Almatyda KTK telearnasynyń operatory iz-túzsiz joǵalyp ketti. Bul týraly onyń ákesi aıtty dep jazady Qamshy.kz aqparat agenttigi tengrinews.kz saıtyna silteme jasap.

Týystarynyń aıtýy boıynsha, Oljas Belgibaevke 5 kún boıy izdeý salǵan. Ol senbide kınoǵa baramyn dep úıinen shyǵyp ketken kórinedi. Búginge deıin jigit óz úıine qaıta oralmady. Al dosynyń aıtýy boıynsha, Oljastyń uıaly telefony sóndirýli, sońǵy ret senbiden jeksenbige qaraǵan túni áleýmettik jelini qoldanǵan.

Oljastyń ákesi polısıa qyzmetkerlerine aryz jazǵanyn aıtty. Alaıda izdeý jumystary áli kúnge deıin nátıjesiz.

Almaty qalasynyń İİD habarlaýy boıynsha, qazirgi kezde Bostandyq aýdanynda İİB jedel izdeý jumystary júrgizilip jatyr.

«Belgibaev Oljasty jedel izdeý jumystary onyń turǵylyqty meken jaıynda júrgizilip jatyr. Joǵalǵan jigitti izdeý barysynda jańa tehnologıalar men ár túrli izdeý nusqalary qoldanylýda», deıdi İİD baspasóz qyzmetkeri Saltanat Ázirbek.