Ásirese, arbaǵa tańylǵandarǵa dárihanalar men emdeý mekemelerine kirý muńǵa aınalǵan. Muny eskergen mamandar dereý tekseristi bastap ketti. Máselen, Sátpaev kóshesindegi bul dárihana ıesi talaıdan beri kembaǵaldardyń quqyǵyn esermeı kelipti. Tek bul áreketi úshin qomaqty aıyppul arqalaıtynyn estigen soń, kásipker dereý pandýs ornata bastapty. Alaıda, onyń ózi talapqa saı bolmaı shyqty.

«Qazir qala boıynsha kóp nysandarda pandýstardy kórip jatamyz, biraq olardyń barlyqtary normatıvterge saı kelmeıdi. Mysaly, myna pandýsty alsańyz, múgedek jandarǵa yńǵaısyz. Pandýstyń eni 1-de 20 sm bolý kerek. Tutqalar bolý kerek eki shetinen. Múgedek jandar esh qıyndyqsyz kóterilýine jáne túsýine», - dedi Eńbek, áleýmettik qorǵaý jáne kóshi-qon komıtetiniń Almaty qalasy boıynsha departamentiniń bas mamany Nurlan IýLIMBETOV.

Tekserýshiler bas suqqan kelesi ǵımarat ta múmkindigi shekteýli jandarǵa ıkemdelmegen. Tis emdeý mekemesiniń ıesi munda kembaǵal jandardyń múldem kelmeıtinin aıtty. Al qajettilik týyndasa, múgedekterge qyzmetti úıine baryp kórsetýge daıyn ekendikterin jetkizdi.

«Biz múgedekterge jaǵdaı jasaýǵa qarsy emespiz. Tek Sáýlet basqarmasynan mekememizdi keńeıtýge ruqsat alyp berseńizder. Myna úı eski, 70-shi jyldary turǵyzylǵan. Esikterimiz de tar, múgedekterdiń arbasy syımaıdy. Al ǵımaratty qaıta jasaqtaý úshin barlyǵyna qomaqty aqsha jumsaý qajet bolady», - dedi tis emhanasynyń qojaıyny Gaýhar BAJANOVA.

Mamandardyń sózinshe, Almatydaǵy osyndaı 3 myń nysannyń tek  jartysynda ǵana múgedekterge jaǵdaı jasalǵan eken. Al qalǵany talapqa múldem saı emes. Kásipkerler nysandardy arbamen jabdyqtaý bylaı tursyn, qarapaıym pandýs ornatýdyń ózin úlken shyǵyn sanaıdy eken. Bir pandýs ornatý úshin shamamen 100 myń teńge ketse, arnaıy kótergishi bar lıft ornatý 500 myń teńgege deıin baratyn kórinedi.

«Kóbisi bilmegendigin aıtyp jatady, standarttyń bilmegendigin aıtyp jatady. Keıbireýi qarajat joq dep túsindirip jatady. Kórsetilgen kemshilikterdi joıý úshin biz eskertý qaldyramyz. Sol eskertýdiń ýaqyty kórsetiledi. Sol ýaqyttyń ishinde tolyǵymen joıylmaǵan jaǵdaıda aıyppul salynady. Aıyppul óndirilmegen jaǵdaıda, bizdiń departamentpen sotqa berilip, sot arqyly óndiris jasaımyz», - dedi Eńbek, áleýmettik qorǵaý jáne kóshi-qon komıtetiniń Almaty qalasy boıynsha departamentiniń bólim basshysy Rýslan YSQAQOV.

Ótken jyly qalada shaǵym boıynsha 44 nysan tekserilip, múmkindigi shekteýli jandardyń quqyǵyn taban asty etken kásipkerlerge 3 mıllıon teńgeden astam aıyppul salyndy. Al bıylǵy jyl basynan beri 16 nysan ıesi 300 myń teńgeden astam aıyppul arqalaǵan. Aıta ketsek, múgedekterge jaǵdaı jasamaǵan shaǵyn kásipkerlik sýbektisine 120, orta bıznes ókilderine 200 jáne iri kásip ıelerine 400 aılyq eseptik kórsetkish kóleminde aıyppul jazylady. Olqylyqtyń orny belgilengen merzimde túzelmese, aıyppul kólemi arta beredi.