Bıyl Almaty marafonynda 14 myńnan asa adam júgiredi. Sporttyq sharaǵa shetelden arnaıy kelip qatysatyndar da bar eken. Uıymdastyrýshylar sharaǵa tas-túıin daıynbyz deıdi. Qatysýshylar 42 shaqyrymdy eńserýleri kerek. Marafon Respýblıka alańynan bastalyp, dál osy jerde aıaqtalady.

Evgenıı Karabınskıı Almaty men Kıev arasynda jumys isteıdi. Erteńgi marafonǵa qatysý úshin arnaıy kelipti. Aptasyna 3-4 kún jattyqtyrýshysymen júgiredi. Ol  21 shaqyrymdy eńsermekshi. Aıtýynsha, kásipqoı sportshy bolmaǵannan keıin tolyq júgirý qıynǵa soǵady. Bıyl atalǵan sharaǵa 3 jyl qatarynan qatysyp jatyr eken. Almatydaǵy buqaralyq sport jylda joǵary deńgeıde uıymdastyrylady, deıdi ol.

«Almaty marafon óte joǵary deńgeıde ótedi. Jyl saıyn qatysýshylardyń sany artyp keledi. Sonymen qatar, qala taýly jerde ornalasqannan keıin qıyndyqtar kóp. Men 21 shaqyrym júgirem dep josparlap otyrmyn», - dedi Evgenıı Karabınskıı.

 Marafonǵa 14 myń adam resmı tirkelgen. Uıymdastyrýshylardyń sózinshe, byltyr 13 myńǵa jýyq adam qatysypty. Buqaralyq sportqa qyzyǵatyndar sany jyl sanap artyp keledi eken.

«Osy demalysta eń iri sharalarymyzdyń biri - Almaty marafony ótpek. Azıadaǵy aýqymdy sporttyq mereke bolmaq. Bizdiń qala oǵan tas-túıin daıyn. Bıyl qatysýshylardyń da sany byltyrǵydan qaraǵanda kóp. Resmı tirkelgenderdiń sany 14 myńnan asyp jyǵylady. Marafon kezinde ótken jyldaǵydaı adamdar taǵy qosylady degen oıdamyz», - dedi Almaty qalasy Dene shynyqtyrý jáne sport basqarmasy basshysynyń orynbasary Rústem Baıseıitov.

 Marafonnyń jalpy uzyndyǵy 42 shaqyrym. Ol 5 qashyqtyqqa bólingen eken. Qatysýshylarǵa barlyq jaǵdaı jasalǵan. Tipti, jolda beriletin taǵamdardyń túrleri de kóbeıgen. Aıta keteıik, marafonnan jınalǵan qarjy qaıyrymdylyqqa jiberiledi.  

«Osy jyly biz jınalǵan qarajatty qaıyrymdylyqqa jiberemiz. Ol aqsha 3 mektep pen 3 lıseıge sporttyq alańdar salynýyna jumsalady. Sonymen qatar, sporttyq jabdyqtar satyp alynady. Taǵy bir aıta keterligi, bıylǵy marafonǵa qatysýshylardyń taǵam túrlerin kóbeıttik. Iaǵnı, byltyr tek jemis-jıdekter ǵana bolsa, osy sharada shokoladtar men táttiler qosyldy. Uzaqqa júgiretinderge arnaıy massaj da qarastyryldy», - dedi Almaty marafonynyń operasıalyq dırektory Quralaı ERMEKBAEVA.

 Almaty marafonynan bólek 6-7 mamyrda «Tengri Ultra» marafon ótedi. Bul sporttyq sharanyń ereksheligi - qatysýshylar taýly aımaqtarda júgiredi. Mundaı buqaralyq sport Almaty oblystarynda uıymdastyrylady. Qalalyq sport basqarmasynyń ókilderi, «Tengri Ultra» marafonǵa qyzyǵatyndar da az emes deıdi.

«Bul sporttyq shara Almaty oblysy, Tańbaly tastyń aýmaǵynda ótedi. Oǵan kóbine áýesqoı marafonshylar qatysady. Iaǵnı, taýly jerlerde júgirýdi jany súıetinder bolady», - dedi Almaty qalasy Dene shynyqtyrý jáne sport basqarmasy basshysynyń orynbasary Rústem Baıseıitov.

Sporttyq sharalardy uıymdastyrýshylardyń sózinshe, Almatyda salaýatty ómir saltyn ustanýǵa barlyq jaǵdaı jasalǵan. Oǵan dálel, velojolaqtar men dene shynyqtyrýmen aınalysatyn alańdar. Sporttyq sharalardyń ashylýyn ótken aptada qala ákimi Baýyrjan Baıbek velosherýmen ashyp bergen bolatyn. Bıyl 21 velosherý ótkizý josparlanypty. Jalpy, 3 myńnan asa sporttyq sharalar 2018 jyly uıymdastyrylady.